ອີກມູມໜື່ງທີ່ຫຼາຍຄົນຍັງບໍ່ເຫັນຂອງ”ຄຣິສຕີນາ” Miss Universe Laos

ອີກມູມໜື່ງທີ່ຫຼາຍຄົນຍັງບໍ່ເຫັນຂອງ”ຄຣິສຕີນາ” Miss Universe Laos

ອີກມູມໜື່ງທີ່ຫຼາຍຄົນຍັງບໍ່ທັນໄດ້ເຫັນວ່າ ສູ້ສໍາໃດ ອິດເມືອຍສໍາໃດ, ບາງມື້ໄດ້ນອນເເຕ່ 2 ຊົ່ວໂມງ, ບາງມື້2ໂມງເຊົ້າຍັງບໍ່ໄດ້ນອນ, ບາງມື້ຕ້ອງຕື່ນເເຕ່ 4ໂມງເຊົ້າ.

ຍາດເວລາຜັກຜ່ອນເເມ່ນຊ່ວງເດີນທາງໃນລົດເປັນສ່ວນໃຫຍ່.ນ້ອງເມືອຍກາຍກະພໍເເຮງ, ບໍ່ຊ່ວຍຫຍັງກະຂໍໃຫ້ຢູ່ເສີຍໆ

ມິສຢູນິເວີສລາວ 2020 ນາງຄຣິສຕີນາ ລາສະສິມມາໄດ້ໃຈຜູ້​ຊົມທັງພາຍໃນ ແລະ ຕ່າງປະເທດຢ່າງຫຼວງຫຼາຍຫຼັງຈາກການປະກວດໃນຮອບຊຸດປະຈຳຊາດ ແລະ ຮອບກ່ອນຊິງຊະນະເລີດ (National Costume Competition ແລະ (Preliminary Competition) ໃນວັນພະຫັດ ແລະ ວັນສຸກຜ່ານມາ ທີ່ປະເທດສະຫະລັດ ອາເມລິກາ.

ໃນ​ການ​ປະ​ກວດ, ນາງຄຣິສຕີນາ ລາສະສີມມາ ໄດ້​ມາໃນຊຸດປະຈຳຊາດ ໂດຍ ໃສ່ຊຸດນາງສັງຂານຫຼວງພະບາງພ້ອມທັງຖືຫົວຂອງພະຍາກະບິນລະພົມ ແລະ ຄັນຮົ່ມທີ່ເບື້ອງເທິງປະດັບດ້ວຍສັນຍາລັກແຫຼ່ງທ່ອງທ່ຽວທີ່ມີຊື່ສຽງຂອງລາວແຕ່ເໜືອຮອດໃຕ້ເພື່ອນຳສະເໜີສະ​ເໜ່​ທີ່​ເປັນ​ເອກ​ກະ​ລັກ ແລະ ວັດທະນະທຳອັນ​ດີ​ງາມ​ຂອງ​ປະ​ເທດລາວສູ່ເວທີສາກົນ.

ການມາ​ໃນຊຸດປະຈຳຊາດຂອງລາວ​ໃນ​ຄັ້ງ​ນີ້​ແມ່ນ​ຖື​ວ່າເຮັດໄດ້ດີຫຼາຍເຖິງວ່າເບື້ອງຫຼັງຂອງເວທີເຕັມໄປດ້ວຍອຸປະສັກທີ່ບໍ່ຄາດຄິດ ແລະ ຄວາມກົດດັນຊຶ່ງລາວກໍ່ສາມາດຜ່ານມັນໄປໄດ້ ແລະ ເຮັດໃຫ້ການ​ສະ​ແດງຂອງລາວສົມບູນແບບ.

ໃນຮອບກ່ອນຊິງຊະນະເລີດ (Preliminary Competition) ນາງຄຣິສຕິນາ ລາສະສີມມາ ໄດ້ຖືກຄັດເລືອກເປັນຫົວໜ້າກຸ່ມສະ​ແດງ ໃນກຸ່ມທີສາມ ແລະ ເປັນຄົນທຳອິດຂອງກຸ່ມໃນການສະ​ແດງຮູບຮ່າງໃນຊຸດລອຍນໍ້າ ແລະ ຊຸດລາຕີ ຢູ່ເທີງເວທີປະກວດມິສຢູນິເວີສ ທ່າມກາງສາຍຕາຂອງກຳມະການຕັດສີນ ແລະ ຜູ້ຊົມຈຳນວນຫຼວງຫຼາຍຊື່ງລາວກໍ່ໄດ້ເຮັດອອກມາດີ ແລະ ໄດ້ໃຈກອງເຊຍ ທັງພາຍໃນ ແລະ ຕ່າງປະເທດທີ່ສົ່ງກຳລັງໃຈໃຫ້.

ຫຼັງຈາກສິ້ນສຸດການແຂ່ງຂັນຮອບຊຸດປະຈຳຊາດ ກັບຮອບກ່ອນຊິງຊະນະເລິດນາງກໍ່ໄດ້ມາໄລສົດທາງເຟສບຸກຂອບໃຈ ກອງ​ເຊຍ ທີ່ເຊຍ ແລະ ສົ່ງກຳລັງໃຈມາໃຫ້ຕະຫຼອດການແຂ່ງຂັນ ເຖິງ​ແມ່ນ​ວ່າ​ຈະ​ມີ ບັນຫາ ແລະ ອຸປະສັກທີ່ພົບພໍ້ໃນໄລຍະການແຂ່ງຂັນຊຶ່ງຈະບໍ່ຍອມທໍ້ຖອຍ ໂດຍ ຕັ້ງໃຈຝືກຊ້ອມ ແລະ ເຮັດກິດຈະກຳຂອງກອງປະກວດ ເພື່ອເຮັດໃຫ້ດີທີ່ສຸດໃນການແຂ່ງຂັນຮອບສຸດທ້າຍທີ່ຈະໄດ້ຈັດຂື້ນໃນຕອນຄ່ຳຂອງວັນອາທິດທີ16 ພຶດສະພາ 2021 ນີ້ ຕາມເວລາຢູ່ທີ່ສະຫະລັດອາເມລິກາ ແລະ ກົງກັບອາທີດທີ່17 ຕອນເຊົ້າຕາມເວລາທີ່ປະເທດລາວຊື່ງທຸກຄົນສາມາດຮ່ວມເຊຍ ແລະ ໂຫວດໃຫ້ລາວໄດ້ເຂົ້າຮອບເລິກໆ ແລະ ນຳມົງກຸດມາໃຫ້ປະເທດລາວ.

ນາງໄດ້ໃຫ້ຮູ້ຕື່ມອີກວ່າ: ສາວງາມແຕ່ລະປະເທດ ມີຄວາມອົດທົນ ແລະ ຕັ້ງໃຈຫຼາຍເພື່ອຜ່ານຜ່າອຸປະສັກ ແລະ ຄວາມກົດດັນຕະຫຼອດການຝືກຊ້ອມ ແລະ ແຂ່ງຂັນ ຊື່ງລາວເອງກໍໄດ້ມີເວລານອນພຽງແຕ່ ສອງສາມຊົ່ວໂມງໃນແຕ່ລະວັນ ແຕ່ຕ້ອງໄດ້ເກັບຄວາມອິດເມື່ອຍ ແລະ ຄວາມເຈັບປວດໄວ້ພາຍໃນ ແລະ ມ່ວນຊື່ນ ແລະ ເຕັມທີ່ກັບທຸກໆກິດຈະກຳ ແລະ ການແຂ່ງຂັນຂອງກອງປະກວດໃນແຕ່ລະວັນ ເພື່ອເຮັດໜ້າທີ່ໃຫ້ດີທີ່ສຸດ ແລະ ນຳລາງວັນມາໃຫ້ປະເທດລາວ ແລະ ກອງ​ເຊຍ​ຕ່າງປະເທດ.

ຂ່າວບັນເທີງ