ແຂວງຄຳມ່ວນ ສັກວັກຊິນປ້ອງກັນໂຄວິດ ໄດ້ 58 ພັນກວ່າຄົນແລ້ວ

ແຂວງຄຳມ່ວນ ສັກວັກຊິນປ້ອງກັນໂຄວິດ ໄດ້ 58 ພັນກວ່າຄົນແລ້ວ

ຕາມການລາຍງານຂອງຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ແຂວງຄໍາມ່ວນ ໃຫ້ຮູ້ວ່າ: ປັດຈຸບັນ, ແຂວງຄຳມ່ວນ ກໍຄືບັນດາແຂວງໃນຂອບເຂດທົ່ວປະເທດ ກຳລັງເລັ່ງໃຫ້ບໍລິການສັກວັດກຊິນ ປ້ອງກັນພະຍາດໂຄວິດ-19 ໃຫ້ແກ່ພະນັກງານ, ທະຫານ, ຕຳຫລວດ ແລະ ພໍ່ແມ່ປະຊາຊົນ ໃຫ້ບັນລຸຕາມແຜນການທີ່ກຳນົດໄວ້, ເຊິ່ງມາຮອດປັດຈຸບັນ ທົ່ວແຂວງ ສັກວັກຊິນ ໄດ້ແລ້ວ 58.590 ຄົນ.

ແຂວງຄຳມ່ວນ ໄດ້ຮັບວັກຊິນຈາກສູນກາງທັງໝົດ 4 ຄັ້ງ, ເຊິ່ງປະກອບມີ ວັກຊິນ ຊີໂນຟາມ 80.600 ໂດສ ແລະ ວັກຊິນ ແອັສຕຣາຊີເນກາ 6.000 ໂດສ ເຊິ່ງໄດ້ບໍລິການສັກວັກຊິນໃຫ້ກັບພະນັກງານ, ທະຫານ, ຕຳຫຼວດ ແລະ ພໍ່ແມ່ປະຊາຊົນໄດ້ແລ້ວ 58.590 ຄົນ. ໃນນັ້ນ ເຂັມທີ 1 ສັກໄດ້ 37.407 ຄົນ ແລະ ເຂັມທີ 2 ສັກໄດ້ 21.183 ຄົນ. ພ້ອມນັ້ນ, ຍັງຈະໄດ້ສືບຕໍ່ສະເໜີຂັ້ນສູນກາງ ເພື່ອນໍາເອົາວັກຊິນ ມາສັກໃຫ້ພໍ່ແມ່ປະຊາຊົນໃຫ້ບັນລຸໃນລະດັບ 50% ຂອງປະຊາກອນໃນທົ່ວແຂວງ ຫລື ເທົ່າກັບ 219.831 ຄົນ.

ປັດຈຸບັນ, ທົ່ວແຂວງຄຳມ່ວນ ກວດພົບຈຳນວນຜູ້ຕິດເຊື້ອໂຄວິດ-19 ສະສົມທັງໝົດ 16 ກໍລະນີ, ເຊິ່ງຈໍານວນຜູ້ຕິດເຊື້ອທັງໝົດ ແມ່ນແຮງງານລາວທີ່ເດີນທາງມາຈາກປະເທດເພື່ອນບ້ານ. ໃນນັ້ນ, ປິ່ນປົວຫາຍດີ ແລະ ອອກຈາກໂຮງໝໍແລ້ວ 6 ຄົນ ແລະ ຍັງສືບຕໍ່ປິ່ນປົວ 10 ຄົນ.

ຂ່າວລາວ