ປະຫວັດການເດີນທາງຜູ້ຕິດເຊື້ອໃໝ່ 2ກໍລະນີວັນທີ 07/12/2020

ປະຫວັດການເດີນທາງຜູ້ຕິດເຊື້ອໃໝ່ 2ກໍລະນີວັນທີ 07/12/2020

ສປປ ລາວ ກວດພົບຜູ້ຕິດເຊື້ອໂຄວິດ-19 ເພີ່ມ 2 ກໍລະນີ: ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມໂຄວິດ19 ຖະແຫລງຕອນເຊົ້າວັນທີ 7 ທັນວາ 2020 ເຖິງວຽກງານກວດວິເຄາະຫາເຊື້ອວ່າ: ວັນທີ 6 ທັນວາ, ຄະນະສະເພາະກິດໄດ້ກວດພົບຜູ້ຕິດເຊື້ອໃໝ່ທັງໝົດ 2 ຄົນຄື ຄົນທໍາອິດເປັນຄົນສັນຊາດຣັດເຊຍ, ອາຍຸ 65 ປີ, ອາຊີບນັກບິນ, ຄົນທີສອງສັນຊາດລາວ, ອາຍຸ 19 ປີ, ອາຊີບນັກສຶກສາ (ຮຽນຢູ່ປະເທດຣັດເຊຍ) ທັງສອງໄດ້ຖືກກວດພົບເຊື້ອໂຄວິດ-19 ໃນຂະນະທີ່ຈໍາກັດບໍລິເວນຢູ່ໃນສະຖານທີ່ກັກກັນບໍລິເວນ, ອີງຕາມການລາຍງານຈາກຕາງໜ້າຄະນະສະເພາະກິດ, ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃນຕອນເຊົ້າວັນທີ 7 ທັນວາ 2020.

ຄະນະສະເພາະກິດໃຫ້ຮູ້ວ່າ: ຜູ້ຕິດເຊື້ອສັນຊາດຣັດເຊຍ ຫຼືກໍລະນີທີ 40 ນີ້, ກ່ອນຜູ້ກ່ຽວເດີນທາງເຂົ້າມາ ສປປ ລາວ ແມ່ນໄດ້ຮັບການກວດຫາເຊື້ອໂຄວິດ-19 ຢູ່ປະເທດອິນໂດເນເຊຍໃນວັນທີ 02 ທັນວາ ແຕ່ບໍ່ພົບເຊື້ອ, ວັນທີ 05 ທັນວາ ໄດ້ເດີນທາງຈາກປະເທດມາເລເຊຍ ຜ່ານປະເທດໄທ ແລະມາຮອດປະເທດລາວ ຈຶ່ງໄດ້ຖືກເກັບຕົວຢ່າງທີ່ສະໜາມບິນວັດໄຕ ພ້ອມຈຳກັດບໍລິເວນທີ່ໂຮງແຮມແຫ່ງໜຶຶ່ງໃນນະຄອນຫຼວງ ທີ່ຄະນະສະເພາະກິດກຳນົດໄວ້. ວັນທີ 06 ທັນວາ ຜູ້ກ່ຽວມີອາການເຈັບຄໍ ແລະໜາວສັ່ນ ແຕ່ບໍ່ມີອາການໄຂ້ ສຸດທ້າຍຜົນກວດຢັ້ງຢືນວ່າຕິດເຊື້ອໂຄວິດ-19 ເຊິ່ງຜູ້ໃກ້ຊິດຜູ້ກ່ຽວມີ 20 ຄົນ ສ່ວນໃຫຍ່ແມ່ນນັກບິນ ແລະນາຍຊ່າງ.

ສ່ວນຜູ້ຕິດເຊື້ອສັນຊາດລາວ ຫຼືກໍລະນີທີ 41 ນັ້ນ, ກ່ອນເດີນທາງມາ ສປປ ລາວ ໃນວັນທີ 23 ພະຈິກ 2020 ໄດ້ກວດໂຄວິດ-19 ດ້ວຍ RT-PCR ຢູ່ປະເທດຣັດເຊຍ ແຕ່ບໍ່ພົບ. ວັນທີ 28 ພະຈິກ ເດີນທາງຈາກສະໜາມບິນຂອງປະເທດລັດເຊຍ Moscow (Domodeovo) ໂດຍຖ້ຽວບິນພິເສດ ABG 9985/9986 ມາຮອດສະໜາມບິນວັດໄຕ ປະເທດລາວ ພ້ອມໄດ້ຖືກກັກບໍລິເວນ ແລະກວດຫາເຊື້ອໂຄວິດ-19 ແຕ່ບໍ່ພົບ, ຫຼັງຈາກນັ້ນໄດ້ຮັບການກວດຫາເຊື້ອອີກຄັ້ງ, ຈົນມາຮອດວັນທີ 06 ທັນວາ ຜົນກວດອອກມາພົບວ່າຕິດເຊື້ອໂຄວິດ-19 ເຊິ່ງຜູ້ໃກ້ຊິດ ມີ 1 ຄົນ ຄືເພື່ອນຮ່ວມຫ້ອງນອນທີ່ກັກບໍລິເວນດ້ວຍກັນ, ເຫຼືອນັ້ນແມ່ນຄົນທີ່ເດີນທາງດ້ວຍຍົນຮ່ວມກັນມີ 79 ຄົນ ແລະເດີນທາງດ້ວຍລົດເມຂົນ-ສົ່ງຜູ້ໂດຍສານທີ່ຈໍາກັດບໍລິເວນ 27 ຄົນ.

ລາຍລະອຽດປະຫວັດການເດີນທາງຜູ້ຕິດເຊື້ອໃໝ່ 2 ກໍລະນີວັນທີ 7 ທັນວາ 2020

ຜູ້ໃກ້ຊິດທັງໝົດຂອງຜູ້ຕິດເຊື້ອໃໝ່ທັງ 2 ຄົນກໍ່ໄດ້ຖືກກວດຫາເຊື້ອໂຄວິດ-19 ແຕ່ບໍ່ພົບເຊື້ອ ແລະໄດ້ຖືກຈໍາກັດບໍລິເວນຕໍ່ໄປ. ປະຈຸບັນ ຜູ້ຕິດເຊື້ອໃໝ່ທັງ 2 ຄົນ ໄດ້ນໍາສົ່ງໄປປິ່ນປົວຢູ່ທີ່ໂຮງໝໍມິດຕະພາບເປັນທີ່ຮຽບຮ້ອຍແລ້ວ. ສ່ວນຜູ້ຕິດເຊື້ອໂຄວິດ-19 ສະສົມໃນ ສປປ ລາວ ມີທັງໝົດ 41 ຄົນ, ແລະກໍາລັງປິ່ນປົວ 15 ຄົນ ປົວຫາຍດີ 26 ຄົນ ແຕ່ບໍ່ມີຜູ້ເສຍຊີວິດ

ຂ່າວລາວ