ເມືອງ ຕົ້ນເຜິ້ງ ແຂວງບໍ່ແກ້ວ ປິດເມືອງບໍ່ຢູ່ ຍັງຝ່າຝືນລັກລອບ ເຂົ້າ-ອອກ

ເມືອງ ຕົ້ນເຜິ້ງ ແຂວງບໍ່ແກ້ວ ປິດເມືອງບໍ່ຢູ່ ຍັງຝ່າຝືນລັກລອບ ເຂົ້າ-ອອກ

ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເມືອງຕົ້ນເຜິ້ງ ແຂວງບໍ່ແກ້ວໃຫ້ຮູ້ວ່າ: ປັດຈຸບັນນີ້ຍັງມິປະຊາຊົນຈໍານວນໜຶ່ງໄດ້ຝ່າຝືນ ລັກລອບ ເຂົ້າ – ອອກເມືອງຕົ້ນເຜິ້ງຕາມເສັ້ນທາງທີ່ຄະນະສະເພາະກິດບໍ່ອະນຸຍາດໃຫ້ຜ່ານຊຶ່ງເປັນສາເຫດໜຶ່ງທີ່ເຮັດໃຫ້ມີຜູ້ຕິດເຊື້ອພະຍາດໂຄວິດຈໍານວນຫຼາຍຢູ່ແຂວງບໍ່ແກ້ວໂດຍສະເພາະຢູ່ເມືອງຕົ້ນເຜິ້ງ ຊຶ່ງຮອດວັນທີ 8 ພຶດສະພາ 2021 ນີ້ ທົ່ວແຂວງບໍ່ແກ້ວມີຜູ້ຕິດເຊື້ອພະຍາດໂຄວິດ-19 ແລ້ວ ເຖິງ 226 ຄົນ.

ຄະນະສະເພາະກິດໃຫ້ຮູ້ຕື່ມວ່າ: ນັບແຕ່ເລີ່ມມີການແຜ່ລະບາດ ຂອງພະຍາດ ໂຄວິດ – 19 ໃນຮອບນີ້ ເມືອງ ຕົ້ນເຜິ້ງ ກໍ່ໄດ້ປະຕິບັດມາດຕະການປິດການເຂົ້າ – ອອກເມືອງ ໂດຍໄດ້ຕັ້ງຈຸດກັ່ນກອງຄົນເຂົ້າ – ອອກຢູ່ຈຸດປະຕູໂຂງທາງເຂົ້າເທສະບານ, ປິດການສັນຈອນ ເຂົ້າ -ອອກ ລະຫວ່າງບ້ານຕໍ່ບ້ານ ໂດຍ ໃຫ້ເຈົ້າໜ້າທີ່ທະຫານ – ຕໍາຫຼວດ, ປກສ ກອງຫຼອນບ້ານຜັດປ່ຽນກັນປ້ອງກັນເວນຍາມຕະຫຼອດ 24 ຊົ່ວໂມງ ແລະ ສ້າງສິ່ງກີດຂວາງໃສ່ເສັ້ນທາງນ້ອຍທີ່ເຊື່ອມຕໍ່ໄປຫາເສັ້ນທາງໃນເທສະບານ

ແຕ່ຜ່ານການຈັດຕັ້ງປະຕິບັດມາດຕະການດັ່ງກ່າວ ໄດ້ມີປະຊາຊົນຈໍານວນໜຶ່ງໄດ້ຝ່າຝືນ ມາດຕະການດັ່ງກ່າວມີການລັກລອບເຂົ້າ – ອອກຜ່ານເສັ້ນທາງໄປໄຮ່, ນາ, ສວນ ຂອງປະຊາຊົນ ແລະ ເສັ້ນທາງນ້ອຍ ທີ່ເຊຶ່ອມຕໍ່ຫາເສັ້ນທາງໃນເທສະບານເມືອງຈຸດທີ່ບໍ່ມີເຈົ້າໜ້າທີ່ປ້ອງກັນເວນຍາມ, ຜູ້ລັກລອບບາງຄົນໄດ້ຂຸດກອງດິນທີ່ທາງຄະນະສະເພາະກິດໄດ້ນໍາມາຖອກກັ້ນເສັ້ນທາງໄວ້ ເພື່ອໃຫ້ລົດຂອງຕົນລັກລອບຜ່ານໄປໄດ້ ນອກຈາກນັ້ນຍັງມີປະຊາຊົນຈໍານວນໜຶ່ງໄດ້ຂັບລົດມາຮັບເອົາຄົນຕ່າງປະເທດຢູ່ຈຸດດັ່ງກ່າວເຂົ້າໄປໃນເທສະບານເມືອງ.

ຂ່າວລາວ