ຜູ້ສັນຈອນທາງດ່ວນວຽງຈັນ-ວັງວຽງ ຍັງມີຄວາມກັງວົນກ່ຽວກັບຄວາມປອດໄພ

ຜູ້ສັນຈອນທາງດ່ວນວຽງຈັນ-ວັງວຽງ ຍັງມີຄວາມກັງວົນກ່ຽວກັບຄວາມປອດໄພ

ທາງດ່ວນວຽງຈັນ-ວັງວຽງໄດ້ມີພິທີເປີດນໍາໃຊ້ຢ່າງເປັນທາງການເມື່ອວັນທີ 20 ທັນວາ 2020 ທີ່ຜ່ານມາ ແລະ ເປີດໃຫ້ໃຊ້ບໍລິການຟຣີເປັນເວລາ 3 ວັນນັບແຕ່ວັນທີ 21-23 ທັນວາ 2020 ຫຼື ມື້ອື່ນວັນພຸດເປັນມື້ສຸດທ້າຍ ກ່ອນທີ່ຈະມີການເກັບເງິນ ເພື່ອເປັນການສະເຫຼີມສະຫຼອງວັນຊາດທີ 2 ທັນວາ ຄົບຮອບ 45 ປີ

ພາຍຫຼັງທີ່ເປີດໃຫ້ໃຊ້ບໍລິການຟຣີໃນມື້ວັນທີ 21ແລະ22 ທັນວາ 2020 ນັ້ນ ປະກົດວ່າຢູ່ຕາມສາຍທາງດ່ວນດັ່ງກ່າວຍັງພົບເຫັນສັດລ້ຽງຈໍານວນຫຼາຍເຊັ່ນ: ງົວ ແລະ ແບ້ ທີ່ຫາກິນຢູ່ຕາມແຄມທາງນອກຮົ້ວກັ້ນທາງດ່ວນ ແລະ ມີສັດລ້ຽງບາງໂຕໄດ້ແລ່ນຕັດໜ້າລົດ, ນອກນັ້ນຍັງມີປະຊາຊົນຈໍານວນໜຶ່ງທີ່ໃຊ້ລົດໄຖນາ (ລົດຕ໋ອກຕ໋ອກ) ຂຶ້ນແລ່ນຕາມທາງດ່ວນນໍາອີກ ຊຶ່ງບັນຫາດັ່ງກ່າວນີ້ໄດ້ເຮັດໃຫ້ຜູ້ຂຶ້ນໃຊ້ທາງດ່ວນມີຄວາມກັງວົນກ່ຽວກັບຄວາມປອດໄພ, ດັ່ງນັ້ນເຂົາເຈົ້າຈຶ່ງຮຽກຮ້ອງໃຫ້ທາງພາກສ່ວນທີ່ກ່ຽວຂ້ອງແກ້ໄຂບັນຫານີ້ຢ່າງຮີບດ່ວນ

ທາງດ່ວນວຽງຈັນ ຫາ ເມືອງວັງວຽງນີ້ມີຈຸດເລີ່ມຕົ້ນທີ່ສາມແຍກສີເກີດເມືອງນາຊາຍທອງ ນະຄອນຫຼວງວຽງຈັນ ຜ່ານເມືອງໂພນໂຮງ, ເມືອງຫີນເຫີບ ແລະ ສິ້ນສຸດທີ່ເມືອງວັງວຽງແຂວງວຽງຈັນ, ມີມູນຄ່າການກໍ່ສ້າງຫຼາຍກວ່າ 1 ຕື້ໂດລາ, ຍາວປະມານ 109,9 ກິໂລແມັດ ແລະ ກວ້າງ 23 ແມັດ, ເປັນເສັ້ນທາງຄູ່ຂະໜານ, ມີ 4 ຊ່ອງທາງຈະລາຈອນ ແລະ 2 ແລວໄປ-ກັບ, ສ່ວນຄວາມໄວຢູ່ໃນລະດັບແຕ່ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ອຸໂມງ 1 ແຫ່ງ (ເຂດພູພະນັງ), ຂົວ 45 ແຫ່ງ, ເຊິ່ງຂ້າມທາງເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານ 23 ຈຸດ.

ເວລາການເປີດນຳໃຊ້ ພິທີທາງການ: ວັນທີ 20 ທັນວາ 2020, ຍ້ອນວ່າວັນດັ່ງກ່າວເປັນການຈັດງານພິທີເປີດນຳໃຊ້, ເວລາ 24:00 ໂມງ ວັນທີ 21ທັນວາ 2020 ເປັນຕົ້ນໄປຈື່ງສາມາດສັນຈອນຢູ່ທາງດ່ວນໄດ້, ເພື່ອເປັນການສະແດງຄວາມຂອບໃຈຕໍ່ທຸກພາກສ່ວນທີ່ໃຫ້ຄວາມສະໜັບສະໜູນແກ່ທາງດ່ວນນະຄອນຫຼວງວຽງຈັນ-ວັງວຽງ, ບໍລິສັດ ຮ່ວມທຶນພັດທະນາດ່ວນ ລາວ-ຈີນ ຈຳກັດ ຕົກລົງຈະບໍ່ເກັບຄ່າຜ່ານທາງໃນຊ່ວງໄລຍະ ເວລາ 0:00 ໂມງ ວັນທີ 21-ເວລາ 24:00 ໂມງ ວັນທີ23 ທັນວາ 2020.

ຂ່າວລາວ