ເຮັດແທ້ຕໍ່ການລະເມີດຄໍາສັ່ງເລກທີ່ 15/ນຍ ຂອງຊາວປະມົງ

ເຮັດແທ້ຕໍ່ການລະເມີດຄໍາສັ່ງເລກທີ່ 15/ນຍ ຂອງຊາວປະມົງ

ໃນວັນທີ 11 ມິຖຸນາ 2021, ໜ່ວຍງານ 203 ພະແນກສັນຕິບານ ເມືອງຫາດຊາຍຟອງ ນວ, ໄດ້ອອກກວດກາລາດຕະເວນຕາມລໍາແມ່ນໍ້າຂອງ ພົບເຫັນຊາວປະມົງອອກເຮືອຫາປາທີ່ກາຍເວລາກຳນົດ ໂດຍສະເພາະລະເມີດຄໍາສັ່ງເລກທີ່ 15/ນຍ ແລະ ຄໍາສັ່ງຂອງ ປກສ ເມືອງຫາດຊາຍຟອງ ສະບັບເລກທີ 006/ປກສ ຫຟ ລົງວັນທີ 6 ທັນວາ 2020 ວ່າດ້ວຍຄວາມເຂັ້ມງວດ, ໃນການຄຸມຄອງ, ນໍາໃຊ້ເຮືອຫາປະເພດຕ່າງໆ ຕາມລໍາແມ່ນໍ້າຂອງ ໃນໄລຍະຄວບຄຸມ, ປ້ອງກັນການແຜ່ລະບາດຂອງພະຍາດໂຄວິດ-19.

ເຈົ້າໜ້າທີ່ຕໍາຫຼວດໜ່ວຍງານ 203 ພະແນກສັນຕິບານ ເມືອງຫາດຊາຍຟອງ ນວໃຫ້ຮູ້ວ່າ: ນອກຈາກປະຕິບັດຕາມຄໍາສັ່ງເລກທີ່ 15/ນຍ ແລ້ວເຮົາຍັງໄດ້ປະຕິບັດຕາມແຈ້ງ ເລກທີ 006/ປກສ ຫຟ ໄດ້ກຳນົດວ່າ: ເຮືອທີ່ອອກຫາປາ ນອກຈາກຂຶ້ນທະບຽນເຮືອ, ກຳນົດຈຸດຊັດເຈນແລ້ວເຮືອແຕ່ລະລໍາຕ້ອງໄດ້ອອກໃນລະຫວ່າງ 6:00 ໂມງເຊົ້າຫາ 18:00 ໂມງ (ໃຫ້ນໍາເຮືອມາຈອດທຽບທ່າຕາມຈຸດກຳນົດ). ຜ່ານການກວດກາຕົວຈິງພົບເຫັນ ຊາວປະມົງອອກເຮືອຫາປາ ທັງໝົດ 9 ຄົນ ເຈົ້າໜ້າທີ່ໄດ້ເຮັດບົດບັນທຶກປະຫັວດແຕ່ລະຄົນ ແລ້ວໄດ້ເຮັດບົດບັນທຶກສຶກສາອົບຮົມ ພ້ອມທັງ ປັບໄໝຕາມຄໍາສັ່ງເລກທີ 006/ປກສ ຫຟ ແລະ ກ່າວເຕືອນໃຫ້ຢຸດເຊົາຕໍ່ພຶດຕິກໍາດັ່ງກ່າວ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງພໍ່ແມ່ປະຊາຊົນທີ່ອາໃສຢູ່ເຂດຊາຍແດນຕາມລຳແມ່ນ້ຳຂອງຈົ່ງພ້ອມກັນຈັດຕັ້ງປະຕິບັດຄຳສັ່ງ, ຄຳແນະນຳ, ແຈ້ງການຕ່າງໆ ຂອງຂັ້ນເທິງຢ່າງເຂັ້ມງວດ ໂດຍສະເພາະເຈົ້າຂອງເຮືອທຸກປະເພດ, ເຮືອຫາປາ, ເຮືອບັນທຸກສິນຄ້າ, ເຮືອດູດແຮ່-ຊາຍ ແລະ ເຮືອອື່ນໆ ໃຫ້ປະຕິບັດຕາມຄໍາສັ່ງເລກທີ 15/ນຍ ແລະ ຈົ່ງຊ່ວຍກັນເປັນຫູເປັນຕາຊ່ວຍເຈົ້າໜ້າທີ່.

ທັງນັ້ນ ກໍເພື່ອສະກັດກັ້ນການນໍາເຊື້ອພະຍາດເຂົ້າມາແຜ່ລະບາດໃນຊຸມຊົນ, ຖ້າພົບເຫັນບຸກຄົນ, ກຸ່ມຄົນທີ່ເຄື່ອນໄຫວລະເມີດຄຳສັ່ງ, ແຈ້ງການຂອງຄັນເທິງຢູ່ຕາມຊາຍແດນລຳແມ່ນ້ຳຂອງ ຫຼື ພົບເຫັນມີການລັກລອບເຂົ້າເມືອງ ແຈ້ງຂໍ້ມູນມາໃຫ້ເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສ ບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

ຂ່າວລາວ