ຈຸດເລີ່ມຕົ້ນຂອງການສ້າງຮູບປັ້ນ “ປາງຄໍາ” ນັກປາດລາຊະມະຫາກະວີລາວລ້ານຊ້າງ

ຈຸດເລີ່ມຕົ້ນຂອງການສ້າງຮູບປັ້ນ “ປາງຄໍາ” ນັກປາດລາຊະມະຫາກະວີລາວລ້ານຊ້າງ

ເມື່ອເວົ້າເຖິງວັນນະຄະດີຊັ້ນຍອດຂອງລາວ ກໍ່ຄົງຈະບໍ່ມີໃຜທີ່ບໍ່ຮູ້ຈັກ ເລື່ອງ ສັງສິນໄຊ ທີ່ໄດ້ກຳເນີດຂຶ້ນໃນສະໄໝອານາຈັກລາວລ້ານຊ້າງຈະເລີນຮຸ່ງເຮືອງ ແລະ ເປັນບົດວັນນະຄະດີ ທີ່ສຳຄັນຕໍ່ການສຶກສາຮໍ່າຮຽນ ເຊີ່ງແມ່ນ ທ້າວປາງຄໍາ ເປັນຜູ້ແຕ່ງເປັນຄໍາກອນ (ແຕ່ເດີມຜູ້ແຕ່ງໄດ້ແຕ່ງເປັນຄຳຮ້ອຍແກ້ວ) ໃນສະໄໝຂອງສົມເດັດພະເຈົ້າສຸຣິຍະວົງສາ ທຳມິກະລາດ

ໃນອາທິດທີ່ຜ່ານ, ທີ່ ວັດຕົ້ນຕະກຸນສີສົມຊື່ນ ບ້ານ ໜອງບົວທອງເໜືອ ເມືອງ ສີໂຄດຕະບອງ ນະຄອນຫຼວງວຽງຈັນ ໄດ້ມີການຍົກຮູບປັ້ນຂອງ ເຈົ້າປາງຄໍາ ຂຶ້ນແທ່ນ

ຮູບປັ້ນເຈົ້າປາງຄໍານີ້ ແມ່ນການນຳພາສ້າງ ໂດຍ ພຣະອາຈານ ໄພວັນ ມາລາວົງ ນັກກະວີລາງວັນແມ່ນ້ຳຂອງ 2015 ແລະ ນັກກະວີລາງວັນສິນໄຊ 2017 ໂດຍພຣະອາຈານໄພວັນ ມີຈຸດປະສົງຫຼັກໃນການສ້າງ ເພື່ອໃຫ້ຄົນລຸ້ນຫຼັງໄດ້ສຶກສາ ຮຽນຮູ້ ແລະ ລະນຶກເຖິງນັກປາດຜູ້ເປັນບັນພະບຸລຸດຂອງຊາດລາວ

ພຣະອາຈານ ໄພວັນ ມາລາວົງ ຜູ້ນຳພາກໍ່ສ້າງຮູບປັ້ນ ປາງຄໍາ ໄດ້ໃຫ້ສຳພາດຕໍ່ກັບອິນໄຊລາວ ວ່າ: ໃນຄວາມຈິງແລ້ວ ອາຈານຢາກສ້າງໄວ້ຢູ່ເດີນທາງຫຼວງ ຫຼື ສວນສາທາລະນະບ່ອນໃດບ່ອນໜຶ່ງ, ບ່ອນຮຽນຮູ້ ເພື່ອໃຫ້ຄົນລຸ້ນຫຼັງໄດ້ໃຊ້ເປັນບ່ອນສຶກສາຮໍ່າຮຽນ ແລະ ລະນຶກເຖິງນັກປາດລາວຜູ້ມີຄວາມສາມາດ. ໂດຍພຣະອາຈານ ໄດ້ມີໂອກາດ ໄດ້ເດີນທາງໄປໃນຫຼາຍໆປະເທດ ແລະ ເຫັນເຂົາເຈົ້າເຮັດຮູບປັ້ນ ນັກປາດ, ຄູບາອາຈານ ຜູ້ສຳຄັນ ເພື່ອໃຫ້ນັກຮຽນ ນັກສຶກສາ ໄດ້ມາສຶກສາຮໍ່າຮຽນ. ແຕ່ບ້ານເຮົາ ແມ່ນຍັງບໍ່ມີ ແລະ ຮູບເຈົ້າປາງຄໍາ ກໍ່ຖືວ່າເປັນຮູບທຳອິດຂອງລາວ ທີ່ເປັນນັກປາດອາຈານແບບນີ້.

ພຣະອາຈານ ຍັງໄດ້ໃຫ້ຮູ້ຕື່ມວ່າ: ຮູບລັກສະນະຂອງເຈົ້າປາງຄໍາ ແມ່ນລັກສະພື້ນຖານຂອງຄົນລາວ. ຈາກການອ່ານວັນນະຄະດີສັງສິນໄຊແລ້ວ ອາຈານຄິດວ່າ ຜູ້ແຕ່ງນີ້ ອາຍຸປະມານ 40 ກວ່າປີ ແລະ ຈະເປັນນັກປາດທີ່ໄດ້ສິກຂາລາເພດອອກມາ ເພື່ອມາຮັບໃຊ້ໃນວັງ ເຊີ່ງເວລາເພີ່ນຂຽນກະວີ ຫຼືບົດເລື່ອງຕ່າງໆ ການໃຊ້ຄໍາສັບຈະເປັນຄົນທີ່ແຕກສານທີ່ສຸດ. ນອກຈາກປາງຄໍາຈະເປັນນັກກະວີແລ້ວ ຍັງເປັນນັກປົກຄອງ ເຊີ່ງເກັ່ງທັງເລື່ອງການຂຽນ ແລະ ຍຸດທະສາດການຕໍ່ສູ້ ຈື່ງເຮັດໃຫ້ຮູບປາງຄໍາ ມີລັກສະນະດັ່ງທີ່ເຫັນ

ແນວໃດກໍ່ຕາມ, ປັດຈຸບັນ ຍັງຫຼາຍຂັ້ນຕອນ ທີ່ຈະເຫັນໃຫ້ການສ້າງສຳເລັດ ເປັນຕົ້ນແມ່ນ ການສ້າງຮົ້ວ, ຕິດຫີນອ່ອນ ທັງ 4 ດ້ານຂອງແທ່ນ ໂດຍແຕ່ລະຂ້າງຈະປະກອບມີປະຫວັດຕ່າງໆ ເພື່ອໃຫ້ໄດ້ສຶກສາ. ຫຼັງຈາກສຳເລັດທຸກຂັ້ນຕອນແລ້ວ ທາງວັດຈື່ງຈະເປີດໃຫ້ເຂົ້າມາສຶກສາຮໍ່າຮຽນໄດ້

ສາລະໜ້າຮູ້