ຜູ້ຮັບສະໝັກເລືອກຕັ້ງ ສສຊ, ສສຂ ເຂດ10 ລົງຫາສຽງຢູ່ເມືອງຊະນະຄາມ

ຜູ້ຮັບສະໝັກເລືອກຕັ້ງ ສສຊ, ສສຂ ເຂດ10 ລົງຫາສຽງຢູ່ເມືອງຊະນະຄາມ

(ສພຊ) ລະຫວ່າງວັນທີ 11-12 ກຸມພາ 2021 ທີ່ສະໂມສອນເມືອງຊະນະຄາມ ແຂວງວຽງຈັນ ບັນດາຜູ້ຮັບສະໝັກເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ປະຈໍາເຂດເລືອກຕັ້ງທີ 10 ແຂວງວຽງຈັນ ແລະ ຜູ້ຮັບສະໝັກເລືອກຕັ້ງສະມາຊິກສະພາປະຊາຊົນແຂວງວຽງຈັນ (ສສຂ) ຊຸດທີ II ປະຈໍາເຂດເລືອກຕັ້ງເມືອງຊະນະຄາມ ລົງພົບປະສະເໜີຕົວຕໍ່ຜູ້ທີ່ມີສິດປ່ອນບັດເລືອກຕັ້ງ.

ໃຫ້ກຽດຕ້ອນ ຮັບຂອງຄະນະນໍາ ຄະນະພັກເມືອງຊະນະຄາມ, ມີບັນດາທ່ານຫົວໜ້າຫ້ອງການອ້ອມຂ້າງເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ນາຍບ້ານ ແລະ ພໍ່ແມ່ປະຊາຊົນ 4 ບ້ານທີ່ຖືກເຊີນເຂົ້າ ຮ່ວມ. ໃນພິທີພາຍຫຼັງຄະນະຮັບຜິດຊອບເລືອກຕັ້ງຂັ້ນແຂວງ ໄດ້ຂຶ້ນກ່າວຈຸດປະສົງສະເໜີຜູ້ເຂົ້າຮ່ວມ ແລະ ຍົກໃຫ້ເຫັນເຖິງຄວາມໝາຍຄວາມສໍາຄັນຂອງສະພາແຫ່ງຊາດ, ສະພາປະຊາຊົນຂັ້ນແຂວງ ກໍຄືພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ຂັ້ນແຂວງ ໃນການເປັນຕົວແທນຂອງປະຊາຊົນບັນດາເຜົ່າ, ເປັນເສນາທິການໃຫ້ອົງການບໍລິຫານລັດໃນ ແຕ່ລະຂັ້ນ ແລະ ເປັນໃຈກາງປະສານສົມທົບນໍາເອົາຄວາມມຸ່ງມາດປາຖະໜາຂອງປະຊາຊົນບັນດາເຜົ່າ ທຸກຊັ້ນຄົນເພື່ອນໍາສະເໜີໃນກອງປະຊຸມສະພາຄົ້ນຄວ້າພິຈາລະນາ, ປະກອບສ່ວນເຮັດໃຫ້ການວາງແນວ ທາງຂອງພັກ, ແຜນພັດທະນາເສດຖະກິດ-ສັງຄົມ ຂອງລັດຖືກຕ້ອງສອດຄ່ອງກັບການຂະຫຍາຍຕົວຂອງ ເສດຖະກິດ-ສັງຄົມ ເປັນສ່ວນສໍາຄັນໃນການບູລະນະລະບອບປະຊາທິປະໄຕ ຕາມແນວທາງປ່ຽນແປງ ໃໝ່ຂອງພັກ ສ້າງປະຖົມປັດໄຈຮອບດ້ານເຂົ້າສູ່ຄາດໝາຍສັງຄົມນິຍົມໃນຕໍ່ໜ້າ.

ການນໍາສະເໜີຕົວແນະນໍາຕົນເອງ ເລີ່ມຈາກນ້ຳເບີ 1 ທ່ານ ຈະເລີນ ເຢຍປາວເຮີ; ນ້ຳເບີ 3 ທ່ານ ລຳໄມ ກູດລາວົງ; ນ້ຳເບີ 5 ທ່ານ ບົວຄຳ ຫຼວງອາໄພ; ນ້ຳເບີ 7 ທ່ານ ນາງ ຮັ່ງລີ ແກ້ວວິໄລສັກ; ນ້ຳເບີ 9 ທ່ານ ນາງ ມະໄລສີ ທຳມະໂຄດ; ນໍ້າເບີ 11 ທ່ານ ພຸດທະສັກ ແກ້ວວິໄຊ ແລະ ນ້ຳເບີ 13 ທ່ານ ດຣ ອິນປອນ ມະນີແສງ ພ້ອມດ້ວຍຜູ້ສະໝັກເປັນສະມາຊິກສະພາປະຊາຊົນ ແຂວງປະຈໍາເຂດເລືອກຕັ້ງເມືອງຊະນະຄາມ 5 ທ່ານ ສ່ວນນໍ້າເບີອື່ນໆ ແມ່ນຕາງໜ້າຄະນະສະເໜີ ຊີວະປະຫວັດແທນ ແລະ ຈະໄດ້ເຄື່ອນໄຫວສະເໜີຕົວຜູ້ມີສິດປ່ອນບັດເລືອກຕັ້ງ ບ້ານນໍ້າກວນ, ບ້ານ ໂນນສະຫວັນ, ບ້ານນາປາຝາ, ບ້ານນາພາງ ເມືອງຊະນະຄາມ ແຂວງວຽງຈັນ.

(ຂ່າວ – ພາບ: ສອນສັກ ວັນວິໄຊ)

ຂ່າວລາວ