ປັດຈຸບັນຍັງມີຜູ້ຕິດເຊື້ອໂຄວິດ–19 ນອນປິ່ນປົວຢູ່ໂຮງໝໍ 7ຄົນ

ປັດຈຸບັນຍັງມີຜູ້ຕິດເຊື້ອໂຄວິດ–19 ນອນປິ່ນປົວຢູ່ໂຮງໝໍ 7ຄົນ

ສປປ ລາວ ບໍ່ພົບຜູ້ຕິດເຊື້ອພະຍາດໂຄວິດ – 19 ເພີ່ມ, ຍອດຕິດເຊື້ອສະສົມຢູ່ທີ່ 41 ກໍລະນີ ປັດຈຸບັນຍັງນອນປິ່ນປົວຢູ່ໂຮງໝໍ 7 ຄົນ. ສ່ວນສະພາບການໃນທົ່ວໂລກຍັງໜ້າເປັນຫ່ວງ ເນື່ອງຈາກມີຕົວເລກຜູ້ຕິດເຊື້ອສະສົມທົ່ວໂລກຫຼາຍເຖິງ 73 ລ້ານກວ່າຄົນ. ທ່ານ ດຣ. ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານສະພາບການລະບາດຂອງພະຍາດໂຄວິດ – 19 ປະຈຳວັນທີ 15 ທັນວາ 2020 ວ່າ: ມາຮອດວັນທີ 15 ທັນວາ 2020, ທົ່ວໂລກມີການລາຍງານການລະບາດພະຍາດໂຄວິດ – 19 ທັງໝົດ 218 ( ປະເທດ/ເຂດ ) ເຊິ່ງມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ຈຳນວນ 73.143.329 ຄົນ, ເສຍຊີວິດ 1.627.046 ຄົນ ກວມເອົາ 3,17% ຂອງຜູ້ຕິດເຊື້ອທັງໝົດ; ປິ່ນປົວຫາຍດີ 51.263.541 ຄົນ ກວມເອົາ 70% ຂອງຜູ້ຕິດເຊື້ອທັງໝົດ.

ຮອດ 17:00 ໂມງ ຂອງວັນທີ 14 ທັນວາ 2020 ທົ່ວປະເທດມີຜູ້ເດີນທາງເຂົ້າມາທັງໝົດ 2.051 ຄົນ; ໃນນັ້ນຈຸດຜ່ານດ່ານ ລາວ – ໄທ 1.087 ຄົນ, ຈຸດຜ່ານດ່ານ ລາວ – ຈີນ 29 ຄົນ, ຈຸດຜ່ານດ່ານ ລາວ – ຫວຽດນາມ 655 ຄົນ; ຜ່ານທາງສະໜາມບິນສາກົນວັດໄຕ 280 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ 40 ສູນ, ມີຜູ້ຖືກຈຳກັດບໍລິເວນຢູ່ສູນ 1.906 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ໃນວັນທີ 14 ທັນວາ 2020 ໄດ້ເກັບຕົວຢ່າງມາກວດວິເຄາະທັງໝົດ 678 ຄົນ, ໃນນັ້ນມີ 148 ຕົວຢ່າງຈາກບຸກຄົນທົ່ວໄປບໍ່ມີອາການ, ແຮງງານລາວມາແຕ່ໄທ 272 ຕົວຢ່າງ, ແຮງງານຈີນ138 ຕົວຢ່າງ, ແຮງງານຫວຽດນາມ 117 ຕົວຢ່າງ, 3 ຕົວຢ່າງຈາກຜູ້ຕິດເຊື້ອນໍ້າເບີ 35, 37 ແລະ 39 ມາກວດຄືນ.

ຜົນກວດວິເຄາະທັງໝົດແມ່ນບໍ່ພົບເຊື້ອ ໝາຍຄວາມວ່າວັນທີ 14 ທັນວາ 2020 ບໍ່ພົບຜູ້ຕິດເຊື້ອໃໝ່; ສັງລວມການກວດວິເຄາະແຕ່ເດືອນມັງກອນ ຮອດວັນທີ 14 ທັນວາ 2020 ໄດ້ເກັບຕົວຢ່າງມາກວດທັງໝົດ 85.742 ຕົວຢ່າງ, ກວດພົບເຊື້ອສະສົມ 41 ຕົວຢ່າງ.

ມາຮອດປັດຈຸບັນຍັງມີຄົນເຈັບຕິດເຊື້ອພະຍາດໂຄວິດ – 19 ຈຳນວນ 7 ຄົນ ທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້, ທຸກຄົນແມ່ນມີອາການເບົາບາງ.

ດັ່ງນັ້ນ, ຈຶ່ງຂໍຮຽກຮ້ອງໃຫ້ທຸກພາກສ່ວນໃນສັງຄົມ ຈົ່ງເປັນເຈົ້າການຮ່ວມກັນໃນການປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກ ສະບັບເລກທີ 1291/ຫສນຍ ລົງວັນທີ 26 ພະຈິກ 2020 ແລະ ຄຳແນະນຳຂອງຂະແໜງການກ່ຽວຂ້ອງຢ່າງເຄັ່ງຄັດ. ພ້ອມດຽວກັນນັ້ນ, ກໍໃຫ້ເອົາໃຈໃສ່ປະຕິບັດມາດຕະການປ້ອງກັນການຕິດເຊື້ອຢ່າງຖືກຕ້ອງ ແລະ ເຂັ້ມງວດ ພ້ອມທັງສືບຕໍ່ປະຕິບັດວິຖີການດຳລົງຊີວິດປົກກະຕິແບບໃໝ່ໃຫ້ກາຍເປັນຄວາມຊິນເຄີຍ.

ຂ່າວລາວ