ລັດກຽມຊອກວຽກເຮັດງານທຳໃຫ້ແຮງງານ ລາວທີ່ກັບມາແຕ່ປະເທດເພື່ອນບ້ານ

ລັດກຽມຊອກວຽກເຮັດງານທຳໃຫ້ແຮງງານ ລາວທີ່ກັບມາແຕ່ປະເທດເພື່ອນບ້ານ

​ແຮງ​ງານ​ລາວ​ທີ່ກັບມາ​ແຕ່​ປະ​ເທດ​ເພື່ອນ​ບ້ານ​ຍ້ອນ​ໄດ້​ຮັບ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະຍາດໂຄວິດ-19, ​ໂດຍ​ສະ​ເພາະ​ມາ​ແຕ່​ປະ​ເທດ​ໄທ​ນັ້ນ​ໄດ້​ສ້າງ​ຄວາມ​ກັງ​ວົນ​ຫຼາຍ​ດ້ານ​ໃຫ້​ແກ່​ລັດ​ຖະ​ບານ​ລາວ​ເພື່ອກະ​ກຽມ​ແຜນ​ຮອງຮັບໂດຍ​ສະ​ເພາະ​ການ​ຊອກວຽກ​ເຮັດ​ງານ​ທຳ​ໃຫ້​ແຮງ​ງານເຫຼົ່ານັ້ນ​ໃນ​ໄລ​ຍະ​ສັ້ນ ແລະ ໄລ​ຍະຍາວ​ຢູ່​ພາຍ​ໃນ​ປະ​ເທດ ເພາະ​ຍັງ​ບໍ່​ຮູ້​ວ່າ​ພະ​ຍາດ​ໂຄວິດ-19 ຈະ​ສິ້ນ​ສຸດ​ມື້​ໃດ.

ເພື່ອ​ກຽມ​ຄວາມ​ພ້ອມ​ໃນ​ໄລ​ຍະ​ຍາວ​ໃນ​​ການສ້າງວຽກ​ເຮັດ​ງານ​ທຳ​ໃຫ້​ແຮງ​ງານ​ລາວ​ທີ່​ກັບ​ມາ​ແຕ່ປະ​ເທດ​ເພື່ອນ​ບ້ານ​ນັ້ນ ລັດ​ຖະ​ບານ​ລາວ​ໄດ້​ມອບ​ໃຫ້ກະຊວງແຮງງານ ແລະ ສະຫວັດດີການສັງຄົມ ເລັ່ງເກັບກຳຂໍ້ມູນ ແລະ ຂຶ້ນທະບຽນແຮງງານທີ່ກັບມານັ້ນ ໃຫ້ລະອຽດຊັດເຈນ ເພື່ອເປັນບ່ອນອີງໃນ ການຝຶກສີມືແຮງງານ ແລະ ໃຫ້ ປະສານກັບຂະແໜງການ​ທີ່​ກ່ຽວ​ຂ້ອງ​ເຊັ່ນ:

ສະພາການຄ້າ ແລະ ອຸດສາຫະກຳແຫ່ງຊາດ, ບັນດາຫົວໜ່ວຍແຮງງານ, ໂຄງການລົງທຶນ ໃນການຈັດຫາວຽກເຮັດງານທຳໃຫ້ແຮງງານເຫຼົ່ານັ້ນໃນຕໍ່ໜ້າ, ໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ອົງການປົກຄອງທ້ອງຖິ່ນ ເພີ່ມທະວີໂຄສະນາເຜີຍແຜ່ ແນວທາງນະໂຍບາຍ ຂອງພັກ-ລັດ ກໍຄືກົດໝາຍ ແລະ ລະບຽບການ ກ່ຽວກັບແຮງງານ ໃຫ້ແກ່ແຮງງານລາວທີ່ກັບມາຈຳກັດບໍລິເວນໃນສູນ ເພື່ອໃຫ້ເຂົາເຈົ້າຮັບຮູ້, ເຂົ້າໃຈ, ຄົ້ນຄິດ, ຕັດສິນໃຈ ຊອກວຽກເຮັດງານທຳ ຢູ່ພາຍໃນປະເທດ ຫຼື ໄປອອກແຮງງານຢູ່ຕ່າງປະເທດແບບຖືກກົດໝາຍ.

ລັດ​ຖະ​ບານ​ລາວ​ກຽມ​ແຜນ​ຮັບ​ມື​ກັບກໍລະນີມີ​ຜູ້​ຕິດ​ເຊື້ອ​ພະ​ຍາດ​ໂຄວິດ-19 ຈຳ​ນວນ​ຫຼາຍ​ໃນ​ແຕ່​ລະ​ວັນຈາກແຮງງານລາວ ທີ່ກັບມາຈາກປະເທດໃຫ້ຄຽງໂດຍ​ສະ​ເພາະ​ປະ​ເທດ​ໄທ ຊຶ່ງ​ໄດ້​ມີ​ການກະ​ກຽມປັບປຸງ ແລະ ຂະຫຍາຍສູນຈຳກັດບໍລິເວນ ແລະ ສູນປິ່ນປົວ ໃຫ້ພຽງພໍ, ກວດກາຄືນສະຖານທີ່ມີຄວາມພ້ອມ ແລະ ເໝາະສົມ, ພ້ອມທັງໃຫ້ມີການບໍລິຫານຄຸ້ມຄອງທີ່ເປັນລະບົບ, ຄະນະສະເພາະກິດຂັ້ນສູນກາງ  ແລະ ພາກສ່ວນກ່ຽວຂ້ອງໃຫ້​ປະ​ສານ​ສົມ​ທົບ​ກັນ​ເພື່ອຮີບຮ້ອນຈັດສົ່ງເຄື່ອງມື, ອຸປະກອນການແພດ ແລະ ຢາ, ພ້ອມທັງ ຄົ້ນຄວ້າງົບປະມານທີ່ຈຳເປັນ ໃຫ້ພຽງພໍ ແລະ ທັນການ ໃຫ້ບັນດາແຂວງ ໂດຍສະເພາະ ແຂວງທີ່ມີຜູ້ຕິດເຊື້ອຈຳນວນຫຼາຍ.

ນອກ​ນັ້ນ​ລັດ​ຖະ​ບານ​ໄດ້​ເນັ້ນ​ໃຫ້ກະຊວງສາທາລະນະສຸກ ຄົ້ນຄວ້າສົ່ງໜ່ວຍແພດ ແລະ ອາສາສະໝັກ ລົງຊ່ວຍແຂວງ ທີ່ມີແຮງງານກັບມາຈໍານວນຫຼາຍ ເພື່ອກວດວິເຄາະຫາເຊື້ອ ແລະ ປິ່ນປົວ, ພ້ອມທັງ ເລັ່ງສັກວັກຊີນ ໃຫ້ກຸ່ມເປົ້າໝາຍ ຕາມແຜນທີ່ວາງໄວ້, ໃຫ້ບັນດາແຂວງ ພາກກາງ ແລະ ພາກໃຕ້ ໂດຍສະເພາະ ແຂວງສະຫວັນນະເຂດ ແລະ ແຂວງຈໍາປາສັກ ປະສານກັບແຂວງເຊິ່ງໜ້າຂອງປະເທດໃກ້ຄຽງ ກ່ຽວກັບແຮງງານທີ່ຈະເດີນທາງກັບມາ ເພື່ອວາງແຜນຮັບມືໄດ້ຊັດເຈນ.

ຂ່າວລາວ