ແຂວງຈໍາປາສັກ ພົບບັນຫາສະຖານທີບໍ່ພຽງພໍ ຫຼັງຈາກແຮງງານລາວກັບຄືນປະເທດ

ແຂວງຈໍາປາສັກ ພົບບັນຫາສະຖານທີບໍ່ພຽງພໍ ຫຼັງຈາກແຮງງານລາວກັບຄືນປະເທດ

ລາຍງານວ່າ: “ແຂວງ ຈໍາປາສັກ ກໍາລັງປະສົບກັບບັນຫາສະ ຖານທີ່ປິ່ນປົວຜູ້ຕິດເຊື້ອພະຍາດໂຄວິດ-19 ບໍ່ພຽງພໍກັບຄວາມຕ້ອງການ ເນື່ອງຈາກຈຳນວນຜູ້ຕິດເຊື້ອເພີ່ມຂຶ້ນເປັນຈຳນວນຫລາຍໃນໄລຍະນີ້ ເຮັດໃຫ້ອົງການປົກຄອງແຂວງ ຕ້ອງຂໍຄວາມຊ່ວຍເຫລືອຈາກຄະນະສະເພາະກິດຂັ້ນສູນກາງ ແລະ ບັນດາແຂວງເພື່ອໄປຮັບເອົາແຮງງານຂອງຕົນທີ່ເດີນທາງຜ່ານດ່ານສາກົນວັງເຕົາ-ຊ່ອງເມັກ” ໂດຍຂໍ້ມູນນີ້ ຖືກເປີດເຜີຍໂດຍ ດຣ ວຽງສີ ສຸພັກດີ ຫົວໜ້າພະແນກສາທາລະນະສຸກແຂວງຈໍາປາສັກ

ຫົວໜ້າພະແນກສາທາລະນະສຸກແຂວງຈໍາປາສັກ ໃຫ້ຮູ້ຕື່ມວ່າ: ເພື່ອແກ້ໄຂບັນຫາທີ່ເກີດຂຶ້ນ, ອົງການປົກຄອງແຂວງ ຈະນຳໃຊ້ຫໍພັກວິທະຍາໄລການເງິນພາກໃຕ້ເປັນໂຮງໝໍພາກສະໜາມອີກແຫ່ງໜຶ່ງຂອງແຂວງ ແຕ່ຈະຮອງຮັບບໍ່ໄດ້ຫລາຍ, ຖ້າຫາກມີຜູ້ຕິດເຊື້ອເພີ່ມຂຶ້ນຈຳນວນ ຫລາຍຈະເຮັດໃຫ້ບໍ່ສາມາດຮອງຮັບຜູ້ຕິດເຊື້ອໄດ້ອີກ. ພ້ອມ ແນະນຳໃຫ້ແຮງງານລາວ ຫັນໄປເດີນທາງຜ່ານດ່ານສາກົນອື່ນແທນ

ພ້ອມນີ້ ຮຽກຮ້ອງໃຫ້ຄະນະສະ ເພາະກິດຂັ້ນສູນກາງຫາວິທີໃຫ້ການຊ່ວຍ ເຫລືອຢ່າງຮີບດ່ວນ ແລະ ຮຽກຮ້ອງມາຍັງແຂວງບັນດາແຂວງໃນທົ່ວປະເທດທີ່ມີແຮງງານຂອງຕົນເດີນທາງເຂົ້າປະເທດໂດຍຜ່ານດ່ານສາກົນວັງເຕົາ-ຊ່ອງເມັກ ໃຫ້ໄປຮັບເອົາແຮງງານຂອງຕົນໄປຈຳກັດບໍລິ ເວນ ເພື່ອຫລີກຫລ່ຽງບໍ່ໃຫ້ຈຳກັດບໍລິເວນຢູ່ແຂວງຈຳປາສັກ.

ສຳລັບແຂວງຈຳປາສັກ ມາຮອດວັນທີ 7 ກໍລະກົດນີ້ ມີຜູ້ຕິດເຊື້ອສະສົມທັງໝົດ 571 ຄົນ, ໃນນີ້ ປິ່ນປົວດີ 371 ຄົນ ແລະ ກຳລັງປິ່ນປົວ 200 ຄົນ.

ຂ່າວລາວ