ຄະນະສະເພາະກິດເລັ່ງຕິດຕາມ7ຄົນ ທີ່ເປັນຜູ້ສໍາຜັດໃກ້ຊິດກັບຜູ້ຕິດເຊື້ອພະຍາດໂຄວິດ-19

ຄະນະສະເພາະກິດເລັ່ງຕິດຕາມ7ຄົນ ທີ່ເປັນຜູ້ສໍາຜັດໃກ້ຊິດກັບຜູ້ຕິດເຊື້ອພະຍາດໂຄວິດ-19

ຈາກກໍລະນີ ຊາຍຊາວຈີນ 2 ຄົນຕິດເຊື້ອພະຍາດໂຄວິດ-19 ທີ່ໄດ້ລັກລອບເຂົ້າມາ ເມືອງຕົ້ນເຜິ້ງ ແຂວງບໍ່ແກ້ວ ໃນວັນທີ 24 ພະຈິກ 2020 ຈາກຝັ່ງປະເທດມຽນມາ ກ່ອນຈະລັກກັບໄປປະເທດຈີນ ແລະ ຖືກຈັບ ໂດຍພວກດັ່ງກ່າວນັ້ນໃຊ້ເສັ້ນທາງຜ່ານແຂວງບໍ່ແກ້ວ ແລະ ແຂວງຫຼວງນໍ້າທາ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19

ທ່ານ ສົມດີ ດວງດີ ໄດ້ໃຫ້ທິດຊີ້ນໍາ ມື້ວັນທີ 6 ທັນວາ 2020 ທີ່ຜ່ານມາໃຫ້ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ແລະ ແຂວງຫຼວງນໍ້າທາ ເລັ່ງຕິດຕາມ 7 ຄົນ ທີ່ເປັນຜູ້ສໍາຜັດໃກ້ຊິດໂດຍກົງກັບຊາຍຈີນ 2 ຄົນດັ່ງກ່າວ ໃນ ຄະຂະນະທີ່ພັກເຊົາຢູ່ແຂວງບໍ່ແກ້ວ ແລະ ແຂວງຫຼວງນໍ້າທາ ກ່ອນທີ່ຈະລັກຂ້າມຊາຍແດນກັບ ໄປປະເທດຂອງຕົນ

ທ່ານສົມດີ ຍັງໄດ້ຊີ້ນໍາໃຫ້ອໍານາດການປົກຄອງແຂວງ ບໍ່ແກ້ວ ປິດເມືອງຕົ້ນເຜິ້ງ ໂດຍບໍ່ອະນຸຍາດໃຫ້ຄົນເຂົ້າ-ອອກ ໃນໄລຍະ 14 ວັນ ແລະ ໃຫ້ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອຢ່າງເຂັ້ມງວດ ພ້ອມນັ້ນໃຫ້ເກັບຕົວຢ່າງທຸກຄົນທີ່ມີອາການທາງລະບົບຫາຍໃຈ ຫຼື ເປັນໄຂ້ ມາກວດວິເຄາະຫາເຊື້ອພະຍາດດັ່ງກ່າວ

ສະເພາະແຂວງຫຼວງນ້ໍາທາໃຫ້ປິດເຂດເສດຖະກິດພິເສດ ບໍ່ເຕັນ ໂດຍບໍ່ອະນຸຍາດໃຫ້ຄົນ ເຂົ້າ-ອອກ ໃນໄລຍະ 14 ວັນເຊັ່ນກັນ ແລະ ໃຫ້ເກັບຕົວຢ່າງທຸກຄົນທີ່ມີອາການທາງລະບົບຫາຍໃຈ ຫຼື ເປັນໄຂ້ ມາກວດວິເຄາະຫາເຊື້ອພະຍາດ ດັ່ງກ່າວ ແລະ ໃຫ້ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ແລະ ແຂວງຫຼວງນໍ້າທາ ເພີ່ມມາດຕະການ ຕິດຕາມກວດກາຜູ້ຈະເດີນທາງເຂົ້າມາໃນແຂວງຂອງຕົນກວ່າເກົ່າ.

ຂໍ້ມູນ: ກອງເລຂາຕ້ານໂຄວິດ-19

ຂ່າວລາວ