ລາຍງານສະຖານະການຂອງ ປະເທດມຽນມາ ພຽງມື້ດຽວມີຜູ້ເສຍຊີວີດກວ່າ 100 ຄົນ

ລາຍງານສະຖານະການຂອງ ປະເທດມຽນມາ ພຽງມື້ດຽວມີຜູ້ເສຍຊີວີດກວ່າ 100 ຄົນ

ລາຍງານ 28 ມີນາ 2021, ສື່ທ້ອງຖິ່ນຫຼາຍແຫ່ງຂອງມຽນມາລາຍງານຈຳນວນຜູ້ເສຍຊີວິດ ຈາກການປາບປາມການໂຮມຊຸມນຸມປະທ້ວງຕໍ່ຕ້ານລັດຖະບານທະຫານມຽນມາ ເມື່ອວັນເສົາ (27 ມີນາ 2021) ທີ່ຜ່ານມາ ເຊິ່ງກົງກັບວັນຄົບຮອບ 76 ປີ ຂອງການສ້າງຕັ້ງກອງທັບມຽນມາ ວ່າມີຈຳນວນຜູ້ເສຍຊີວິດບໍ່ຕ່ຳກວ່າ 100 ຄົນ ໂດຍສຳນັກຂ່າວ Myanmar Now ລາຍງານວ່າມີຜູ້ເສຍຊີວິດ 114 ຄົນ.

ໃນດ້ານຂອງສຳນັກຂ່າວ The Irrawaddy ລາຍງານວ່າ: ມີຜູ້ເສຍຊີວິດ 102 ຄົນ ໃນນັ້ນແມ່ນລວມມີເດັກນ້ອຍ 4 ຄົນ ອາຍຸລະຫວ່າງ 5-15 ປີ ຈາກປະຕິບັດການສະຫຼາຍການໂຮມຊຸມນຸມຂອງກອງກຳລັງປະກອບອາວຸດທັງທະຫານ ແລະ ຕຳຫຼວດ ທີ່ເກີດຂຶ້ນຢູ່ 44 ເມືອງ ໃນ 10 ລັດ ຈາກທັງໝົດ 14 ລັດທົ່ວປະເທດ, ໂດຍເຂດທີ່ມີຄວາມຮຸນແຮງທີ່ສຸດຄືນະຄອນຢ່າງກຸ້ງ ແລະ ເມືອງມັນດະເລ.

ຈາກເຫດການທີ່ເກີດຂຶ້ນໃນວັນດັ່ງກ່າວ ຖືເປັນວັນນອງເລືອດທີ່ສຸດຄັ້ງໃໝ່ ນັບຕັ້ງແຕ່ກອງທັບມຽນມາກໍ່ການລັດຖະປະຫານ ເມື່ອວັນທີ 1 ກຸມພາ 2021​ ທີ່ຜ່ານມາ ແລະ ເຮັດໃຫ້ຈຳນວນຜູ້ເສຍຊີວິດສະສົມເພີ່ມເປັນ 429 ຄົນ, ມີຜູ້ໄດ້ຮັບບາດເຈັບອີກເປັນຈຳນວນຫຼາຍ ແລະ ມີຜູ້ຖືກຈັບກຸມຫຼາຍກວ່າ 3,000 ຄົນ ລວມເຖິງທ່ານ ນາງ ອອງ ຊານ ຊູຈີ ແລະ ທ່ານ ວິນ ມິນ ອະດີດປະທານປະເທດມຽນມາ.

ໃນດ້ານຂອງສະຖານເອກອັກຄະລັດຖະທູດ ສ.ອາເມຣິກາ ປະຈຳນະຄອນຢ່າງກຸ້ງ ອອກຖະແຫຼງການປະນາມກອງທັບມຽນມາທີ່ເຂັ່ນຂ້າປະຊາຊົນ ເຊິ່ງຖືເປັນການຜິດຕໍ່ຄຳໝັ້ນສັນຍາທີ່ວ່າ ທະຫານຈະປົກປ້ອງປະຊາຊົນ ແລະ ສະແດງຄວາມເປັນຫ່ວງຕໍ່ເຫດການຄົນຮ້າຍຍິງປືນຫຼາຍນັດ ສ້າງຄວາມເສຍຫາຍໃຫ້ກັບແວ່ນແກ້ວປ່ອງຢ້ຽມ ຂອງສູນວັດທະນະທຳອາເມຣິກາ ໃນນະຄອນຢ່າງກຸ້ງ ໂຊກດີທີ່ບໍ່ມີຜູ້ເສຍຊີວິດ ແລະ ໄດ້ຮັບບາດເຈັບຈາກເຫດການນີ້.

ຫຼ້າສຸດ, ສະຖານເອກອັກຄະລັດຖະທູດ ສ.ອາເມຣິກາ ປະຈຳນະຄອນຢ່າງກຸ້ງໄດ້ເຜີຍແຜ່ຖະແຫຼງການຮ່ວມຂອງຜູ້ນຳກອງທັບ 12 ປະເທດປະກອບດ້ວຍ: ສ.ອາເມຣິກາ, ອົດສະຕຣາລີ, ການາດາ, ດານມາກ, ເຢຍລະມັນ, ເກຣັກ, ອິຕາລີ, ຍີ່ປຸ່ນ, ໂຮນລັງ, ນິວຊີແລນ, ເກົາຫຼີໃຕ້ ແລະ ອັງກິດ.

ຖະແຫຼງການຂອງຜູ້ນຳກອງທັບ 12 ປະເທດລະບຸວ່າ: ພວກເຮົາຂໍກ່າວປະນາມການໃຊ້ກຳລັງຄວາມຮຸນແຮງຕໍ່ປະຊາຊົນທີ່ບໍ່ມີອາວຸດໂດຍກອງທັບມຽນມາ ແລະ ໜ່ວຍງານດ້ານຄວາມໝັ້ນຄົງທີ່ກ່ຽວຂ້ອງ, ທະຫານມືອາຊີບຕ້ອງປະຕິບັດໜ້າທີ່ໃຫ້ເປັນໄປຕາມມາດຕະຖານສາກົນ ໂດຍມີໜ້າທີ່ປົກປ້ອງປະຊາຊົນ ບໍ່ແມ່ນການທຳຮ້າຍປະຊາຊົນ.

ນອກຈາກນີ້, ຖະແຫຼງການຍັງໄດ້ຮຽກຮ້ອງໃຫ້ກອງກຳລັງປະກອບອາວຸດມຽນມາ ຢຸດຕິການໃຊ້ຄວາມຮຸນແຮງຕໍ່ປະຊາຊົນ ພ້ອມທັງຮຽກຮ້ອງໃຫ້ຟື້ນຟູຄວາມໜ້າເຄົາລົບ ແລະ ຄວາມໜ້າເຊື່ອຖືກັບຄືນຈາກປະຊາຊົນມຽນມາ ທີ່ສູນເສຍໄປເພາະກະທຳດັ່ງກ່າວ.

ຂ່າວຕ່າງປະເທດ