ເຖີງບໍ່ມີແຂນຂາ…ແຕ່ສາມາດເປັນພໍ່ທີດີໄດ້ ມີຄວາມຮັກທີ່ອົບອຸ່ນໃຫ້ກັບຄອບຄົວ

ເຖີງບໍ່ມີແຂນຂາ…ແຕ່ສາມາດເປັນພໍ່ທີດີໄດ້ ມີຄວາມຮັກທີ່ອົບອຸ່ນໃຫ້ກັບຄອບຄົວ

ເລື່ອງລາວຊີວິດຄວາມຮັກມື້ນີ້ຢາກໃຫ້ທຸກຄົນນຳໄປເປັນບົດຮຽນ ແລະເປັນຄະຕິໃຫ້ກັບຕົນເອງ ບາງຄັ້ງຄົນທີ່ມີອົງປະກອບຄົບທຸກຢ່າງພັດຊິເຮັດໃຫ້ໃຈພິການຍ້ອນແງ່ຄິດ ແລ້ວກັບມາເບິ່ງໜຸ່ມ ນິດ ວູຈິຊິດ ລາວບໍ່ມີຄືທຸກຄົນແຕ່ລາວກໍ່ມີຄວາມອົດທົນສູ້ຊີວິດ ແລະມີຄວາມຮັກທີ່ອົບອຸ່ນໃຫ້ກັບຄອບຄົວ

ສຳລັບນິດ ວູຈິຊິດ ເປັນຊາວອົດສະຕາລີ ເກີດໃນວັນທີ 4 ທັນວາປີ 1982 ພໍ່ແມ່ເປັນຄົນເຊີເບຍທີ່ອົບພະຍົບມາຢູ່ໃນອົດສະຕາລີ ແມ່ເປັນພະຍາບານ ສະນັ້ນແມ່ຈະດູແລຕົນເອງເປັນຢ່າງດີແຕ່ເລີ່ມຖືພາ ແລະມີການກວດເຊັກເອໂກເບິ່ງລູກເປັນປະຈຳຕອນຢູ່ໃນທ້ອງເຫັນວ່າບໍ່ພົບສິ່ງຜິດປົກກະຕິ ແຕ່ມື້ທີ່ເກີດມາພັດບໍ່ມີແຂນຂາ ແມ່ເຖິງກັບປະຕິເສດບໍ່ຢາກອຸ້ມລູກໂຕເອງ ແລະຄິດວ່າຄົງຢູ່ໄດ້ບໍ່ດົນ

ແຕ່ຫຼັງຈາກໝໍກວດຮ່າງກາຍຂອງນິດແລ້ວກັບບອກວ່າລູກຊາຍແຂງແຮງດີທຸກຢ່າງ ເມື່ອຜົນເປັນແນວນັ້ນແມ່ ແລະພໍ່ກໍ່ຕັດສິນໃຈລ້ຽງລູກໃຫ້ເຕີບໃຫຍ່ຂຶ້ນມາຄືກັບຄົນປົກກະຕິ

ໃນໄວເດັກທີ່ນິດໄປເຂົ້າໂຮງຮຽນເວົ້າໄດ້ວ່າລຳບາກຫຼາຍ ທັງໃນສະພາບແວດລ້ອມພາຍນອກ ແລະຈິດໃຈ ເພາະຖືກໝູ່ເຢີ້ຍມາຕະຫຼອດ ບາງຄັ້ງມີເຖິງ 10 ກວ່າພາກັນຫົວຢອກເຢີ້ຍໃນຄວາມເປັນຕົວຂອງນິດ ຈົນຄິດວ່າຕົນເອງຢູ່ໄປກໍ່ເປັນພຽງພາລະພໍ່ແມ່ ຂ້າຕົວເອງສາໃຫ້ແລ້ວໆໄປ ແຕ່ດ້ວຍຄວາມຮັກ ແລະກຳລັງໃຈຈາກພໍ່ແມ່ ເຮັດໃຫ້ນິດສາມາດກ້າວຂ້າມເລື່ອງລາວທີ່ບໍ່ສ້າງສັນອອກມາໄດ້

ລາວເລີ່ມປ່ຽນຄວາມຄິດໃໝ່ວ່າ ພາຍນອກຕົນເອງເຖິງຈະຕ່າງຈາກຄົນທົ່ວໄປ ແຕ່ພາຍໃນກໍ່ຄືກັບຄົນອື່ນໆທຸກຢ່າງ ຫຼັງຈາກນັ້ນນິດກໍ່ຕັ້ງໃຈຮຽນຈົນຈົບມະຫາວິທະຍາໄລກີບຟິກ ໃນອົດສະຕາລີ ສາຂາບັນຊີ ແລະການວາງແຜນການເງິນ

ຫຼັງຈາກຮຽນຈົບ ນິິດຢາກມີອາຊີບເປັນນັກເວົ້າໃນທີ່ສາທາລະນະ ຈິ່່ງຕັດສິນໃຈຕິດຕໍ່ໄປຍັງໂຮງຮຽນຕ່າງໆ ເພື່ອຈະໄປເລົ່າເລື່ອງເວົ້າສ້າງແຮງບັນດານໃຈແກ່ເດັກນ້ອຍທົ່ວໄປ ເຊິ່ງໃນເບື້ອງຕົ້ນກໍ່ຖືກປະຕິເສດທຸກໂຮງຮຽນ ຈົນມາວັນໜຶ່ງມີໂຮງຮຽນໜຶ່ງຕອບຮັບມາ ໄປຄັ້ງທຳອິດມີຄົນຟັງພຽງ 10 ຄົນກໍ່ບໍ່ເປັນຫຍັງ, ຈາກນັ້ນມາ ນິດກໍ່ເດີນສາຍເວົ້າສ້າງແຮງບັນດານໃຈມາຕະຫຼອດຈົນເປັນທີ່ຮູ້ຈັກຫຼາຍຂຶ້ນ ແລະເປັນທີ່ຍອມຮັບຂອງສັງຄົມຈຳນວນຫຼາຍ

ຄວາມພະຍາຍາມຂອງນິດນັ້ນໄດ້ເຮັດໃຫ້ມີຫຼາຍອົງກອນເຫັນໃຈ ແລະຊື່ນຊົມໃນຄວາມສາມາດ ຈິ່ງເຊີນໄປເວົ້າສ້າງແຮງບັນດານໃຈເລື້ອຍມາ ແມ່ນແຕ່ກອງປະຊຸມເສດຖະກິດລະດັບໂລກ World Economic Forum ທີ່ມີຜູ້ນຳຈາກຫຼາຍປະເທດທົ່ວໂລກເຂົ້າຮ່ວມ ນິດກໍ່ຍັງໄດ້ຮັບເຊີນໄປບັນຍາຍ ແລະກໍ່ໄດ້ຮັບການຍົກຍ້ອງວ່າ ເປັນຜູ້ທີ່ເວົ້າສ້າງແຮງບັນດານໃຈທີ່ດີທີ່ສຸດໃນໂລກ

ສຳຄັນໄປກວ່ານັ້ນ ນິດໄດ້ພົບຮັກແທ້ເປັນສາວລູກເຄິ່ງຍີ່ປຸ່ນແມັກຊີກັນ ປະຈຸບັນມີລູກນຳກັນແລ້ວ 4 ຄົນ ແຕ່ລະຄົນໜ້າຮັກໜ້າຊັງສຸດໆ ແລະນິດເອງກໍ່ເຮັດໜ້າທີ່ເປັນພໍ່ທີ່ດີໃຫ້ກັບລູກໆໄດ້ເປັນຢ່າງດີ ດີກວ່າພໍ່ທີ່ເກີດມາຄົບອົງປະກອບອີກດ້ວຍຊ້ຳໄປ

ນິດຈະເວົ້າສະເໝີວ່າ ໃນຍາມທີ່ທໍ້ແທ້ອ່ອນກຳລັງໃຈໃຫ້ລຸກຂຶ້ນສູ້ ບໍ່ມີວັນທີ່ຊ້າເກີນໄປຖ້າເຮົາຍັງພ້ອມຈະເລີ່ມຕົ້ນລຸກຂຶ້ນໃໝ່

ຂ່າວຕ່າງປະເທດ