ຕອນເຊົ້າວັນທີ 24 ກຸມພາ 2021 ເລີ່ມມີການຕິດຕັ້ງສັນຍະລັກການຮ່ວມມືລາວ-ຈີນ ຢູ່ຖະໜົນເຈົ້າຟ້າງຸ່ມ

ຕອນເຊົ້າວັນທີ 24 ກຸມພາ 2021 ເລີ່ມມີການຕິດຕັ້ງສັນຍະລັກການຮ່ວມມືລາວ-ຈີນ ຢູ່ຖະໜົນເຈົ້າຟ້າງຸ່ມ

ເຊົ້າວັນທີ 24 ກຸມພາ 2021, ໄດ້ມີການເລີ່ມຕິດຕັ້ງປ້າຍສັນຍະລັກການຮ່ວມມືລາວ-ຈີນ ໃສ່ຖະໜົນເຈົ້າຟ້າງຸ່ມ ແຕ່ໂຮງໝໍມະໂຫສົດ ຫາສາມແຍກປາກປ່າສັກໂດຍຕິດຕັ້ງໃສ່ເສົາໄຟເຍືອງທາງ 50 ຕົ້ນ ເຊິ່ງການຕິດຕັ້ງສັນຍະລັກດັ່ງກ່າວ ຈະເປັນການຕິດຕັ້ງແບບຊົ່ວຄາວ

ເພື່ອສະເຫຼີມສະຫຼອງຜົນສຳເລັດໂຄງການດັ່ງກ່າວ ແລະ ຈະມີການປັບປ່ຽນໄປຕາມຮູບແບບ ໄປຕາມແຕ່ລະໄລຍະຂອງເທສະການ ແລະ ວັນບຸນສຳຄັນຕ່າງໆ

ອີງຕາມພະແນກພະລັງງານ ແລະ ບໍ່ແຮ່ນະຄອນຫຼວງວຽງຈັນ (ນວ) ໃນນາມຜູ້ຮັບຜິດຊອບໂຄງການຍົກລະດັບໄຟແສງສະຫວ່າງໃນເທສະບານໃຈກາງຕົວເມືອງ ນວ ແຈ້ງມາຍັງສັງຄົມ ກໍຄືປະຊາຊົນບັນດາເຜົ່າ ເວົ້າລວມ ເວົ້າສະເພາະຊາວ ນວ ຊາບກັນວ່າ: ໂຄງການຍົກລະດັບໄຟແສງສະຫວ່າງໃນເຂດເທສະບານຕົວເມືອງ ນວ ດ້ວຍທຶນຊ່ວຍເຫຼືອລ້າຂອງລັດຖະບານ ສປ ຈີນ ມູນຄ່າ 300 ລ້ານຢວນ ໂຄງການເລີ່ມລົງມືຈັດຕັ້ງວັນທີ 12 ກັນຍາ ແລະ ສຳເລັດໂດຍພື້ນຖານ ສາມາດເປີດນຳໃຊ້ຢ່າງເປັນທາງການວັນທີ 27 ພະຈິກ 2020

ເພື່ອເປັນຂອງຂວັນໃຫ້ແກ່ລັດຖະບານລາວໂອກາດສະເຫຼີມສະຫຼອງວັນຊາດລາວຄົບຮອບ 45 ປີ ແລະ ກອງປະຊຸມໃຫຍ່ຂອງພັກຄັ້ງທີ XI ແຕ່ໂຄງການດັ່ງກ່າວຈະສຳເລັດ100% ວັນທີ 25 ກຸມພາ 2021 ແລະ ມີແຜນຈັດພິທີມອບຮັບວັນທີ 26 ມີນາ 2021.

ໃນໄລຍະສະເຫຼີມສະຫຼອງຜົນສຳເລັດໂຄງການດັ່ງກ່າວລະຫວ່າງວັນທີ 25 ກຸມພາ ຫາວັນທີ 26 ມີນາ 2021 ສອງຝ່າຍລາວ-ຈີນ ມີຄວາມຈຳເປັນຕ້ອງໄດ້ຕິດຕັ້ງປ້າຍສັນຍະລັກການຮ່ວມມືລາວ-ຈີນໃສ່ເສັ້ນທາງໃດໜຶ່ງໃນ 7ເສັ້ນທາງຂອງໂຄງການ ແລະ ໄດ້ເຫັນດີເລືອກເອົາຖະໜົນເຈົ້າຟ້າງຸ່ມ ແຕ່ໂຮງໝໍມະໂຫສົດ ຫາສາມແຍກປາກປ່າສັກໂດຍຕິດຕັ້ງໃສ່ເສົາໄຟເຍືອງທາງ 50 ຕົ້ນ

ການຕິດຕັ້ງສັນຍະລັກດັ່ງກ່າວ ຈະບໍ່ແມ່ນເປັນການຕິດຕັ້ງແບບຖາວອນອາດຈະມີການປັບປ່ຽນໄປຕາມຮູບແບບ ໄປຕາມແຕ່ລະໄລຍະຂອງເທສະການ ແລະ ວັນບຸນສຳຄັນຕ່າງໆ.ໂດຍສັນຍະລັກການຮ່ວມມືນີ້ ປະກອບມີສັນຍະລັກດອກຈຳປາ ທີ່ສະແດງເຖິງຄວາມເປັນເອກະລັກຂອງຊາດລາວ ແລະວັດທະນະທຳລາວ ທີ່ໄດ້ປະດັບໃສ່ເສົາໄຟເຍືອງທາງຢ່າງສະຫງ່າງາມ ແລະ ສັນຍະລັກທີ່ເປັນຂອດຈີນສີແດງ ສະແດງເຖິງເອກະລັກຂອງຊາດຈີນ ມີຄວາມໝາຍແຫ່ງຄວາມເປັນສິລິມຸງຄຸນ ຄວາມສາມັກຄີຮັກແພງ ທັງສອງສັນຍະລັກນີ້ຈະຕິດໃສ່ເສົາໄຟເຍືອງທາງແບບສະຫຼັບຕົ້ນກັນໄປຕາມຖະໜົນເຈົ້າຟ້າງຸ່ມ

ຂ່າວລາວ