ຕະຫຼາດສົດລາວ-ອົດຊີ ສີດຍາຂ້າເຊື້ອ ເພື່ອຄວາມປອດໄພຂອງລູກຄ້າ ແລະ ພໍ່ຄ້າແມ່ຄ້າ

ຕະຫຼາດສົດລາວ-ອົດຊີ ສີດຍາຂ້າເຊື້ອ ເພື່ອຄວາມປອດໄພຂອງລູກຄ້າ ແລະ ພໍ່ຄ້າແມ່ຄ້າ

ພາຍຫຼັງ ຄະນະສະເພາະກິດ ກວດພົບແມ່ຄ້າ ຂາຍຊີ້ນໝູຢູ່ຕະຫຼາດລາວອົດຊີ ບ້ານທົ່ງປົ່ງ ເມືອງສີໂຄດຕະບອງ ນະຄອນຫຼວງວຽງຈັນ ຕິດເຊື້ອພະຍາດໂຄວິດ-19 ເປັນກໍລະນີທີ 96 ທີ່ສຳພັດກັບ ກໍ ລະນີ 91 ແລະ 95 ແລະ ທັງສອງກໍລະນີ ແມ່ນໄດ້ສຳຜັດກັບກໍລະນີ 59 ທີ່ນຳເອົາເຊື້ອພະຍາດມາແພ່ເປັນວົງກວ້າງ, ຈຶ່ງໄດ້ເພີ່ມມາດຕະການສະກັດກັ້ນຢ່າງເຂັ້ມງວດ ໂດຍກຳນົດເວລາເປີດ-ປິດ ພ້ອມທັງສີດຍາຂ້າເຊື້ອ,ມາເຖິງປັດຈຸບັນ ພໍ່ຄ້າຊາວຂາຍ ແລະ ຜູ້ມາໃຊ້ບໍລິການຢູ່ຕະຫຼາດລາວອົດຊີ ຍັງບໍ່ມີກໍລະໃດຕິດເຊື້ອພະຍາດໂຄວິດ 19 ເພີ່ມ.

ທ່ານ ນາງ ສຸດາໄລ ສີຄໍາແພງ ຜູ້ຈັດການຕະຫຼາດ ລາວອົດຊີ ລາຍງານຕໍ່ສື່ມວນຊົນ ປກສ ໃນວັນທີ 24 ເມສາ 2021 ວ່າ: ຫຼັງຈາກຮູ້ຂ່າວວ່າ ແມ່ຄ້າ ຂາຍຊີ້ນໝູ ຢູ່ຕະຫຼາດຂອງພວກເຮົາ ຕິດເຊື້ອໂຄວິດດ້ວຍການໄປສຳພັດກັບຜູ້ທີ່ຕິດເຊື້ອດັ່ງກ່າວ ພວກເຮົາຈຶ່ງແນະນໍາໃຫ້ຜູ້ສຳພັດກັບແມ່ຄ້າດັ່ງກ່າວໄປກວດ ແລະ ກັກຕົວ ພ້ອມທັງສັ່ງປິດໂຊນຂາຍຊີ້ນທັງໝົດ ເພື່ອສີດຢາຂ້າເຊື້ອປັດຈຸບັນພວກເຮົາສີດສຳເລັດແລ້ວ 2 ຄັ້ງ ແລະ ຍັງຈະສືບຕໍ່ສີດອີກຈົນທົ່ວຕະຫຼາດພາຍຫຼັງປິດຕະຫຼາດ ເພື່ອເປັນການສະກັດກັ້ນ ແລະ ປ້ອງກັນພະຍາດໂຄວິດ-19 ບໍ່ໃຫ້ແພ່ລະບາດອອກໄປຕື່ມອີກ

ປັດຈຸບັນນີ້, ຕະ ຫຼາດພວກເຮົາ ບາງສ່ວນແມ່ນໄດ້ປິດໃຫ້ບໍລິການແລະ ເປີດບໍລິການບາງສ່ວນ ກໍຄື ເຂດຂາຍໜາກໄມ້, ພືດ-ຜັກ ແລະ ເຄື່ອງບໍລິໂພກ ເທົ່ານັ້ນ ໂດຍກຳນົດເວລາເປີດ-ປິດ ຕາມແຈ້ງການຂອງຂັນເທີງເຊິ່ງເມື່ອກ່ອນເປີດຕະຫຼອດ 24 ຊົ່ວໂມງ ປ່ຽນມາ ເປັນ 6:00-19:00 ໂມງຂອງທຸກໆມື້; ພ້ອມກັນນີ້, ຕະຫຼາດຂອງພວກເຮົາ ຍັງມີນະໂຍບາຍໃນການຂົນສົ່ງສິນຄ້າໃຫ້ກັບລູກຄ້າເຖິງທີ່ ເພື່ອຫຼຸດຜ່ອນຄວາມແອອັດຂອງມວນຊົນ ທີ່ມາໃຊ້ບໍລິການໃນຕະຫຼາດລາວອົດຊີ.

ທ່ານ ສົມຍົດ ຄໍາປະເສີດ ຫົວໜ້າຈັດສັນຕະ ຫຼາດລາວອົດຊີ ກ່າວຕື່ມອີກວ່າ: ປັດຈຸບັນ ທາງຕະຫຼາດພວກເຮົາ ໄດ້ມີມາດຕະການເຂັ້ມງວດໃນການປ້ອງກັນພະຍາດໂຄວິດ-19, ໃນແຕ່ວັນພວກເຮົາໄດ້ໂຄສະນາຜ່ານທາງໂທລະໂຄ່ງໃຫ້ພໍ່ຄ້າ-ແມ່ຄ້າ ແລະ ຜູ້ມາໃຊ້ບໍລິການ ພ້ອມກັນປະຕິບັດມາດຕະການປ້ອງກັນຢ່າງເຂັ້ມງວດ,ສ່ວນຢູ່ຈຸດ ເຂົ້າໃນຕະຫຼາດ

ພວກເຮົາຈະມີການວັດແທກອຸນນະພູມ ແລະ ແຈກຢາຍຜ້າປິດປາກ-ດັງ,ຖ້າວັດແທກອຸນະພູມກາຍ 38 ອົງສາ, ພວກເຮົາຈະບໍ່ອະນຸຍາດໃຫ້ເຂົ້າໄປໃນຕະຫຼາດ.ພ້ອມກັນນີ້,ຢູ່ໃນຕະຫຼາດ ກໍມີນ້ຳຢາລ້າງມືໄວ້ໃຫ້ ຢູ່ແຕ່ລະຈຸດເຂົ້າ -ອອກ ແລະ ແນະນຳໃຫ້ທຸກຮ້ານ ທີ່ຂາຍເຄື່ອງມີນ້ຳຢາລ້າງມື ເພື່ອເປັນການປ້ອງກັນພະຍາດໂຄວິດ.ສະນັ້ນ, ຂໍໃຫ້ທຸກທ່ານ ທີ່ມາໃຊ້ບໍລິການຈົ່ງໝັ້ນໃຈໃນການປ້ອງກັນພະຍາດໂຄວິດ-19 ຂອງຕະຫຼາດພວກເຮົາ.

ຂ່າວລາວ