ມອບພຣະພຸດທະຮູບ 10ອົງຄືນວັດທາດຫຼວງໃຕ້ ຫຼັງຈາກຖືກໂຈນລັກໄປ

ມອບພຣະພຸດທະຮູບ 10ອົງຄືນວັດທາດຫຼວງໃຕ້ ຫຼັງຈາກຖືກໂຈນລັກໄປ

ໃນເວລາ 14 ໂມງ 30 ນາທີ ຂອງວັນທີ 28 ເມສາ 2021 ເຈົ້າໜ້າທີ່ຕໍາຫຼວດກອງພັນປ້ອງກັນເຄື່ອນທີ່ ນະຄອນຫຼວງວຽງຈັນ ປະຈໍາຢູ່ຈຸດປ້ອງກັນມໍລະດົກ ເດີ່ນສະໜາມຫຼວງ ໄດ້ອອກກວດກາລາດຕະເວນຕາມຂອບເຂດຮັບຜິດຊອບ ໄດ້ພົບເຫັນພຣະພຸດທະຮູບ ຖີ້ມຢູ່ເດີ່ນຫຍ້າຂ້າງປະຕູເຂົ້າວັດທາດຫຼວງໃຕ້ ຈຶ່ງໄດ້ເກັບກູ້ຂຶ້ນມາຮັກສາໄວ້ ແລ້ວທຳການສືບສວນ-ສອບສວນຮູ້ໄດ້ວ່າ:

ພຣະພຸດທະຮູບ ມີຈໍານວນ 10 ອົງ, ໄດ້ຖືກຮ້າຍລັກໄປຢູ່ວັດທາດຫຼວງໃຕ້ ໃນຄໍ່າຄືນຂອງວັນທີ 25 ເມສາ 2021 ແລ້ວນໍາໄປຖິ້ມປະໄວ້ເດີ່ນຫຍ້າ ທາງເຂົ້າໄປຫາປະຕູວັດທາດຫຼວງໃຕ້ເບື້ອງຕາເວັນອອກ, ສ່ວນຄົນຮ້າຍແມ່ນເອົາຕົວຫຼົບໜີ. ສ່ວນພະຈໍານວນດັ່ງກ່າວ ພັທ ວັນທອງ ດີຢາງຫວາຍ ຫົວໜ້າກອງຮ້ອຍປ້ອງກັນທີ່ຕັ້ງ ພ້ອມຄະນະ ໄດ້ເຮັດບົດບັນທຶກ ແລະ ສົ່ງມອບໃຫ້ເຈົ້າອະທິການວັດທາດຫຼວງໃຕ້ຄືນ ເພື່ອນໍາໄປເກັບຮັກສາ ສັກກະລະບູຊາຕໍ່ໄປ.

ໃນໄລຍະນີ້ເປັນໄລຍະໃນການປິດຕົວເມືອງ ນວ ສະພາບຊີວິດການເປັນຢູ່ຂອງປະຊາຊົນຊາວນວ ແມ່ນພົບຄວາມຫຍຸ້ງຍາກ, ຝືດເຄືອງ ເຮັດໃຫ້ບັນຫາລັກງັດແງະ, ປຸ້ນຈີ້ຊີງຊັບອາດຈະເກີດຂຶ້ນ ສະນັ້ນ ກອງບັນຊາການ ປສກ ນວ ຮຽກຮ້ອງມາຍັງຊາວ ນວ ໃຫ້ມີສະຕິຄຸ້ມຄອງເກັບມ້ຽນສັບສົມບັດອັນມີຄ່າຂອງຕົນໄວ້ຢູ່ບ່ອນປອດໄພ, ບໍ່ເຮັດໃຫ້ເປັນຊ່ອງວ່າງໃຫ້ກຸ່ມຄົນບໍ່ດີສວຍໂອກາດລັກເອົາ ແລະ ຊ່ວຍປະຕິບັດພັນທະຂອງຕົນຊ່ວຍເຈົ້າໜ້າທີ່ ພົບເຫັນການເຄື່ອນໄຫວທີ່ຜິດຕໍ່ກົດໝາຍບ້ານເມືອງ

ລາຍງານມາຊ່ອງທາງ ເບີວອດແອັບ 020​28899774 ແລະ ແຈ້ງຜ່ານຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ

ຂ່າວລາວ