ນະຄອນຫຼວງວຽງຈັນ ອາດຈະມີການຂະຫຍາຍເວລາປິດການເຂົ້າ ອອກເມືອງຕື່ມອີກເນື່ອງຈາກຍັງກວດພົບຜູ້ຕິດເຊື້ອໃນຊຸມຊົນ

ນະຄອນຫຼວງວຽງຈັນ ອາດຈະມີການຂະຫຍາຍເວລາປິດການເຂົ້າ ອອກເມືອງຕື່ມອີກເນື່ອງຈາກຍັງກວດພົບຜູ້ຕິດເຊື້ອໃນຊຸມຊົນ

ນະຄອນຫຼວງວຽງຈັນ ອາດຈະມີການຂະຫຍາຍເວລາປິດການເຂົ້າ-ອອກເມືອງຕື່ມອີກເນື່ອງຈາກຍັງກວດພົບຜູ້ຕິດເຊື້ອໃນຊຸມຊົນໃນຈໍານວນຂ້ອນຂ້າງສູງຢູ່ໃນປັດຈຸບັນ.

ຫຼາຍທ່ານຄົງຍັງຈື່ຄໍາເວົ້າຂອງທ່ານພັນຄໍາ ວິພາວັນ ນາຍົກລັດຖະມົນຕີ ທີ່ໄດ້ກ່າວເມື່ອມໍ່ໆມານີ້ວ່າ: ລັດຖະບານຮູ້ວ່າປິດການເຂົ້າ-ອອກນະຄອນຫຼວງ ແລະ ແຂວງອື່ນໆ ແມ່ນໄດ້ສົ່ງຜົນກະທົບຕໍ່ການດໍາລົງຊີວິດຂອງປະຊາຊົນແຕ່ກໍຈໍາເປັນເພາະປົກປ້ອງຊີວິດຂອງພວກເຂົາຈາກພະຍາດທີ່ຮ້າຍແຮງ.

ຄະນະສະເພາະກິດເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ແຈ້ງໃຫ້ຮູ້ວ່າ: ປັດຈຸບັນນີ້, ສະພາບການແຜ່ລະບາດຂອງພະຍາດໂຄວິດ-19 ຢູ່ລາວຖືວ່າມີການແຜ່ລະບາດເປັນວົງກວ້າງ ໂດຍໄດ້ມີການຂະຫຍາຍໄປຫຼາຍແຂວງ ລວມທັງຢູ່ນະຄອນຫຼວງວຽງຈັນທີ່ພົບຜູ້ຕິດເຊື້ອໃນຊຸມຊົນບາງວັນຫຼາຍກວ່າ 500 ຄົນກໍ່ມີ, ຮ້າຍແຮງໄປກວ່ານັ້ນສາຍພັນພະຍາດດັ່ງກ່າວທີ່ກວດພົບໃນປັດຈຸບັນ ແມ່ນສາຍພັນເດວຕາ ຊຶ່ງເປັນສາຍພັນທີ່ຮ້າຍແຮງ ແລະ ເຮັດໃຫ້ມີຜູ້ເສຍຊີວິດເປັນຈໍານວນຫຼາຍຢູ່ປະເທດສະຫະລັດ ອາເມຣິກາ, ບຣາຊິນ, ອີນເດຍ ແລະ ປະເທດອື່ນໆ.

ຄະນະສະເພາະກິດໃຫ້ຮູ້ຕື່ມວ່າ: ລັດຖະບານໄດ້ໃຊ້ມາດຕະການປິດການເຂົ້າ-ອອກບ້ານ, ເມືອງ ແລະ ແຂວງນັ້ນ ຖືວ່າເປັນມາດຕະການຫຼັກ ແລະ ສໍາຄັນເພື່ອຢັບຢັ້ງພະຍາດດັ່ງກ່າວບໍ່ໃຫ້ແຜ່ລາມຈາກແຂວງນີ້ ໄປຫາແຂວງອື່ນ, ນອກນັ້ນລັດຖະບານຍັງໄດ້ຂົນຂວາຍຊອກຫາວັກຊິນປ້ອງກັນພະຍາດໃຫ້ປະຊາຊົນລາວໃຫ້ໄດ້ຫຼາຍທີ່ຈະຫຼາຍໄດ້ເພື່ອເຮັດໃຫ້ປະຊາຊົນລາວມີຄວາມປອດໄພຈາກພະຍາດດັ່ງກ່າວ. ແຕ່ເຖິງແນວໃດກໍ່ຕາມລັດຖະບານມີຄວາມພະຍາຍາມສູງໃນການຢັບຢັ້ງ ແລະ ປ້ອງກັນເຮັດໃຫ້ພະຍາດດັ່ງກ່າວໝົດສິ້ນໄປຈາກປະເທດລາວໂດຍການວາງມາດຕະການຕ່າງໆໃຫ້ປະຊາຊົນໄດ້ປະຕິບັດ ແຕ່ຍັງມີກຸ່ມຄົນ ແລະ ບຸກຄົນຈໍານວນໜຶ່ງທີ່ຖືເບົາຕໍ່ມາດຕະການດັ່ງກ່າວຈຶ່ງກໍ່ໃຫ້ເກີດມີການລະບາດຮອບໃໝ່ ຊຶ່ງປະເທດລາວໄດ້ປະເຊີນໃນປັດຈຸບັນນີ້.

ປັດຈຸບັນນີ້, ເພື່ອຄວບຄຸມ ແລະ ສະກັດກັ້ນການລະບາດ ຂອງພະຍາດໂຄວິດ-19 ບໍ່ໃຫ້ແຜ່ລະບາດເປັນວົງກວ້າງ, ອໍານາດການປົກຄອງນະຄອນຫຼວງວຽງຈັນໄດ້ປິດການເຂົ້າ-ອອກນະຄອນຫຼວງວຽງຈັນ ເປັນເວລາ 12 ວັນເລີ່ມມາແຕ່ວັນທີ 19 ຫາ 30 ກັນຍາ 2021 ນີ້, ແຕ່ຖ້າຫາກຍັງມີການແຜ່ລະບາດພະຍາດໂຄວິດ-19 ໃນຊຸມຊົນເພີ່ມໃໝ່ເລື່ອຍໆນັ້ນ ນະຄອນຫຼວງວຽງຈັນ ອາດຈະມີການຂະຫຍາຍເວລາປິດການເຂົ້າ-ອອກເມືອງ ແລະ ເພີ່ມມາດຕະການເຂັ້ມງວດຂຶ້ນຕື່ມອີກ.

ຂ່າວລາວ