ຜູ້ລັກລອບກັບຄືນປະເທດອາດນໍາເຊື້ອພະຍາດໂຄວິດມາລະບາດແບບບໍ່ຮູ້ຕົວ

ຜູ້ລັກລອບກັບຄືນປະເທດອາດນໍາເຊື້ອພະຍາດໂຄວິດມາລະບາດແບບບໍ່ຮູ້ຕົວ

ການລັກລອບກັບຄືນປະເທດແບບຜິດກົດໝາຍຂອງແຮງງານລາວຈາກປະເທດທີ່ມີການແຜ່ລະບາດຂອງພະຍາດໂຄວິດ-19 ບໍ່ວ່າ ຈະເປັນທາງບົກ ຫຼື ທາງນໍ້າ ໄດ້ສ້າງຄວາມ ກັງວົນ ໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງ ພະຍາດໂຄວິດ-19,  ເພາະວ່າຖ້າຜູ້ທີ່ລັກ ລອບເຂົ້າມານັ້ນຫາກຕິດເຊື້ອພະຍາດໂຄວິດ-19 ໂດຍທີ່ບໍ່ຮູ້ສຶກຕົວອາດນໍາເຊື້ອພະຍາດ ດັ່ງກ່າວມາແຜ່ລະບາດຢູ່ໃນຄອບຄົວ ແລະ ຊຸມຊົນ.

ດັ່ງນັ້ນເພື່ອປ້ອງກັນພະຍາດດັ່ງກ່າວ, ເມື່ອທ່ານພົບເຫັນຜູ້ລັກລອບກັບຄືນປະເທດຄວນແຈ້ງນາຍບ້ານ, ເຈົ້າໜ້າທີ່ປ້ອງກັນຄວາມສະຫງົບ ແລະ ສາຍດ່ວນກະຊວງສາທາລະນະສຸກທີ່ເບີ 166 ຫຼື 165 ທັນທີເພື່ອໃຫ້ກຸ່ມຄົນດັ່ງກ່າວໄດ້ກວດຫາເຊື້ອ ແລະ ຈໍາກັດບໍລິເວນ 14 ວັນ.

ຄະນະສະເພາະກິດໃຫ້ຮູ້ຕື່ມວ່າ: ຖ້າແຮງ ງານລາວກັບຄືນມາປະເທດແບບຖືກລະບຽບເຖິງແມ່ນວ່າພວກເຂົາຕິດເຊື້ອພະຍາດໂຄວິດ-19 ສາຍພັນໃດໜຶ່ງມາ ພວກເຮົາ ສາ ມາດປ້ອງກັນໄດ້ຍ້ອນວ່າເມື່ອຜ່ານດ່ານເຂົ້າມາສາມາດກວດສອບປະຫວັດ ແລະ ສາ ມາດເກັບຕົວຢ່າງພວກກ່ຽວໄປກວດຫາເຊື້ອໄດ້ ນອກນັ້ນເມື່ອບໍ່ພົບເຊື້ອກໍ່ສາມາດນຳ ພວກກ່ຽວເຂົ້າໄປຈຳກັດບໍລິເວນ 14 ວັນ ຢູ່ສູນທີ່ຄະນະສະເພາະກິດກຳນົດໄວ້ໄດ້ ຊຶ່ງຕ່າງຈາກຜູ້ທີ່ລັກລອບເຂົ້າມາ ເມື່ອຕິດເຊື້ອມາໂດຍບໍ່ຮູ້ຕົວກໍ່ຈະແຜ່ເຊື້ອຕໍ່ສະມາຊິກໃນຄອບຄົວ ແລະ ຊຸມຊົນ. ນອກນັ້ນຮຽກຮ້ອງໃຫ້ທຸກຊັ້ນຄົນໃນສັງຄົມ ຍົກສູງສະຕິຄວາມຮັບຜິດຊອບຂອງຕົນ ໃນການປະຕິບັດມາດຕະການປ້ອງກັນການຕິດເຊື້ອຢ່າງຖືກຕ້ອງ ແລະ ເຄັ່ງຄັດ ເປັນຕົ້ນ ແມ່ນ ການດຳລົງຊີວິດປົກກະຕິແບບໃໝ່, ການຮັກສາໄລຍະຫ່າງທາງສັງຄົມ, ໃສ່ຜ້າອັດປາກ-ດັງ ເມື່ອອອກຈາກບ້ານ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວເຫຼົ້າ 70 % ຂຶ້ນໄປ, ຫຼີກລ້ຽງການເດີນ ທາງໄປສະຖານທີ່ ທີ່ມີຄວາມສ່ຽງ, ຖ້າຫາກ ທ່ານຮູ້ສຶກບໍ່ສະບາຍ ຫຼື ມີປະຫວັດສຳຜັດ ໃກ້ຊິດກັບຜູ້ຕິດເຊື້ອ ຫຼື ເດີນທາງໄປຍັງ ສະຖານທີ່ ທີ່ຜູ້ຕິດເຊື້ອເດີນທາງໄປ ໃຫ້ທ່ານຮີບຮ້ອນໄປພົບແພດ ເພື່ອເກັບຕົວຢ່າງກວດຊອກຫາເຊື້ອ ແລະ ຈຳກັດບໍລິເວນຕົນເອງ 14 ວັນ.

ຂ່າວລາວ