ມອບສົ່ງຕົວ ເຈ້ທິບ ແລະ ຜົວ ໃຫ້ກັບເຈົ້າໜ້າທີ່ລາວ ທີ່ດ່ານກວດຄົນເຂົ້າເມືອງແຂວງໜອງຄາຍ

ມອບສົ່ງຕົວ ເຈ້ທິບ ແລະ ຜົວ ໃຫ້ກັບເຈົ້າໜ້າທີ່ລາວ ທີ່ດ່ານກວດຄົນເຂົ້າເມືອງແຂວງໜອງຄາຍ

ວັນທີ 31/07/2022 ເຈົ້າໜ້າທີ່ໄທສົ່ງມອບ ເຈ້ທິບ ແລະ ສາມີ ໃຫ້ກັບເຈົ້າໜ້າທີ່ລາວ ທີ່ດ່ານກວດຄົນເຂົ້າເມືອງແຂວງໜອງຄາຍ ເພື່ອຈະກັບໄປດຳເນີນຄະດີຕໍ່ທີ່​ ນະຄອນຫຼວງວຽງຈັນ ສປປ ລາວ.

ນາງພອນທິບ ຫຼື ທີ່ເອີ້ນກັນຕິດປາກວ່າ ເຈ້ທິບ ທີ່ໄດ້ກາຍເປັນຜູ້ຕ້ອງການຕົວມາດຳເນີນຄະດີ ເພາະສໍ້ໂກງເງິນປະຊາຊົນ ຈຳນວນຫຼາຍພັນຄົນ ທາງເຈົ້າໜ້າທີິ່ຕຳຫຼວດຂອງໄທ ໄດ້ບຸກເຂົ້າຈັບກຸມຕົວ ເຈ້ທິບ ແລະ ຜົວຂອງລາວ ໄດ້ເປັນທີ່ຮຽບຮ້ອຍແລ້ວ

ໃນຕອນເຊົ້າຂອງວັນທີ 29 ກໍລະກົດ 2022 ມີລາຍງານຈາກສື່ທາງການຂອງປະເທດໄທຫຼາຍສຳນັກ ໂດຍສະເພາະລາຍການເລື່ອງເລົ່າເຊົ້ານີ້ ຂອງ ຊ່ອງ 3 ວ່າ: ໃນເວລາປະມານ 6ໂມງເຊົ້າຂອງມື້ນີ້ ເຈົ້າໜ້າທີ່ຕຳຫຼວດຊຸດ ປະຕິບັດການ ຕມ ໄດ້ບຸກເຂົ້າຄວບຄຸມຕົວ ນາງ ພອນທິບ (ເຈ້ທິບ) ແລະ ແຟນໜຸ່ມ ຊື່ ອານຸສິດ ພຸດທະວົງ ໃນໂຮງແຮມແຫ່ງໜຶ່ງ ບໍລິເວນ ຣັງສິດ ກູງເທບ ປະເທດໄທ. ນອກນັ້ນຍັງມີລາຍງານຕື່ມອີກວ່າ, ເຈ້ທິບ ໄດ້ຫຼົບໜີເຂົ້າມາໃນປະເທດໄທ ຕັ້ງແຕ່ຊ່ວງໄລຍະທ້າຍເດືອນ ມິຖຸນາ ພ້ອມກັບຫອບເງິນໜີມາອີກຫຼາຍລ້ານ ກ່ອນທີ່ຈະຖືກເຂົ້າຄວບຄຸມຕົວໃນມື້ນີ້.

ຢ່າງໃດກໍຕາມ ຕາມຄຳໃຫ້ສຳພາດຂອງ ເຈ້ທິບ ເຫັນວ່າ: ເຈ້ທິບຍັງຢືນຍັນວ່າຕົນເອງບໍ່ໄດ້ໂກງເງິນ ແລະ ບໍ່ໄດ້ຫອບເງິນໜີມາແຕ່ຢ່າງໃດ ແລະ ທີ່ໜີມາແມ່ນເພື່ອຕັ້ງຫຼັກແກ້ໄຂບັນຫາເທົ່ານັ້ນ.

ບາງຕອນຂອງການສຳພາດເຈ້ທິບໄດ້ກ່າວກັບສື່ມວນຊົນໄທວ່າ: “ເຮົາບໍ່ໄດ້ເອົາຂອງໃຜມາ ໃຜຈະເວົ້າຫຍັງກໍເວົ້າໄດ້ ທຸກຢ່າງມັນອຸປະໂຫຼກຂຶ້ນມາເອງໝົດ ຖ້າເຮົາຜິດແທ້ ເຮົາພ້ອມຈະຮັບຜິດຊອບທຸກຢ່າງ”.

ຂ່າວລາວ