ສະຖານທູດ ສະຫະລັດຊ່ວຍເຫຼືອລ້າ 75ພັນໂດລ້າ ນໍ້າຢາກວດໂຄວິດ ແລະ ອຸປະກອນໃຫ້ແກ່ ສປປ ລາວ

ສະຖານທູດ ສະຫະລັດຊ່ວຍເຫຼືອລ້າ 75ພັນໂດລ້າ ນໍ້າຢາກວດໂຄວິດ ແລະ ອຸປະກອນໃຫ້ແກ່ ສປປ ລາວ

ທ່ານ ປອ. ປີເຕີ ເຮມ໋ອນ ເອກອັກຄະລັດຖະທູດສະຫະລັດ ປະຈຳ ສປປ ລາວ ໄດ້ມອບຊຸຸຸດນ້ຳຢາກວດເຊື້ອພະຍາດ COVID-19 ຈໍານວນ 4800 ຊຸດ ແລະ ອຸປະກອນທີ່ນຳໃຊ້ຢູ່ໃນຫ້ອງວິເຄາະ ໃຫ້ແກ່ສູນທົດລອງ ແລະລະບາດວິທະຍາແຫ່ງຊາດ. ອຸປະກອນທັງຫມົດທີ່ໄດ້ມອບໃຫ້ນີ້ ແມ່ນເປັນຊຸດທຳອິດຂອງການຊ່ວຍເຫລືອລວມທັງຫມົດໃນຈຳນວນ 9600 ຊຸດຈາກກອງທັບບົກ ປາຊີຟີກ ໂດຍຜ່ານສູນບັນຊາການກອງທັບ ສະຫະລັດ ປະຈຳພາກພື້ນອິນໂດ-ປາຊີຟິກ. ບັນດາອຸປະກອນເຫລົ່ານີ້ຈະຊ່ວຍເຂົ້າໃນວຽກງານການກວດເຊຶ້ອ ແລະຕິດຕາມພະຍາດ COVID-19 ຢູ່ພາຍໃນປະເທດຂອງ ສປປ ລາວ ເຊິ່ງມູນຄ່າລວມຂອງການຊ່ວຍເຫລືອໃນຄັ້ງນີ້ແມ່ນຫຼາຍກວ່າ 75,000 ໂດລາສະຫະລັດ. ພິທີມອບຮັບດັ່ງກ່າວແມ່ນຈັດຂຶ້ນໃນວັນທີ 6 ພະຈິກຜ່ານມາ

ທ່ານເຮມ໋ອນ ໄດ້ກ່າວວ່າ ພິທີມອບຮັບໃນມື້ນີ້ ຢູ່ທີ່ສູນທົດລອງ ແລະລະບາດວິທະຍາແຫ່ງຊາດນີ້ ແມ່ນເປັນການຊ່ວຍຄັ້ງຫຼ້າສຸດ ຈາກ ສ. ອາເມຣິກາ ເຊິ່ງສະແດງໃຫ້ເຫັນເຖິງຄວາມມຸ້ງຫມັ້ນ ທີ່ເຮັດວຽກຢ່າງຄຽງບ່າຄຽງໄຫຼ່ ໃນຂະນະທີ່ ສປປ ລາວ ຍັງສືບຕໍ່ ຮັບມືກັບ ພະຍາດ COVID-19 ພ້ອມທັງເປັນການຮ່ວມມືໄລຍະຍາວຂອງພວກເຮົາ ເພື່ອໃຫ້ເປັນຄູ່ຮ່ວມງານ ທີ່ມີຄວາມເຂັ້ມແຂງ ແລະ ເພື່ອສຸຂະພາບທີ່ດີຂອງປະຊາຊົນລາວ. “ນັບຕັ້ງແຕ່ຕົ້ນປີ 2020 ມານິ້ ເພື່ອການຕໍ່ສູຸ້ຕ້ານກັບໄພຂົ່ມຂູ່ ຈາກພະຍາດ COVID-19 ສ. ອາເມຣິກາໄດ້ໃຫ້ການຊ່ວຍເຫຼືອລ້າ ທີ່ລວມມີມູນຄ່າປະ ມານ 7,5 ລ້ານໂດລາສະຫະລັດໂດຍຜ່ານອົງການ USAID, ອົງການ CDC ແລະ ບັນດາພາກສ່ວນຕ່າງໆເພື່ອປັບປຸງຄວາມສາມາດໃນການກວດເຊີ້ອພະຍາດ ແລະປົກປ້ອງປະຊາຊົນລາວ

ການມອບຮັບຄັ້ງນີ້ ແມ່ນເປັນການສະແດງໃຫ້ເຫັນເຖິງຄວາມຫມາຍອັນສຳຄັນຂອງການສະຫນັບສະຫນູນຈາກລັດຖະບານສະຫະລັດອາເມຣິກາ ໂດຍຜ່ານອົງການຫຼຸດຜ່ອນໄພຂົ່ມຂູ່ຂອງກະຊວງປ້ອງກັນປະເທດສະຫະລັດ (DTRA) ໃຫ້ແກ່ບັນດາພາກລັດຂອງລາວ ເຂົ້າໃນວຽກງານສາທາລະ ນະສຸກແລະຄວາມປອດໄພຂອງປະຊາຊົນໃນ ສປປ ລາວ

ໃນວັນທີ 6 ຕຸລາ ທີ່ຜ່ານມາທາງສະຖານທູດ ສ. ອາເມລິກາ ກໍ່ໄດ້ມີການມອບຮັບອຸປະກອນ ທີ່ນຳໃຊ້ຢູ້ຫ້ອງທົດລອງໃຫ້ແກ່ສະຖາບັນປາດສເຕີລາວ ທັງນີ້ກໍ່ເພື່ອເປັນການນ້ຳໃຊ້ເຂົ້າໃນວຽກງານໂຄງການ ເຊິ່ງຮ່ວມມືກັນກັບກົມເສນາຮັກກະຊວງປ້ອງກັນປະເທດລວມເປັນມູນຄ່າ 172,000 ໂດ ລາສະຫະລັດ ອຸປະກອນດັ່ງກ່າວນັ້ນແມ່ນຈະເປັນປະໂຫຍດຫລາຍໃຫ້ແກ່ເຈົ້າຫນ້າທີ່ການແພດ ໃນການຊອກຫາ ແລະ ກວດເຊື້ອພະຍາດຕ່າງໆຢູ່ໃນ ສປປ ລາວ. ອົງການຫຼຸດຜ່ອນໄພຂົ່ມຂູ່ ຂອງກະຊວງປ້ອງກັນປະເທດສະຫະລັດ (DTRA) ຍັງໄດ້ຊ່ວຍເຫຼືອເຄື່ອງປັ່ນສຳລັບການວິເຄາະເລືອດ ແລະ ກ້ອງຈຸລະທັດ ທີ່ຖືກນຳໃຊເຂົ້າໃນການຊອກຄົ້ນຫາ ແລະ ການຄົ້ນຄວ້າພະຍາດທີ່ເປັນອັນ ຕະລາຍ ເປັນຕົ້ນແມ່ນພະຍາດໄຂ້ເລືອດອອກ ແລະ ໄຂ້ຍຸງ. ນອກຈາກນັ້ນກໍ່ຍັງມີຕູ້ອົບຂ້າເຊື້ອ ແລະ ຕູ້ປອດເຊື້ອທີ່ຊ່ວຍໃນການຮັກສາຄວາມສະອາດການຂ້າເຊື້ອ ແລະ ຄວາມປອດໄພຢູ່ໃນຫ້ອງທົດລອງໃນເວລາປະຕິບັດງານ

ບັນດາໂຄງການແລະການຊ່ວຍເຫລືອລ້າທີ່ໄດ້ກ່າວມານັ້ນກໍ່ລວມທັງການມອບຮັບລົດແພດພາກສະຫນາມ Ford Everest ທີ່ມີຄຸນນະພາບສູງ ໃຫ້ແກ່ກະຊວງປ້ອງກັນປະເທດ. ການຮ່ວມມືນີ້ ແມ່ນຖືວ່າເປັນອົງປະກອບສ່ວນຫນື່ງ ໃນການເປັນຄູ່ຮ່ວມງານດ້ານການແພດຂອງກອງທັບ ກໍ່ຄືອົງປະກອບທີ່ລວມຢູ່ໃນການຮ່ວມມືແບບກວມລວມລະຫວ່າງ ສະຫະລັດອາເມຣິກາ ແລະ ສປປ ລາວ

ຂ່າວລາວ