ນັບແຕ່ສ້າງຕັ້ງລະບອບໃໝ່ຈົນຮອດປະຈຸບັນ ການພັດທະນາເສດຖະກິດ-ສັງຄົມ ດີຂື້ນເທື່ອລະກ້າວ

ນັບແຕ່ສ້າງຕັ້ງລະບອບໃໝ່ຈົນຮອດປະຈຸບັນ ການພັດທະນາເສດຖະກິດ-ສັງຄົມ ດີຂື້ນເທື່ອລະກ້າວ

ນັບແຕ່ພັກເຮົາ ຢຶດອໍານາດການປົກຄອງມາໄດ້ໃນທົ່ວປະເທດ ແລະ ສ້າງຕັ້ງລະບອບໃໝ່ຂຶ້ນ, ສະພາບ ສາກົນ ແລະ ພາກພື້ນ ໄດ້ສືບຕໍ່ຜັນແປໄປຢ່າງສັບສົນ; ເວລາດຽວກັນ ປະເທດເຮົາ ຊໍ້າພັດດ້ອຍພັດທະ ນາເກີນໄປ, ພື້ນຖານວັດຖຸ, ເຕັກນິກເກືອບວ່າບໍ່ມີຫຍັງຈັກດີ້, ຜົນຮ້າຍຕາມມາຂອງສົງຄາມແມ່ນໜັກໜ່ວງຫລາຍເຕັມໄປດ້ວຍຄວາມຫຍຸ້ງຍາກສັບສົນທີ່ສຸດ ທັງຜະເຊີນໜ້າກັບກົນອຸບາຍຫລ່ຽມລາຍໃໝ່ຂອງບັນດາອິດທິກໍາລັງປໍລະປັກກໍ່ຄືພວກຄົນບໍ່ດີພາຍໃນປະເທດ, ແຕ່ພາຍໃຕ້ການນໍາພາອັນຖືກຕ້ອງ, ສະຫລາດສ່ອງໃສ ແລະ ເດັດຂາດຂອງພັກ, ປະຊາຊົນເຮົາໄດ້ເສີມຂະຫຍາຍມູນເຊື້ອຮັກຊາດ, ນໍ້າໃຈປະຕິວັດສຸມທຸກກໍາລັງວັງຊາ, ສະຕິປັນຍາຂອງຕົນເຂົ້າໃນພາລະກິດການປົກປັກຮັກສາ ແລະ ສ້າງສາປະເທດຊາດ, ຜ່ານຜ່າທຸກຄວາມຫຍຸ້ງຍາກ ແລະ ອຸປະສັກນາໆປະການ, ສາມາດຍາດໄດ້ໄຊຊະນະ ແລະ ຜົນສໍາເລັດອັນໃຫຍ່ຫລວງຫລາຍດ້ານ, ທີ່ສໍາຄັນພັກເຮົາໄດ້ເອົາໃຈໃສ່ນໍາພາແກ້ໄຂແລະ ຟື້ນຟູເສດຖະກິດ-ສັງຄົມ ( 1975-1980) ໂດຍສຸມໃສ່ແກ້ໄຂຜົນຮ້າຍຂອງສົງຄາມ ແລະ ຂອງສັງຄົມທີ່ລະບອບເກົ່າປະໄວ້ເຮັດໃຫ້ຊີວິດການເປັນຢູ່ຂອງປະຊາຊົນຄ່ອຍໆກ້າວເຂົ້າສູ່ສະພາບປົກກະຕິ ທັງໄດ້ເອົາໃຈໃສ່ຂະຫຍາຍການສຶກສາ, ລົບລ້າງຄວາມບໍ່ຮູ້ໜັງສື, ປົກປັກຮັກສາ ແລະ ເສີມຂະຫຍາຍວັດທະນະທໍາອັນດີງາມຂອງຊາດ, ຂອງເຜົ່າ: ປັບ ປຸງ ແລະ ຂະຫຍາຍຂະບວນການສິລະປະວັນນະຄະດີ, ກິລາ-ກາຍະກໍາ ຕາມທິດຂອງສັງຄົມນິຍົມ ແລະ ມີຜົນໄດ້ຮັບເປັນກ້າວໆ; ສືບຕໍ່ນໍາພາປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ I (1981-1985) ສໍາເລັດໂດຍພື້ນຖານອັນໄດ້ປະກອບສ່ວນສ້າງປະຖົມປັດໄຈ ແລະ ເງື່ອນໄຂສະດວກໃຫ້ແກ່ການສືບຕໍ່ກ້າວຂຶ້ນຂອງປະເທດຊາດ; ໃນໄລຍະຕົ້ນແຫ່ງການປົກປັກຮັກສາ ແລະ ສ້າງສາປະເທດຊາດ, ພັກເຮົາໄດ້ຖືເປັນສໍາຄັນ ແລະ ເອົາໃຈໃສ່ຕໍ່ວຽກງານກໍ່ສ້າງພັກ ໂດຍໄດ້ວາງໜ້າທີ່ ແລະ ທິດນໍາຂອງການກໍ່ ສ້າງພັກໃນໄລຍະໃໝ່ອອກ: “ການກໍ່ສ້າງພັກຕ້ອງເລີ່ມຈາກໜ້າທີ່ການເມືອງ ແລະ ແນໃສ່ເຮັດສໍາເລັດໜ້າທີ່ການເມືອງຂອງພັກ; ກໍ່ສ້າງພັກໃຫ້ໜັກແໜ້ນເຂັ້ມແຂງ ທັງ 3 ດ້ານຄືດ້ານການເມືອງ, ແນວຄິດການ ຈັດຕັ້ງ, ກໍ່ສ້າງພັກຕິດແໜ້ນກັບການກໍ່ສ້າງອໍານາດການປົກຄອງ ແລະ ຂະບວນການມະຫາຊົນ”.

ເລີ່ມຈາກສະພາບຄວາມເປັນຈິງຂອງປະເທດຊາດແຕ່ປີ 1975 ເປັນຕົ້ນມາ ແລະ ດ້ວຍຄວາມສະດຸ້ ໄວຂອງພັກ, ກອງປະຊຸມໃຫຍ່ຄັ້ງທີ IV ຂອງພັກ ( ປີ 1986 ) ພັກໄດ້ກໍານົດແນວທາງປ່ຽນແປງໃໝ່ ໂດຍເລີ່ມຈາກການປ່ຽນແປງເສດຖະກິດ ເປັນຕົ້ນການປ່ຽນແປງໃມ່ນະໂຍບາຍເສດຖະກິດ; ຮັບຮູ້ແລະ ນໍາໃຊ້ເສດຖະກິດພາກສ່ວນ, ເສດຖະກິດຕະຫລາດ, ເປີດກວ້າງການພົວພັນຮ່ວມມືກັບຕ່າງປະເທດບົນພື້ນຖານຕ່າງຝ່າຍຕ່າງມີຜົນປະໂຫຍດ. ຫັນເສດຖະກິດທໍາມະຊາດ ແລະ ເຄິ່ງທໍາມະຊາດ, ເພິ່ງຕົນເອງກຸ້ມຕົນ ເອງໄປສູ່ເສດຖະກິດສິນຄ້າ. ກອງປະຊຸມໃຫຍ່ຄັ້ງທີ V, VI, VII, VIII, IX, X ແລະ ຄັ້ງທີ XI ຂອງພັກໄດ້ສືບຕໍ່ນໍາພາຈັດຕັ້ງຜັນຂະຫຍາຍແນວທາງປ່ຽນແປງໃໝ່ ໂດຍການກວດກາ, ສະຫລຸບຕີລາຄາ, ຖອດຖອນບົດຮຽນຈາກພຶດຕິກໍາຕົວຈິງແຕ່ລະໄລຍະຢ່າງເປັນລະບົບ, ຕໍ່ເນື່ອງທັງປັບປຸງຍົກລະດັບເປັນກ້າວໆເຮັດໃຫ້ແນວທາງປ່ຽນແປງໃໝ່ຮອບດ້ານມີຫລັກການຂອງພັກນັບມື້ນັບບໍລິບູນເລື້ອຍໆ.

ການພັດທະນາເສດຖະກິດປະສົບຜົນສໍາເລັດ ແລະ ກ້າວໜ້າຂະຫຍາຍຕົວຕໍ່ເນື່ອງ, ໝັ້ນທ່ຽງ, ຍອດຜະ ລິດຕະພັນພາຍໃນເພີ່ມຂຶ້ນແຕ່ລະໄລຍະ, ລາຍຮັບຂອງປະຊາຊົນກໍເພີ່ມຂຶ້ນ ເຖິງວ່າທົ່ວໂລກຜະເຊີນການລະບາດຂອງເຊື້ອພະຍາດໂຄວິດ-19 ເຮັດໃຫ້ສະພາບເສດຖະກິດການສາກົນທີ່ຜັນແປຕະຫລອດເວລາ ແຕ່ບັນດາໂຄງການລົງທຶນຂະໜາດໃຫຍ່ໃນຫລາຍຂົງເຂດຢູ່ປະເທດເຮົາສືບຕໍ່ໄດ້ຮັບການຈັດຕັ້ງປະຕິບັດ ແລະກາຍເປັນແຮງຊຸກດັນໃຫ້ແກ່ການພັດທະນາ, ການລົງທຶນຂອງເອກະຊົນພາຍໃນ ແລະ ຕ່າງປະເທດນັບມື້ຂະຫຍາຍຕົວໃນທຸກຂົງເຂດເສດຖະກິດ-ສັງຄົມ, ທ່າແຮງບົ່ມຊ້ອນທາງຊັບພະຍາກອນທໍາມະຊາດ ໄດ້ຮັບການຂຸດຄົ້ນຕາມທິດຍືນຍົງ ແລະ ສາມາດສ້າງຖານລາຍຮັບໃຫ້ແກ່ງົບປະມານ, ການເມືອງມີສະຖຽນລະໜັກແໜ້ນ, ສັງຄົມ ມີຄວາມສະຫງົບປອດໄພ ໂດຍພື້ນຖານ, ຄວາມເປັນເອກະລາດ, ອໍານາດອະທິປະໄຕ, ຜືນແຜ່ນດິນອັນຄົບຖ້ວນ ແລະ ໝາກຜົນຂອງການປະຕິວັດໄດ້ຮັບການປົກປ້ອງຢ່າງເຂັ້ມແຂງຍ້ອນລະບົບ ການເມືອງຢູ່ແຕ່ລະຂັ້ນໄດ້ຮັບການປັບປຸງຢ່າງຕໍ່ເນື່ອງ, ປະຊາຊົນບັນດາເຜົ່າ ນັບທັງພີ່ນ້ອງຊາວລາວຜູ້ມີນໍ້າໃຈຮັກເຊື້ອແພງຊາດທີ່ດໍາລົງຊີວິດ, ທໍາມາຫາກິນຢູ່ຕ່າງປະເທດໄດ້ເສີມຂະຫຍາຍມູນເຊື້ອແຫ່ງຄວາມສາມັກ ຄີປອງດອງ ແລະ ຄວາມເອື້ອເຟື້ອເພື່ອແຜ່ຊ່ວຍເຫລືອເຊິ່ງກັນ ແລະ ກັນຢ່າງແຂງແຮງ, ໄດ້ປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານສືບຕໍ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ; ກໍາລັງປ້ອງກັ ຊາດ-ປ້ອງກັນຄວາມສະຫງົບໄດ້ຮັບການກໍ່ສ້າງ, ປັບປຸງໜັກແໜ້ນ, ເຂັ້ມແຂງ, ມີຄວາມຈົງຮັກພັກດີຕໍ່ພັກ ແລະ ປະເທດຊາດ, ຄວາມສາມາດການປະຕິບັດໜ້າທີ່ໄດ້ຮັບການຍົກລະດັບສູງຂຶ້ນ; ກາຍເປັນກໍາລັງປະຈັນບານຕ້ານ, ສະກັດກັ້ນ ແລະ ທັບມ້າງກົນອຸບາຍມ້າງເພທໍາລາຍຂອງອິດທິກໍາ ລັງປໍລະປັກ ແລະ ການກໍ່ຄວາມບໍ່ສະຫງົບ, ອາຊະຍາກໍາຕ່າງໆຂອງພວກຄົນບໍ່ດີ.

ປະເທດເທດເຮົາ ບັນລຸໄດ້ດັດຊະນີການພັດທະນາຊັບພະຍາກອນມະນຸດຂອງບັນດາປະເທດທີ່ພົ້ນຈາກສະ ຖານະພາບດ້ອຍພັດທະນາ; ການແກ້ໄຂຄວາມທຸກຍາກຂອງປະຊາຊົນ ຄືບໜ້າຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງຍົກລະດັບຂຶ້ນຢ່າງຈະແຈ້ງ. ຄຽງຄູ່ກັບການປັບປຸງ, ຍົກລະດັບຄຸນນະພາບການຈັດຕັ້ງ ແລະ ການເຄື່ອນໄຫວຄຽງຄູ່ກັບການສ້າງ, ປັບປຸງກົດໝາຍ ແລະ ບັນດານິຕິກໍາໃຫ້ເປັນລະບົບຮັດກຸມກວ່າເກົ່າສ້າງພື້ນຖານອັນເຂັ້ມແຂງໃຫ້ແກ່ການຫັນໄປສູ່ການຄຸ້ມຄອງລັດຕາມກົດໝາຍ ເຊິ່ງສອດຄ່ອງກັບເປົ້າໝາຍການສ້າງລັດປະຊາທິ ປະໄຕປະຊາຊົນທີ່ປົກຄອງດ້ວຍກົດໝາຍ. ການພົວພັນຮ່ວມມືກັບບັນດາປະເທດເພື່ອນມິດຍຸດທະສາດຂະຫຍາຍຕົວສູ່ລະດັບສູງໃໝ່, ໃນນີ້ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ສືບຕໍ່ຂະຫຍາຍຕົວເຂົ້າສູ່ລວງເລິກ, ການພົວພັນອັນເປັນມູນເຊື້ອ ແລະ ຄູ່ຮ່ວມຍຸດທະສາດ ລາວ-ຈີນ ໄດ້ຍົກລະດັບຂຶ້ນເປັນຄູ່ຮ່ວມຊະຕາກໍາ, ການພົວພັນຮ່ວມມື-ຊ່ວຍເຫລືອເຊິ່ງກັນ ແລະ ກັນ ທີ່ເປັນມູນເຊື້ອກັບບັນດາປະເທດສັງຄົມນິຍົມອ້າຍນ້ອງໄດ້ຮັບການເສີມຂະຫຍາຍ ແລະ ເພີ່ມທະວີຂຶ້ນຢ່າງບໍ່ຢຸດຢັ້ງນັບທັງການພົວພັນຫລາຍດ້ານກັບສະຫະພັນລັດເຊຍ.

ຜົນສໍາເລັດທີ່ຍາດໄດ້ຢ່າງຕໍ່ເນື່ອງໃນພາລະກິດແຫ່ງການປົກປັກຮັກສາ ແລະ ພັດທະນາປະເທດຊາດ ໄດ້ເຮັດໃຫ້ໂສມໜ້າຂອງປະເທດເຮົາ ປ່ຽນແປງໃຫຍ່ຫລວງຮອບດ້ານ ເຊິ່ງໄດ້ກາຍເປັນພື້ນຖານອັນໜັກແໜ້ນ ທີ່ຮັບປະກັນໃຫ້ປະເທດຊາດ ແລະ ລະບອບໃໝ່ຂອງພວກເຮົາຍືນຍົງຄົງຕົວ, ສາມາດຜ່ານຜ່າອຸປະສັກ ສິ່ງ ທ້າທາຍທົດສອບຕ່າງໆ ແລະ ສືບຕໍ່ກ້າວຂຶ້ນຕາມເສັ້ນທາງທີ່ພັກວາງອອກ. ພັກເຮົາ ເຂົ້າໃຈເລິກເຊິ່ງບັນ ຫາຕ່າງໆ ທີ່ພວມປະເຊີນ, ຄົ້ນຫາທາງອອກ ແລະ ວາງບັນດາມາດຕະການອັນຈໍາເປັນ ເພື່ອແກ້ໄຂບັນຫາດັ່ງກ່າວ ທັງສະເພາະໜ້າ ແລະ ຍາວນານ; ປະຊາຊົນບັນດາເຜົ່າ ເຊື່ອໝັ້ນ, ສະໜັບສະໜູນ ແລະ ສືບຕໍ່ປົກປັກຮັກສາພັກ ແລະ ລະບອບໃໝ່; ປະເທດເພື່ອນມິດທັງຢູ່ໃກ້ ແລະ ໄກ ເຊື່ອໝັ້ນ ແລະ ສືບຕໍ່ສະໜັບສະໜູນຊ່ວຍເຫລືອອັນຈໍາເປັນໃຫ້ແກ່ປະເທດເຮົາ ເຊິ່ງໄດ້ປະກອບສ່ວນສໍາຄັນເຮັດໃຫ້ພວກເຮົາຜ່ານຜ່າໄດ້ຄວາມຫຍຸ້ງຍາກຕ່າງໆ ແລະ ປະສົບຜົນຜົນສໍາເລັດ.

ຂ່າວລາວ