ສປປ ລາວ ເລັ່ງສັກວັກແຊງຮອບທີ2 ເພື່ອຕ້ານການແຜ່ລະບາດພະຍາດໂຄວິດ-19

ສປປ ລາວ ເລັ່ງສັກວັກແຊງຮອບທີ2 ເພື່ອຕ້ານການແຜ່ລະບາດພະຍາດໂຄວິດ-19

ສປປ ລາວ ພວມເລັ່ງສັກວັກແຊງຮອບທີສອງ ໃຫ້ພະນັກງານ-ລັດຖະກອນ, ພະນັກງານທະຫານ-ຕ່ຳຫລວດ ຕະຫລອດຮອດປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ເພື່ອຕ້ານ ແລະສະກັດກັ້ນ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ບໍ່ໃຫ້ແຜ່ລາມເປັນວົງກວ້າງ ແລະໝົດໄປໂດຍໄວ. ສໍາລັບ ຜູ້ທີ່ຍັງບໍ່ທັນໄດ້ຮັບວັກແຊງ ຫຼື ບໍ່ເປັນກຸ່ມສ່ຽງ ພັກ-ລັດຖະບານ ໄດ້ຊີ້ນໍາ ແລະ ເລັ່ງລັດໃຫ້ກະຊວງສາທາລະນະສຸກ ຈັດຫາວັກແຊງ ເພື່ອສັກໃຫ້ປະຊາຊົນໃຫ້ໄດ້ຢ່າງໝ້ອຍ 50 ເປີເຊັນ ຂຶ້ນໄປ.

ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ໃຫ້ຮູ້ວ່າ: ໃນວັນທີ 2 ມິຖຸນາ 2021 ນີ້, ສປປ ລາວ ສາມາດສັກວັກແຊງ ເຂັມທີ 1 ໄດ້ 664.661 ຫຼອດ ແລະ ເຂັມທີ 2 ໄດ້ 249.353 ຫຼອດ, ໃນນັ້ນກຸ່ມສ່ຽງບໍ່ວ່າຈະເປັນແພດໝໍ ຫຼື ພະນັກງານ ຈາກຂະເເໜງການຕ່າງໆ ກໍ່ໄດ້ຮັບວັກແຊງ ປ້ອງກັນໂດຍສ່ວນໃຫຍ່ ແລະຜົນດີ ພວກເຮົາເຫັນວ່າ ການຕິດເຊື້ອໃໝ່ ແມ່ນຫລຸດຈາກຕົວເລກທີ່ທາງທີມງານວິຊາການ ໄດ້ຄາດຄະເນໄວ້ສໍາລັບການລະບາດຮອບສອງໃນຄັ້ງນີ້. ແຕ່ເຖິງຢ່າງໃດກໍ່ຕາມ ພວກເຮົາກໍ່ບໍ່ຄວນຈະດີໃຈເກີນ ກັບການລາຍງານຈໍານວນຕິດເຊື້ອໃໝ່ ທີ່ຫລຸດລົງໃນແຕ່ລະວັນ ເພາະປະເທດ ຍັງບໍ່ທັນສາມາດຢຸດຢັ້ງວົງຈອນຂອງການແຜເຊື້ອໃນຄັ້ງນີ້ໄດ້ເທື່ອ. ມາຮອດປັດຈຸບັນ ຍັງສັງເກດເຫັນວ່າ ຍັງມີບາງແຂວງທີ່ອັດຕາການສັກວັກແຊງປ້ອງກັນໂຄວິດ-19 ຍັງຕໍ່າກວ່າຄາດໝາຍຫລາຍ ຍ້ອນປະຊາຊົນຍັງລັງເລໃນການໄປສັກວັກແຊງ ເພາະຄິດວ່າ ແຂວງຕົນເອງຍັງບໍ່ມີກໍລະນີຕິດເຊື້ອເທື່ອ, ໂດຍໄດ້ມີຄວາມເຊື່ອໃນສື່ສັງຄົມອອນລາຍທີ່ບິດເບືອນ ຈຶ່ງເຮັດໃຫ້ຍັງບໍ່ທັນຕັດສິນໃຈໄປສັກຢາວັກແຊງ.

ທ່ານ ສີສະຫວາດ ສຸດທານີລະໄຊ ໄດ້ຢໍ້າຕື່ມວ່າ: ຖ້າເກີດມີການລະບາດແລ້ວຈຶ່ງມາສັກວັກແຊງ ກໍ່ບໍ່ສາມາດປ້ອງກັນໄດ້ທັນ ເພາະຕ້ອງໃຊ້ເວລາຢ່າງໝ້ອຍ 1 ເດືອນ ຈຶ່ງເຮັດໃຫ້ຮ່າງກາຍຫລັງຈາກໄດ້ຮັບວັກແຊງປ້ອງກັນ ສາມາດຖືກກະຕຸ້ນພູມປ້ອງກັນ (ເມັດເລືອດຂາວໃຫ້ເພີ່ມຂຶ້ນ) ເພື່ອຕ້ານກັບການຕິດເຊື້ອໂຄວິດ-19 ໄດ້.

ດັ່ງນັ້ນ, ຈຶ່ງຮຽກຮ້ອງມາຍັງອໍານາດການປົກຄອງທ້ອງຖິ່ນ, ພະແນກສາທາລະນະສຸກແຂວງ ກໍຄື ພະແນກການອື່ນໆ ລົງກວດກາ, ຊີ້ນໍາຢ່າງໃກ້ຊິດ ໃນບັ້ນການສັກຢາປ້ອງກັນໃນແຂວງຂອງຕົນ ວ່າບັນລຸໃນເປົ້າ ໝາຍທີ່ໄດ້ວາງໄວ້ຫລືບໍ່, ຖ້າບໍ່ທັນບັນລຸ ກໍ່ໃຫ້ຮີບຮ້ອນເລັ່ງຂະບວນການສັກຢາ ໃຫ້ບັນລຸຄາດໝາຍທີ່ທາງກະຊວງສາທາລະນະສຸກໄດ້ວາງໄວ້, ໂດຍສະເພາະກຸ່ມສ່ຽງ ຫາກໄດ້ຮັບວັກແຊງຄົບ ທັງສອງຫຼອດ ກໍ່ຈະເຮັດໃຫ້ ທ່າອ່ຽງຂອງການລະບາດໂຄວິດ-19 ຢູ່ ສປປ ລາວ ບໍ່ສາມາດແຜ່ລາມໄປໄດ້, ດັ່ງທີ່ພວກເຮົາເຫັນຫລາຍປະເທດ ທີ່ມີອັດຕາການສັກວັກແຊງສູງ ເລີ່ມຜ່ອນຜັນບັນດາມາດຕະການໃນສັງຄົມ ຕະຫລອດຮອດການເດີນທາງ.

ຂ່າວລາວ