ສະຫລອງປີໃໝ່ລາວ ດ້ວຍຈິດໃຈປະຢັດ ໃຫ້ຖືກຕ້ອງ ປະເພນີ ຫ້າມນຸ່ງເຄື່ອງບໍ່ສຸພາບ ຕາມວັດວາອາຮາມ

ສະຫລອງປີໃໝ່ລາວ ດ້ວຍຈິດໃຈປະຢັດ ໃຫ້ຖືກຕ້ອງ ປະເພນີ ຫ້າມນຸ່ງເຄື່ອງບໍ່ສຸພາບ ຕາມວັດວາອາຮາມ

ໃນວັນທີ 4 ເມສາ 2022 ນີ້, ຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໄດ້ອອກແຈ້ງການ ສະບັບເລກທີ 115/ຖວທ, ນະຄອນຫລວງວຽງຈັນ, ລົງວັນທີ 4 ເມສາ 2022, ເຖິງບັນດາຫົວໜ້າກົມ, ສະຖາບັນ, ໂຮງຮຽນ, ກອງວິຊາການ ແລະ ລັດວິສາຫະກິດອ້ອມຂ້າງກະຊວງ ຖວທ ໃຫ້ສືບຕໍ່ປະຕິບັດມາດຕະການປ້ອງ, ຄວບຄຸມ ແລະ ສະກັດກັ້ນ ການລະບາດຂອງພະຍາດໂຄວິດ-19 ແຕ່ວັນທີ 5-30 ເມສາ 2022. ເນື່ອງຈາກ ໃນປັດຈຸບັນ ເຫັນວ່າການແພລະບາດຂອງພະຍາດນີ້ ຍັງສືບ ຕໍ່ແຜ່ລະບາດເປັນວົງກວ້າງໃນຂອບເຂດທົ່ວປະເທດ.

ດັ່ງນັ້ນ, ຈຶ່ງໄດ້ແຈ້ງການແນະນຳໃຫ້ປະຕິບັດຕະ ຫລອດໄລຍະດັ່ງກ່າວ ໂດຍສະເພາະການສະຫລອງບຸນປີໃໝ່ລາວ ພສ 2565 ຕ້ອງເຊີດຊູນ້ຳໃຈປະຢັດມັດທະຍັດ, ມີບັນຍາກາດລຽບງ່າຍ, ຖືກຕ້ອງຕາມຮີດຄອງປະເພນີ ແລະ ຂະນົບທຳນຽມອັນດີງາມຂອງຊາດລາວ ເຊັ່ນ: ການສະກາລະບູຊາ, ສົງນ້ຳພຣະ ແລະ ບາສີສູ່ຂວັນພາຍໃນຄອບຄົວ.

ແນວໃດກໍຕາມ ກະຊວງ ຖວທ ຍັງໄດ້ອອກຂໍ້ຫ້າມ ເຊັ່ນ: ຫ້າມຈັດກິດຈະກຳໃດໆ ທີ່ມີຄວາມສ່ຽງຕໍ່ການແຜ່ລະບາດຂອງພະຍາດໂຄວິດ-19 ແລະ ຕິດພັນກັບກິດຈະກໍາຕ່າງໆ ທີ່ມີຊຸມຊົນເຂົ້າຮ່ວມຢ່າງໜາແໜ້ນເຊັ່ນ: ການຈັດງານຄອນເສີດ, ການເສບດົນຕີ, ການສະແດງສິລະປະ, ສະຖານທີ່ທ່ອງທ່ຽວ ແລະ ແຄມນ້ຳຕ່າງໆ; ຫ້າມນຸ່ງເຄື່ອງໂປ້ເປືອຍ ຫລື ເຄື່ອງບໍ່ສຸພາບ ແລະ ປະພຶດສິ່ງລາມົກອະນາຈານຢູ່ຕາມວັດວາອາຮາມ ແລະ ສະຖານທີ່ສາທາລະນະຕ່າງໆ; ພ້ອມທັງສືບຕໍ່ປິດການໃຫ້ບໍລິການຮ້ານຄາຣາໂອເກະ ແລະ ສະຖານບັນເທີງ ຢ່າງເດັດຂາດ; ຫ້າມຈັດກອງປະຊຸມ, ສຳມະນາ, ຝຶກອົບຮົມຖ້າບໍ່ຈຳເປັນແມ່ນໃຫ້ໂຈະ ຫລື ເລື່ອນໄປກ່ອນ, ໃນກໍລະນີຈຳເປັນກໍ່ສາມາດຈັດໄດ້ ແຕ່ຕ້ອງຈຳກັດຜູ້ເຂົ້າຮ່ວມບໍ່ເກີນ 50 ຄົນ ແລະ ໃຫ້ປະຕິບັດມາດຕະການປ້ອງກັນໂຄວິດ-19 ຢ່າງເຂັ້ມງວດ.

ສຳລັບການປະຈຳການຂອງບັນດາກົມກອງ, ພະແນກ ຖວທ ໃນມື້ພັກບຸນປີໃໝ່ລາວ ຖ້າບ່ອນໃດມີຄວາມຈຳເປັນໃນໜ້າວຽກ ໃຫ້ແຕ່ງຕັ້ງປະຈຳການ ເປັນຕົ້ນແມ່ນບັນດາສື່ມວນຊົນ ນອກຈາກມື້ພັກບຸນປີໃໝ່ລາວແລ້ວແມ່ນໃຫ້ປະຈຳການປົກກະຕິ ແຕ່ຖ້າກໍລະນີຢູ່ບ່ອນໃດມີການຕິດເຊື້ອພະຍາດໂຄວິດ-19 ຫລື ມີຄວາມແອອັດມີຄວາມສ່ຽງຕໍ່ການແຜ່ເຊື້ອ ແມ່ນມອບໃຫ້ຄະນະຮັບຜິດຊອບແຕ່ລະບ່ອນ ເປັນຜູ້ພິຈາລະ ນາອາດຜັດປ່ຽນກັນມາປະຈຳການກໍ່ໄດ້, ສ່ວນຜູ້ທີ່ບໍ່ສາມາດມາປະຈຳການແມ່ນໃຫ້ເຮັດວຽກຢູ່ເຮືອນ ຜ່ານທາງເອເລັກໂຕຣນິກ. ມອບໃຫ້ບັນດາກົມກອງ ແລະ ພະແນກ ຖວທ ປະສານສົມທົບກັບພາກສ່ວນທີ່ກ່ຽວຂ້ອງຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ, ສ່ວນມາດຕະການອື່ນໆແມ່ນໃຫ້ປະຕິບັດຕາມແຈ້ງການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ສະກັດກັ້ນການລະບາດໂຄວິດ-19 ຂັ້ນສູນກາງ ແລະ ທ້ອງຖິ່ນຂອງຕົນວາງອອກຢ່າງເຂັ້ມງວດ.

ຂ່າວລາວ