ຄະນະສະເພາະກິດ ຄາດວ່າຢູ່ນະຄອນຫຼວງວຽງຈັນຈະມີຜູ້ຕິດໂຄວິດເຖີງ 2000ຄົນ

ຄະນະສະເພາະກິດ ຄາດວ່າຢູ່ນະຄອນຫຼວງວຽງຈັນຈະມີຜູ້ຕິດໂຄວິດເຖີງ 2000ຄົນ

ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໄດ້ຖະແຫຼງຂ່າວໃນວັນທີ 24 ເມສາ 2021 ນີ້ໃຫ້ຮູ້ວ່າ: ລາວກວດພົບຜູ້ຕິດເຊື້ອພະຍາດໂຄວິດ-19 ເພີ່ມໃໝ່ອີກ 88 ຄົນໃນມື້ວັນທີ 24 ເມສາ 2021 ນີ້, ເພີ່ມຂຶ້ນ 23 ຄົນຖ້າທຽບກັບມື້ວັນທີ 23 ເມສາ 2021 ທີ່ຜ່ານມາ ຊຶ່ງມີຜູ້ຕິດເຊື້ອທັງໝົດ 65 ຄົນ

ຄະນະສະເພາະກິດແຈ້ງໃຫ້ຮູ້ຕື່ມວ່າ: ຈໍານວນ 88 ຄົນທີ່ຕິດເຊື້ອດັ່ງກ່າວນັ້ນຢູ່ນະຄອນຫຼວງວຽງຈັນ 84 ຄົນ, ຢູ່ແຂວງບໍ່ແກ້ວ 2 ຄົນ ແລະ ຢູ່ແຂວງຈໍາປາສັກ 2 ຄົນ, ຊ່ຽວຊານຝ່າຍລາວ ແລະ ອົງການອະນາໄມໂລກ ຄາດນະເນເບື້ອງຕົ້ນຄາດວ່າ ຢູ່ນະຄອນຫຼວງວຽງຈັນຈະມີຜູ້ຕິດເຊື້ອພະຍາດດັ່ງກ່າວສູງເຖິງ 2.000 ຄົນ.

ສັງ​ລວມ​ແລ້ວ​ຮອດ​ວັນ​ທີ​24 ເມ​ສາ 2021 ລາວ​ພົບ​ຜູ້​ຕິດ​ເຊື້ອ​ພະ​ຍາດ​ໂຄວິດ​-19 ແລ້ວ​ຈຳ​ນວ​ນ 247 ຄົນ ໃນ​ນີ້​ປິ່ນ​ປົວ​ຫາຍ​ດີ​ແລ້ວ 49 ຄົນ.

ເພື່ອປະຕິບັດການຄົ້ນຫາຜູ້ຕິດເຊື້ອໂຄວິດ-19 ໃຫ້ໄດ້ໄວ ຄະນະສະເພາະກິດໄດ້ຂະຫຍາຍຈຸດກວດວິເຄາະ 4 ຈຸດ ໃນນະຄອນຫຼວງວຽງຈັນຄື: ມສ ລາວຫວຽດ, ເມືອງໄຊເສດຖາ; ສະໜາມກິລາເດີ່ນເຈົ້າອານຸວົງ, ເມືອງຈັນທະບູລີ; ມສ ໂຮຈີມີນ, ເມືອງສີໂຄດຕະບອງ ແລະ ເດີ່ນກິລາໃນຮົ່ມບຶງຂະຫຍອງ, ເມືອງສີສັດຕະນາກ ໂດຍມີພໍ່ແມ່ ປະຊາຊົນ, ຊາວຕ່າງປະເທດທີ່ອາໄສຢູ່ ສປປ ລາວ ທີ່ນອນຢູ່ໃນກຸ່ມສ່ຽງໄດ້ໃຊ້ບໍລິການກວດຫາເຊື້ອໂຄວິດ-19 ຈຳນວນຫຼາຍ ແລະ ພະນັກງານແພດ-ໝໍ ກໍ່ໄດ້ເຮັດວຽກຢ່າງໜັກຈົນບໍ່ມີວັນພັກເສົາ, ອາທິດ ເພື່ອຮັບມືກັບພະຍາດດັ່ງກ່າວ.​

ເພື່ອເປັນການໃຫ້ກຳລັງໃຈ ແລະ ຊຸກການປະຕິບັດໜ້າທີ່ດ້ວຍຄວາມເສຍສະຫຼະສູງຂອງພະນັກງານແພດ-ໝໍ, ເຈົ້າໜ້າທີ່ກ່ຽວຂ້ອງ ໃນຕອນເຊົ້າຂອງວັນທີ 24 ເມສາ 2021 ນີ້, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ພ້ອມດ້ວຍຄະນະ ໄດ້ລົງຊຸກຍູ້ ແລະ ຢ້ຽມຢາມ ເຈົ້າໜ້າທີ່ແພດ-ໝໍ ແລະ ພາກສ່ວນກ່ຽວຂ້ອງທີ່ປະຕິບັດໜ້າທີ່ຄົ້ນຫາຜູ້ຕິດເຊື້ອໂຄວິດ ຢູ່ຈຸດຕ່າງໆໃນນະຄອນຫຼວງວຽງຈັນ ໂດຍທ່ານຮອງນາຍົກລັດຖະມົນຕີ ໃນນາມຫົວໜ້າຄະນະສະເພາະກິດ ຕ່າງໜ້າລັດຖະບານໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈ ຕໍ່ຄະນະແພດ-ໝໍ, ເຈົ້າທີ່ ທີ່ໄດ້ທຸ່ມເທ່, ມີຄວາມເສຍສະຫຼະສູງ ເພື່ອເຮັດວຽກຕ້ານ, ສະກັດກັ້ນກັບພະຍາດຮ້າຍດັ່ງກ່າວທີ່ກຳລັງລະບາດໃນຂະນະນີ້

ພ້ອມເນັ້ນໄດ້ໃຫ້ມີການໂຄສະນາ, ເຜີຍແຜ່ໃຫ້ປະຊາຊົນໄດ້ຮັບຮູ້ເຖິງໄພອັນຕະລາຍຂອງພະຍາດເນຶ່ອງຈາກສະຖານະການລະບາດຢູ່ປະເທດເຮົາໃນປັດຈຸບັນສະຖານທີ່ ແລະ ປະຫວັດການສຳພັດຂອງຜູ້ຕິດເຊື້ອ ບໍ່ໄດ້ສຳຄັນກວ່າ ການປົກປ້ອງຕົນເອງ ແລະ ຄອບຄົວ ແລະ ເຮັດຕາມຄຳແນະນຳຂອງແພດໝໍ ເພາະທຸກສະຖານທີ່ແມ່ນບໍ່ປອດໄພ” ຢ່າງລືມ “ໃສ່ຜ້າອັດປາກດັງ, ຮັກສາໄລຍະຫ່າງທາງສັງຄົມ, ລ້າງມືໃຫ້ສະອາດເລື້ອຍໆ.

ຂ່າວລາວ