ປກສ ເມືອງຫາດຊາຍຟອງ ສຸມໃສ່ເກັບກຳຂໍ້ມູນນຳເຂດພື້ນທີ່ສີແດງ

ປກສ ເມືອງຫາດຊາຍຟອງ ສຸມໃສ່ເກັບກຳຂໍ້ມູນນຳເຂດພື້ນທີ່ສີແດງ

ໂດຍປະຕິບັດຕາມທິດຊີ້ນຳຂອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ເພື່ອຄວບຄຸມ, ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ຂອບເຂດພື້ນທີ່ສີແດງ (ສະຖານທີ່ທີ່ມີຜູ້ຕິດເຊື້ອໂຄວິດ-19) ເພື່ອຊອກຫາກຸ່ມຄົນທີ່ຢູ່ໃນກຸ່ມສ່ຽງອາດຈະຕິດເຊື້ອໃຫ້ເຂົ້າສູ່ຂະບວນການປິ່ນປົວກວດຫາເຊື້ອຕາມາດຕະການ ຂອງກະຊວງສາທາລະນະສຸກ ກໍ່ຄືຄະນະສະເພາະກິດ ນວ ໄດ້ວາງອອກ; ດັ່ງນັ້ນ ວັນທີ 10 ພຶດສະພາ 2021 ກອງບັນຊາການ ປກສ ເມືອງຫາດຊາຍຟອງ ໄດ້ແຕ່ງຕັ້ງໜ່ວຍງານສະເພາະກິດ ລົງເກັບກຳຂໍ້ມູນນຳເຂດພື້ນທີ່ສີແດງ(ສະຖານທີ່ທີ່ມີຜູ້ຕິດເຊື້ອໂຄວິດ-19) ທົ່ວເມືອງຫາດຊາຍຟອງ.

ຜ່ານການຈັດຕັ້ງປະຕິບັດສາມາດຮູ້ໄດ້ວ່າ: ທົ່ວເມືອງຫາດຊາຍຟອງມີຜູ້ຕິດເຊື້ອທັງໝົດ 14 ຄົນ, ໃນນີ້ ປິ່່ນປົວຫາຍດີກັບບ້ານແລ້ວ 2 ຄົນ. ສໍາລັບສະຖານທີ່ຂອງຜູ້ຕິດເຊື້ອມີ 10 ບ້ານ: ບ້ານໜອງໄຮ, ບ້ານດົງຄໍາຊ້າງ, ບ້ານສົມຫວັງ, ບ້ານສາລະຄໍາໃຕ້, ບ້ານນາໄຫ, ບ້ານດອນຂາຊ້າຍ, ບ້ານດອນດູ່, ບ້ານດົງໂພນແຮ່, ບ້ານປ່າຫວ້າ ແລະ ບ້ານທ່າພະ ແມ່ນໄດ້ປິດຫ້າມມີການເຄື່ອນໄຫວເຂົ້າ-ອອກໃນເຂດດັ່ງກ່າວຢ່າງເດັດຂາດ.

ກອງບັນຊາການ ປກສ ນວ ສະເໜີມາຍັງຫົວໜ້າກອງບັນຊາການ ປກສ 9 ເມືອງໃຫ້ຕິດຕາມກວດກາ, ເກັບກຳຂໍ້ມູນຜູ້ທີ່ຕິດເຊື້ອຢູ່ໃນເມືອງຂອງຕົນ, ເພື່ອຊອກຮູ້ຜູ້ທີ່ຢູ່ໃນກຸ່ມສ່ຽງໃຫ້ ປະຕິບັດມາດຕະການ, ກັກຕົວເອງ ແລະ ເຂົ້າສູ່ຂະບວນການກວດຫາເຊື້ອປິ່ນປົວ ແລະ ຮຽກຮ້ອງມາຍັງຊາວ ນວ ຖ້າຮູ້ວ່າຕົນເອງແມ່ນຢູ່ໃນເຂດພື້ນທີ່ສີແດງ(ສະຖານທີ່ທີ່ມີຜູ້ຕິດເຊື້ອໂຄວິດ-19) ແມ່ນໃຫ້ປະຕິບັດຕາມຄໍາແນະນໍາຂອງຄະນະສະເພາະກິດວາງອອກຢ່າງເຂັ້ມງວດ ເພື່ອເປັນການຄວບຄຸມ, ສະກັດກັ້ນບໍ່ໃຫ້ມີການແຜ່ລະບາດຂອງເຊື້ອພະຍາດຂະຫຍາຍເປັນວົງກວ້າງ.

ຂ່າວລາວ