ຢືນຢັນຂ່າວລືທີ່ວ່າມີຜູ້ຕິດເຊື້ອຢູ່ໃນໂຮງແຮມແລ້ວອອກໄປແຜ່ເຊື້ອບໍ່ແມ່ນຄວາມຈີງ

ຢືນຢັນຂ່າວລືທີ່ວ່າມີຜູ້ຕິດເຊື້ອຢູ່ໃນໂຮງແຮມແລ້ວອອກໄປແຜ່ເຊື້ອບໍ່ແມ່ນຄວາມຈີງ

ຈາກກໍລະນີທີ່ມີຂ່າວລືກັນເມື່ອບໍ່ດົນມານີ້ ວ່າມີຜູ້ຕິດເຊື້ອພະຍາດໂຄວິດ-19 ເປັນເພດຊາຍ ໂດຍໄດ້ຖືກກັກບໍລິເວນ 14 ວັນ ຢູ່ໂຮງແຮມ, ໄດ້ມີສາວບໍລິການທາງນອກເຂົ້າໄປໃຫ້ບໍລິການຜູ້ຕິດເຊື້ອໂຄວິດ-19 ຢູ່ໃນໂຮງແຮມ ແລະ ຍິງສາວໄດ້ນໍາເອົາເຊື້ອໄປແຜ່ສູ່ສັງຄົມ, ນອກນັ້ນຍັງມີຂ່າວລືທີ່ວ່າມີຜູ້ເດີນທາງເຂົ້າມາລາວຈໍານວນໜຶ່ງໂດຍຖືກກັກບໍລິເວນຢູ່ໂຮງແຮມ ຫຼື ຢູ່ສູນກັກກັນໄດ້ພາກັນລັກໂຕນໜີອອກຈາກສູນກັກກັນກ່ອນກໍານົດນັ້ນ, ຮອງລັດຖະມົນຕີກະຊວງສາທາລະນະສຸກ ໄດ້ອອກມາຢືນຢັນວ່າບໍ່ມີມູນຄວາມຈິງ ເປັນຂ່າວປອມທີ່ພວກບໍ່ຫວັງດີປ່ອຍຂ່າວເພື່ອຫວັງສ້າງຄວາມບໍ່ສະຫງົບໃນສັງຄົມລາວເທົ່ານັ້ນ

ຮອງລັດຖະມົນຕີກະຊວງສາທາລະນະສຸກ ທ່ານ ດຣ. ພູທອນ ເມືອງປາກ ໄດ້ອອກມາຖະແຫຼງຂ່າວຕໍ່ສື່ມວນຊົນກ່ຽວກັບເລື່ອງຂ່າວລືດັ່ງກ່າວເມື່ອບໍ່ດົນມານີ້ ວ່າ, ເປັນຂ່າວປອມ ເພາະຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການແຜ່ລະບາດພະຍາດໂຄວິດ-19 ມີມາດຕະການປ້ອງກັນຢ່າງເຂັ້ມງວດ ໂດຍມີການແບ່ງໜ້າທີ່ກັນຮັບຜິດຊອບແຕ່ລະຂັ້ນຂອດຢ່າງລະອຽດ ແລະ ເຂັ້ມງວດ ໃນການເອົາໃຈໃສ່ຕິດຕາມ, ຄຸ້ມຄອງ ການປະຕິບັດມາດຕະການຢູ່ສູນຈໍາກັດບໍລິເວນຂອງລັດ, ຢູ່ໂຮງແຮມ ໂດຍບໍ່ໃຫ້ຄົນພາຍນອກມາພົບ ທັງຈໍາກັດບໍລິເວນໃຫ້ຄົບ 14 ວັນ, ນອກນັ້ນຄົນເຈັບທີ່ຕິດເຊື້ອພະຍາດດັ່ງກ່າວໄດ້ມີການຮັກສາ ປິ່ນປົວ, ມີການຕິດຕາມຢ່າງໃກ້ຊິດຈາກແພດໝໍ ແລະ ມີມາດຕະກັນປ້ອງກັນຢ່າງເຂັ້ມງວດ. ໃນນາມກະຊວງສາທາລະນະສຸກ ຫຼື ໃນນາມຂອງ ຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການແຜ່ລະບາດພະຍາດໂຄວິດ-19 ຂໍຢືນຢັນອີກເທື່ອໜຶ່ງວ່າເລື່ອງຂ່າວລືດັ່ງກ່າວເປັນຂ່າວປອມ ບໍ່ມີມູນຄວາມຈິງ.

“ຂ່າວລືນີ້ແມ່ນບໍ່ມີມູນຄວາມຈິງແຕ່ຢ່າງໃດ. ຄົນເຈັບທີ່ຕິດເຊື້ອສະສົມມີແຕ່ 39ຄົນ ແລະພວມປິ່ນປົວຢູ່ໂຮງໝໍມີ 15ຄົນເທົ່ານັ້ນ. ສະນັ້ນ, ຂໍໃຫ້ປະຊາຊົນຈົ່ງເຊື່ອໝັ້ນໃນມາດຕະການກວດກາຄົນເຂົ້າເມືອງ, ມາດຕະການໃນການຈໍາກັດບໍລິເວນ, ສິ່ງສໍາຄັນ ຄະນະສະເພາະກິດຂັ້ນສູນກາງ ລວມມີ 4 ຂະແໜງການ ເປັນຕົ້ນຂະແໜງການຂອງກະຊວງການຕ່າງປະເທດ, ກະຊວງໂຍທາທິການ ແລະຂົນສົ່ງ, ກະຊວງປ້ອງກັນຄວາມສະຫງົບ ແລະກະຊວງສາທາລະນະສຸກ ຕ້ອງໄດ້ຄົ້ນຄວ້າລະອຽດ, ຮັດກຸມໃນການກວດກາຢ່າງເຄັ່ງຄັດ ເພື່ອໂຈະການອອກວິຊາສໍາລັບຜູ້ເດີນທາງມາຈາກປະເທດທີ່ຍັງມີການລະບາດ ຂອງພະຍາດໂຄວິດ19 ຢູ່ໃນຊຸມຊົນ, ແລະໂຈະການອະນຸມັດຖ້ຽວບິນເຊົ່າເໝົາລໍາ ຈາກປະເທດທີ່ຍັງມີການລະບາດຂອງພະຍາດຢູ່ໃນຊຸມຊົນ, ຍົກເວັ້ນຖ້ຽວບິນມະນຸດສະທໍາ, ໃນນີ້ຕ້ອງໄດ້ກວດກາຢ່າງເຄັ່ງຄັດຕໍ່ຜູ້ໂດຍສານ, ເພື່ອບໍ່ໃຫ້ຜູ້ໂດຍສານຈາກປະເທດທີ່ຍັງມີການລະບາດຂອງພະຍາດໂຄວິດ19 ມານໍາຖ້ຽວບິນມະນຸດສະທໍານັ້ນ.”

ປະຈຸບັນສັງເຫດເຫັນວ່າຫລາຍພາກສ່ວນໃນສັງຄົມ ຍັງລະເຫລີງຕໍ່ມາດຕະການ ປ້ອງກັນການລະບາດຂອງພະຍາດນີ້, ສະນັ້ນຄະນະສະເພາະກິດຈຶ່ງສະເໜີໃຫ້ກະຊວງປ້ອງກັນປະເທດເອົາໃສ່ ຕິດຕາມ, ກວດກາການລັກລອບເຂົ້າເມືອງແບບຊະຊາຍ ໂດຍບໍ່ຜ່ານດ່ານຊາຍແດນ, ເພື່ອບໍ່ໃຫ້ມີຄວາມສ່ຽງໃນການນໍາເອົາພະຍາດເຂົ້າມາແຜ່ຜາຍຢູ່ປະເທດເຮົາ,ພ້ອມກັນນັ້ນອໍານາດການປົກຄອງທຸກຂັ້ນ, ຊຸມຊົນ, ຄອບຄົວ ຕ້ອງເອົາໃຈໃສ່ຮ່ວມກັນໃນການຈັດງານບຸນປະເພນີ, ການສະເຫລີມສະຫລອງວັນສໍາຄັນຕ່າງໆ, ກິດຈະກໍາແຂ່ງຂັນກິລາ ຕ້ອງໄດ້ກໍານົດເປົ້າໝາຍເຂົ້າຮ່ວມໃນລະດັບທີ່ມີຄວາມເໝາະສົມ, ບໍ່ໃຫ້ແອອັດເກີນໄປ ພ້ອມທັງປະຕິບັດມາດຕະການກວດ, ເຊັກຮ່າງກາຍກ່ອນຈະເຂົ້າໄປໃນງານນັ້ນ, ເພື່ອພ້ອມກັນຜ່ານວິກິດນີ້ໃຫ້ໄດ້ ປ້ອງກັນບໍ່ໃຫ້ມີການລະບາດຂອງພະຍາດໂຄວິດ19 ຢູ່ໃນຊຸມຊົນຂອງບ້ານເຮົາ.

ຂ່າວລາວ