ລັດຖະບານປະຊຸມດ່ວນ! ຫຼັງພົບຜູ້ຕິດເຊື້ອໃໝ່14ຄົນ ພິຈາລະນາຕໍ່ການອະນຸມັດໃຫ້ຍົນເຊົ່າເໝົາຈາກປະເທດສ່ຽງ

ລັດຖະບານປະຊຸມດ່ວນ! ຫຼັງພົບຜູ້ຕິດເຊື້ອໃໝ່14ຄົນ ພິຈາລະນາຕໍ່ການອະນຸມັດໃຫ້ຍົນເຊົ່າເໝົາຈາກປະເທດສ່ຽງ

ນະຄອນຫຼວງວຽງຈັນ: ຂ່າວດ່ວນ ໃນວັນທີ 23 ພະຈິກ 2020 ຄະນະສະເພາະກິດຄວບຄຸມ ປ້ອງກັນ ແລະ ແກ້ໄຂການລະບາດຂອງພະຍາດໂຄວິດ-19 ຖະແຫຼງຂ່າວລາຍງານສະພາບການລະບາດຂອງພະຍາດ ໂຄວິດ-19 ໃຫ້ຮູ້ວ່າ ພົບຜູ້ຕິດເຊື້ອໂຄວິດ-19 ໃນລາວ ເພີ່ມອີກ 14 ກໍລະນີ

ໃນນັ້ນ ຄົນລາວ 1 ຄົນ, ຄົນຕ່າງປະເທດ 13 ຄົນ(ເພດຊາຍ 11 ຄົນ,ຍິງ 3 ຄົນ) ທັງໝົດແມ່ນເດີນທາງມາຈາກຕ່າງປະເທດ. ຈາກການກວດເບື້ອງຕົ້ນ ທຸກຄົນແມ່ນມີອາການປົກກະຕິ (ບໍ່ສະແດງອາການຫຍັງເຊັ່ນ: ຫວັດ, ໄຂ້, ໄອ, ອຸນຫະພູມສູງ) ແຕ່ກວດພົບເຊື້ອ. ທັງໝົດ 14 ຄົນ ແມ່ນໄດ້ຖືກນຳໄປປິ່ນປົວແຍກປ່ຽວ ຢູ່ໂຮງໝໍມິດຕະພາບ

ຮອດປະຈຸບັນ, ມີຜູ່ຕິດເຊື້ອສະສົມ 39 ຄົນ, ປົວດີ 24, ກໍາລັງປິ່ນປົວ 15 ຄົນ. ຈາກກໍລະນີດັ່ງກ່າວນີ້, ທ່ານ ພູທອນ ຍັງໄດ້ເປີດເຜີຍວ່າ: ທາງ ພັກ ແລະ ລັດຖະບານ ກໍ່ໄດ້ມີຄວາມເປັນຫ່ວງເປັນໃຍ ແລະ ທ່ານນາຍົກລັດຖະມົນຕີ ກໍ່ໄດ້ຮຽກປະຊຸມຄະນະສະເພາະກິດດ່ວນ ເພື່ອໃຫ້ທິດຊີ້ນຳໃນຫຼາຍບັນຫາ ເຊີ່ງໜື່ງໃນນັ້ນ ແມ່ນໃຫ້ຄະນະສະເພາະກິດ ພິຈາລະນາຖີ່ຖ້ວນຕໍ່ການອະນຸມັດໃຫ້ຍົນເຊົ່າເໝົາລຳຈາກປະເທດທີ່ມີການລະບາດຂອງໂຄວິດ-19 ລວມທັງການອອກວີຊ່າໃຫ້ກັບຄົນຕ່າງປະເທດ ທີ່ຢູ່ປະເທດກຳລັງມີການລະບາດພະຍາດໂຄວິດ-19

ພ້ອມນີ້, ຍັງຮຽກຮ້ອງໃຫ້ທຸກພາກສ່ວນໃນສັງຄົມ ໃຫ້ເພີ່ມສະຕິໃນການປ້ອງກັນການລະບາດເຮັດແນວໃດບໍ່ໃຫ້ມີການລະບາດມາອີກຮອບໃໝ່; ເອົາໃຈໃສ່ໃນການໂຄສະນາເຜີຍແຜ່ວິທີປ້ອງກັນການຕິດເຊື້ອໃຫ້ປະຊາຊົນຮັບຮູ້ຢ່າງທົ່ວເຖິງຫຼາຍກວ່າເກົ່າ

ຂ່າວລາວ