ຜູ້ສະໝັກຮັບເລືອກຕັ້ງ ສສຊ ປະຈໍາເຂດ12 ສະແດງຄວາມຮູ້ສຶກໃນໂອກາດພົບປະ ປະຊາຊົນ.

ຜູ້ສະໝັກຮັບເລືອກຕັ້ງ ສສຊ ປະຈໍາເຂດ12 ສະແດງຄວາມຮູ້ສຶກໃນໂອກາດພົບປະ ປະຊາຊົນ.

ທ່ານ ຄຳໃບ ດຳລັດ ຮອງປະທານສູນກາງແນວລາວສ້າງຊາດ ຜູ້ສະໝັກຮັບເລືອກຕັ້ງນໍ້າເບີ 1 ສະ​ມາ​ຊິກ​ສະ​ພາ​ແຫ່ງ​ຊາດ (ສສຊ) ປະຈໍ​າເຂດເລືອກຕັ້ງທີ 12 ແຂວງຄຳມ່ວນ ໄດ້ກ່າວສະແດງຄວາມ ຮູ້ສຶກຜ່ານສື່ມວນຊົນຂອງແຂວງໃນໂອກາດທີ່ເຄື່ອນໄຫວພົບປະປະຊາຊົນກໍຄືຜູ້ມີສິດປ່ອນບັດເລືອກຕັ້ງ ດັ່ງທ່ານ ໄດ້ກ່າວວ່າ : ສຳລັບຄະນະພວກເຮົາມາແຕ່ສູນກາງມີ 4 ທ່ານ, ທ້ອງຖິ່ນ 8 ທ່ານ ລວມເປັນ 12 ທ່ານ.

ເລີ່ມເຄື່ອນໄຫວແຕ່ວັນທີ 8 ກຸມພາ ເປັນຕົ້ນມາ ໂດຍເລີ່ມຈາກການເຄື່ອນໄຫວເຮັດວຽກ ຢູ່ອ້ອມຂ້າງແຂວງ ຈາກນັ້ນນັບແຕ່ວັນທີ 10 ກຸມພາແມ່ນໄດ້ເຄື່ອນໄຫວຢູ່ເມືອງ ຜ່ານການຈັດຕັ້ງປະຕິບັດ ລົງແຕ່ລະບ່ອນກໍເຫັນໄດ້ວ່າປະຊາຊົນມີຄວາມດີອົກດີໃຈໃຫ້ການຕ້ອນຮັບຢ່າງອົບອຸ່ນດ້ວຍຄວາມສາມັກຄີ ຮັກແພງ, ດ້ວຍຄວາມຈິງໃຈ ຊຶ່ງບັນດາຜູ້ສະໝັກຮັບເລືອກຕັ້ງພວກເຮົາກໍໄດ້ເວົ້າແບບສະໜິດສະໜົມ ກັບ ປະຊາຊົນ ແລະ ຍົກໃຫ້ເຫັນເຖິງຄວາມໝາຍຄວາມສຳຄັນຂອງການເລືອກຕັ້ງ, ບົດບາດຂອງສະພາ, ໜ້າ ທີ່ຂອງ ສສຊ, ສສຂ ມີຄືແນວໃດ ປະຊາຊົນໄດ້ມີຄວາມຮັບຮູ້ເຂົ້າອົກເຂົ້າໃຈ ແລະ ກໍມີຄວາມເບີກບານ ມ່ວນຊື່ນ,

ສະແດງອອກໃນການລົງເຄື່ອນໄຫວແຕ່ລະບ່ອນ, ແຕ່ລະຈຸດ, ກໍໄດ້ມີຄວາມອົບອຸ່ນແບບ ຄອບຄົວດຽວກັນ, ຖ້າຂ້າພະເຈົ້າພ້ອມຄະນະໄດ້ຮັບການເລືອກເປັນ ສສຊ ປະຈໍາແຂວງຄໍາມ່ວນແລ້ວ ຂ້າພະເຈົ້າພ້ອມຄະນະຈະນຳເອົາເນື້ອໃນຈິດໃຈ, ຄໍາຄິດຄໍາເຫັນຂອງປະຊາຊົນ ເພື່ອນໍາສະເໜີຕໍ່ກອງປະ ຊຸມ ເພື່ອພິຈາລະນາຕາມເຫດຕາມຜົນ, ຕາມລະບຽບກົດໝາຍ ແລະ ຈະນໍາເອົາມະຕິກອງປະຊຸມສະພາ ແຕ່ລະຄັ້ງ, ແນວທາງນະໂຍບາຍຂອງພັກ – ລັດ ຕິດພັນກັບຂະບວນການຂອງປະຊາຊົນບັນດາເຜົ່າ ເຮັດໃຫ້ປະຊາຊົນມີຄວາມຮັບຮູ້ເຂົ້າໃຈ ປະຊາຊົນມີຄວາມຕື່ນຕົວໃນການຈັດຕັ້ງປະຕິບັດ.

ນອກຈາກນີ້ ແຕ່ລະໄລຍະຄະນະຜູ້ແທນຈະໄດ້ລົງໃກ້ຊິດຕິດແທດກັບປະຊາຊົນບັນດາເຜົ່າ ໂດຍສະເພາະປະຊາຊົນເຂດ ຊົນນະບົດ ເຂດພູດອຍ ເພື່ອເຫັນໄດ້ສະພາບຄວາມເປັນຈິງຂອງປະຊາຊົນເປັນແນວໃດ ເພື່ອຈະໄດ້ມີ ການຄົ້ນຄວ້ານຳສະເໜີຕໍ່ຂັ້ນເທິງກໍຄືການພັດທະນາເສດຖະກິດ ຫຼື ອື່ນໆ ເພາະນີ້ເປັນວຽກຂອງພວກ ເຮົາຈະໄດ້ລົງໃກ້ຊິດຕິດແທດກັບປະຊາຊົນ. ຂ່າວ: ມະນີວັນ

ຂ່າວລາວ