ທ່ານນາງ ປານີ ແມ່ຍິງລາວທີ່ມີພາລະບົດບາດທາງການເມືອງ ເສດຖະກິດ ຂອງສປປ ລາວ

ທ່ານນາງ ປານີ ແມ່ຍິງລາວທີ່ມີພາລະບົດບາດທາງການເມືອງ ເສດຖະກິດ ຂອງສປປ ລາວ

ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ (20 ກໍລະກົດ 1955-2021) ເພື່ອເປັນການຫວນຄືນປະຫວັດມູນເຊື້ອອັນດີງາມຂອງແມ່ຍິງລາວ ໂດຍສະເພາະກໍ່ແມ່ນສະຫະພັນແມ່ຍິງລາວ ທີ່ມີການເຕີບໃຫຍ່ຂະຫຍາຍຕົວຕະຫຼອດໄລຍະ 66 ປີ ການຕໍ່ສູ້ອັນພິລະອາດຫານ, ລະອິດລະອ້ຽວຍືດເຍື້ອຍາວນານບໍ່ຍອມຈຳນົນ ແລະ ຄຽງບ່າຄຽງໄຫຼ່ກັບເພດຊາຍໃນພາລະກິດປົດປ່ອຍຊາດໃນອາດິດ ແມ່ຍິງລາວໄດ້ເປັນກຳລັງແຮງທີ່ສຳຄັນໃນການຕໍ່ສູ້ກູ້ຊາດ.

ໃນປັດຈຸບັນ, ກໍ່ມີແມ່ຍິງລາວຫຼາຍໆທ່ານ ທີ່ມີພາລະບົດບາດທາງການເມືອງ, ເສດຖະກິດ, ວັດທະນະທຳ-ສັງຄົມ, ປະຕິບັດໜ້າທີ່ປົກປ້ອງສິດຜົນປະໂຫຍດອັນຊອບຂອງແມ່ຍິງລາວ ເປັນຕົ້ນແມ່ນ: ທ່ານ ນາງ ປານີ ຢາທໍ້ຕູ້ ຮອງປະທານປະເທດ ແຫ່ງ ສປປ ລາວ ແລະ ຖືວ່າເປັນແມ່ຍິງລາວ ຄົນທຳອິດ ທີ່ດຳລົງຕໍາແໜ່ງເປັນຮອງປະທານປະເທດ.

ທ່ານ ນາງ ປານີ ຢາທໍ່ຕູ້ເປັນລູກສາວຂອງ“ທ່ານ ທໍ່ຕູູ້ ຢາໄຊຈູ ນັກສູ້ທົ່ງໄຫຫີນ ວິລະຊົນແຫ່ງຊາດລາວ” ເກີດເມື່ອວັນທີ 18 ກຸມພາ 1951 ຢູ່ບ້ານສາມແຈ ເມືອງໜອງແຮດ ແຂວງຊຽງຂວາງ ເປັນປະຊາຊົນຄົນລາວ ເຜົ່າມົ້ງ ເລີ່ມເຂົ້າການປະຕິວັດ ຕັ້ງແຕ່ວັນທີ 19 ພຶດສະພາ 1976 ແລະ ເຂົ້າພັກ ວັນທີ 19 ຕຸລາ 1979.

ການເຄື່ອນໄຫວໂດຍຫຍໍ້ໃນແຕ່ລະໄລຍະ ປີ 1971-1975 ເປັນນັກສຶກສາທີ່ສາທາລະນະລັດສັງຄົມນີຍົມຫວຽດນາມ, ປີ 1976-1977 ເປັນຮອງພະແນກງົບປະມານ ຢູ່ທະນາຄານພິເສດນະຄອນຫລວງວຽງຈັນ, ປີ 1977-1978 ເປັນພະນັກງານຂົນຂວາຍ ຢູ່ນະຄອນຫລວງວຽງຈັນ ແລະ ເປັນຫົວໜ້າ ສູນຝຶກອົບຮົມວິຊາການ ທະນາຄານ ແຫ່ງລັດ.,ປີ 1978-1979 ເປັນຮອງກົມເງິນຕາ.ປີ 1979-1982 ເປັນຫົວໜ້າເງິນຕາ.ປີ 1982-1983 ເປັນຫົວໜ້າກົມເສດຖະກິດ ແລະ ແຜນການ.ປີ 1983-1986 ເປັນຫົວໜ້າກົມລົງທຶນ ກໍ່ສ້າງພື້ນຖານ.ປີ 1986-1987 ເປັນຮອງຜູ້ວ່າການທະນາຄານ ແຫ່ງ ສປປ ລາວ.ປີ 1987-1992 ເປັນກຳມະການສຳຮອງສູນກາງພັກ, ຜູ້ວ່າການທະນາຄານ ແຫ່ງ ສປປ ລາວ.ປີ 1996-1997 ເປັນກຳມະການສູນກາງພັກ, ຜູ້ວ່າການທະນາຄານ ແຫ່ງ ສປປ ລາວ.ປີ 1997-2001 ເປັນກຳມະການສູນກາງພັກ, ສະມາຊິກສະພາແຫ່ງຊາດຊຸດທີ IV, ກຳມະການຄະນະປະຈຳ, ຜູ້ປະຈຳການ ຄະນະປະຈຳສະພາແຫ່ງຊາດ ແລະ ທັງເປັນຫົວໜ້າຄະນະກຳມະການບັນດາເຜົ່າ.ປີ 2002-2006 ເປັນກຳມະການສູນກາງພັກ, ສະມາຊິກສະພາແຫ່ງຊາດຊຸດທີ V, ຮອງປະທານສະພາແຫ່ງຊາດ, ກຳມະການຄະນະປະຈຳ, ຜູ້ປະຈຳການຄະນະສະພາແຫ່ງຊາດ.ປີ 2006 – 2010 ເປັນກຳມະການກົມການເມືອງສູນກາງພັກ, ຮອງປະທານສະພາແຫ່ງຊາດ, ຄະນະປະຈຳ ສະພາແຫ່ງຊາດ.

ແລະ ມາຮອດວັນທີ 23 ທັນວາ 2010 ໄດ້ຮັບການເລືອກຕັ້ງເປັນປະທານສະພາແຫ່ງຊາດ ຊຸດທີ VI  ແລະ ວັນທີ 21 ມີນາ 2011 ກອງປະຊຸມໃຫຍ່ ຄັ້ງທີ IX ຂອງພັກປະຊາຊົນ ປະຕິວັດລາວ ຖືກເລືອກຕັ້ງ ເປັນກຳມະການກົມການເມືອງສູນກາງພັກ ຫຼັງຈາກນັ້ນ, ວັນທີ 20 ເມສາ 2016 ກໍ່ໄດ້ຮັບເລືອກເປັນປະທານສະພາແຫ່ງຊາດອີກ ຈົນເຖິງ ວັນທີ 22 ເມສາ 2021 ທີ່ຜ່ານ ທ່ານກໍ່ໄດ້ຮັບເລືອກຕັ້ງເປັນຮອງປະທານປະເທດ.

ແນວໃດກໍ່ຕາມ, ທ່ານ ນາງ ປານີ ຢາທໍ່ຕູ້ ຖືວ່າເປັນແມ່ຍິງລາວຄົນທຳອິດ ທີ່ດຳລົງຕໍາແໜງເປັນປະທານສະພາແຫ່ງຊາດ ເຖິງ 2 ສະໄໝ ແລະ ໄດ້ຮັບເລືອກຕັ້ງເປັນຮອງປະເທດປະເທດຍິງຄົນທຳອິດອີກດ້ວຍ.

ຂ່າວລາວ ສາລະໜ້າຮູ້