ນາຍົກຖະແຫຼງຂ່າວກ່ຽວກັບວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດ COVID-19

ນາຍົກຖະແຫຼງຂ່າວກ່ຽວກັບວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດ COVID-19

ວັນນີ້ 22 ທັນວາ 2020 “ທ່ານນາຍົກລັດຖະມົນຕີແຫ່ງ ໄດ້ຖະແຫຼງຂ່າວກ່ຽວກັບວຽກງານຕ້ານ ແລະ ສະກັດກັ້ນການແຜ່ລະບາດຂອງພະ ຍາດ COVID-19 .” ເນື້ອໃນຂອງຖະແຫລງຂ່າວມີດັ່ງນີ້: ໂດຍຢືນຢູ່ຕໍ່ໜ້າຄວາມທ້າທາຍຈາກພະຍາດ ໂຄວິດ-19 ໃນທົ່ວໂລກກໍຄືປະເທດພວກເຮົາ, ຂ້າພະເຈົ້າ ມີຄວາມຈໍາເປັນທີ່ຕ້ອງໄດ້ອອກມາພົບປະກັບພີ່ນ້ອງຊາວລາວເຮົາອີກຄັ້ງໜຶ່ງ ດ້ວຍການຖະ ແຫຼງຜ່ານສື່ມວນຊົນ ເພື່ອສື່ສານເຖິງພີ່ນ້ອງຊາວລາວໃນທົ່ວປະເທດຊາບຢ່າງທົ່ວເຖິງກັນ. ໃນສິ່ງທີ່ມີຄວາມສໍາຄັນຍິ່ງເພື່ອຂໍໃຫ້ ທຸກໆຄົນໃຫ້ມີສະຕິລະວັງຕົວ ແລະ ໃຫ້ການຮ່ວມມືກັບລັດຖະບານ ແລະ ໜ່ວຍງານທີ່ກ່ຽວຂ້ອງ ກ່ຽວກັບບັນຫາການປ້ອງກັນ, ຄວບຄຸມ ແລະ ແກ້ໄຂພະຍາດ ໂຄວິດ-19 ທີ່ອາດຈະເກີດຂຶ້ນ ຮອບໃໝ່ໃນປະເທດຂອງພວກ ເຮົາ.

ທ່ານທອງລຸນ ໄດ້ກ່າວຕື່ມວ່າ: ລັດຖະບານແຫ່ງ ສປປ ລາວ ຢາກຂໍແຈ້ງມາຍັງປະຊາຊົນລາວຊາບວ່າ ຖ້າພວກເຮົາເບິ່ງອອກໄປທົ່ວໂລກຍັງເຫັນໄດ້ຢ່າງຈະແຈ້ງວ່າ ໂຄວິດ -19 ກໍາລັງເປັນໄພຄຸກຄາມຕໍ່ໂລກ ແລະ ຕໍ່ປະເທດເຮົານັບມື້ນັບເພີ່ມຂຶ້ນ ຊຶ່ງຍັງບໍ່ມີກໍາລັງແຮງໃດໆມາຈໍາກັດ ແລະ ຢຸດຢັ້ງພະຍາດນີ້ໄດ້ເທື່ອ, ຄາດຄະເນວ່າອີກ 2-3 ວັນຂ້າງໜ້າ ຈະມີຜູ້ຕິດເຊື້ອສູງເຖິງ 80 ລ້ານຄົນໃນທົ່ວໂລກ ແລະ ຜູ້ເສຍຊີວິດອາດຈະເພີ່ມຂຶ້ນຮອດ 2 ລ້ານຄົນ,

ສິ່ງທີ່ເປັນອັນຕະລາຍໄປກວ່ານັ້ນໄດ້ຮັບຂໍ້ມູນ ຈາກນັກວິທະຍາສາດການແພດຂອງໂລກໃຫ້ຮູ້ວ່າ ພະຍາດໂຄວິດ-19 ໄດ້ມີການກາຍພັນຮ້າຍແຮງຂຶ້ນກວ່າເກົ່າ ການແຜ່ເຊື້ອຈະມີຄວາມໄວຂຶ້ນ ແລະ ສະຫຼັບສັບຊ້ອນກວ່າສາຍພັນເດີມ. ການກວດເຫັນຜູ້ຕິດເຊື້ອສ່ວນຫຼາຍໃນປັດຈຸບັນບໍ່ມີອາການ ຊຶ່ງເຮັດໃຫ້ການປ້ອງກັນ ຄວບຄຸມຍິ່ງມີຄວາມຫຍຸ້ງຍາກເພີ່ມຂຶ້ນ ສິ່ງທີ່ກ່າວມາຂ້າງເທິງນັ້ນກໍ່ໄດ້ເກີດຂຶ້ນຢູ່ບາງປະເທດທີ່ມີຊາຍແດນຕິດກັບປະເທດເຮົາ ດັ່ງນັ້ນມັນຈຶ່ງຮຽກຮ້ອງໃຫ້ພວກເຮົາຕ້ອງໄດ້ເພີ່ມຄວາມມີສະຕິລະວັງຕົວສູງກວ່າເກົ່າ ຊຶ່ງລັດຖະບານໄດ້ສ້າງກໍາລັງແຮງໃນການຮັບມືກັບພະຍາດນີ້ຢ່າງຈິງຈັງ ບໍ່ດັງນັ້ນໂຄວິດ-19 ຈະກັບມາປະເທດເຮົາອີກຮອບໃໝ່ ແລະ ຮ້າຍແຮງກວ່າເກົ່າ ການຄວບຄຸມກໍ່ຈະພົບກັບຄວາມສ່ຽງໃຫ່ຍຫຼວງກວ່າເກົ່າ. ຂໍຮຽກຮ້ອງໃຫ້ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ທົບທວນຄືນຄໍາສັ່ງຕ່າງໆ ແລະ ມາດຕະການຕ່າງໆທີ່ຜ່ານມາ ກ່ຽວກັບມາດຕະການຕ້ານພະຍາດດັ່ງກ່າວນີ້

ແລະ ໃຫ້ມີມາດຕະການເພີ່ມເພື່ອຮັບມືກັບສະພາບການໃໝ່, ຖ້າມີມາດຕະການໃໝ່ອອກມາຂໍໃຫ້ທຸກຊັ້ນຄົນໃຫ້ການຮ່ວມມືໃນການປະຕິບັດ. ສິ່ງທີ່ຈະຕ້ອງປະຕິບັດໂລດນັບແຕ່ນີ້ຕໍ່ໄປແມ່ນໃຫ້ໂຈະບັນດາພົນລະເມືອງປະເທດທີ່ມີການແຜ່ລະບາດພະຍາດໂຄວິດ-19 ໃນຊຸມຊົນເຂົ້າປະເທດລາວ, ສືບຕໍ່ປິດດ່ານປະເພນີ, ດ່ານທ້ອງຖິ່ນ, ສືບຕໍ່ປິດຖ້ຽວບິນເໝົາລໍາ ຈາກຕ່າງປະເທດໃນໄລຍະນີ້ ນອກຈາກກໍລະນີຈໍາເປັນແທ້ໆ ແຕ່ຕ້ອງໄດ້ຮັບອະນຸຍາດທຸກໆຄັ້ງ, ໃຫ້ສືບຕໍ່ກຽມສະຖານທີ່ກັກກັນຊົ່ວຄາວ ໃຫ້ມີມາດຕະຖານທີ່ດີກວ່າເກົ່າ, ກຽມເພີ່ມສະຖານທີ່ອຸປະກອນ ຢາ ການແພດຕ່າງໆເພື່ອຮັບໃຊ້ການປິ່ນປົວຜູ້ຕິດເຊື້ອ, ກຽມງົບປະມານເພື່ອຊື້ຢາວັກຊີນຕື່ມອີກ ສິ່ງສໍາຄັນຢາກຮຽກຮ້ອງໃຫ້ປະຊາຊົນລາວຮັກສາໄລຍະຫ່າງ ບໍ່ສໍາຜັດມື ແລະ ປະຕິບັດມາດຕະການຕ້ານພະຍາດໂຄວິດ-19 ຕາມການແຈ້ງການຂອງຄະນະສະເພາະກິດຢ່າງເຂັ້ມງວດ.

ຂ້າພະເຈົ້າ ມີຄໍາແນະນໍາພາກສ່ວນກ່ຽວ ຂ້ອງ ແລະ ຂໍຮຽກຮ້ອງມາຍັງພໍ່ ແມ່ພີ່ນ້ອງຊາວລາວທຸກໆຄົນ ດັ່ງຕໍ່ໄປນີ້:

  1. ໃຫ້ຄະນະສະເພາະກິດທົບ ທວນຄືນຄໍາສັ່ງສະບັບເລກທີ 06/ນຍ, ລົງວັນທີ 29 ມີນາ2020 ແລະ ທົບທວນຄືນເບິ່ງວ່າບັນດາມາດຕະການຜ່ອນຜັນຈາກຄໍາສັ່ງ ເລກທີ 06/ນຍ ນັ້ນ,ຈະກັບມາ ໃຊ້ອັນໃດ ແລະ ຈະມີມາດຕະການເພີ່ມເຕີມອັນໃດແດ່ເພື່ອຮັບມື ກັບສະພາບການໃໝ່. ຖ້າມີມາດຕະການໃໝ່ອອກມາຂ້າພະເຈົ້າຂໍໃຫ້ມີການສະໜັບສະໜູນຮ່ວມມື ໃນການປະຕິບັດຂອງທຸກໆຄົນ,
  2. ສິ່ງທີ່ຈະຕ້ອງປະຕິບັດນັບ ແຕ່ນີ້ເປັນຕົ້ນໄປແມ່ນ:

ໜື່ງ. ໂຈະການອະນຸຍາດໃຫ້ພົນລະເມືອງຢູ່ບັນດາປະເທດທີ່ມີການລະບາດໃນຊຸມຊົນຂອງ ໂຄ ວິດ-19 ເຂົ້າປະເທດເຮົາ,

ສອງ. ສືບຕໍ່ປິດດ່ານປະເພນີ ແລະ ດ່ານທ້ອງຖິ່ນ,

ສາມ. ສືບຕໍ່ຢຸດຕິການເປີດໃຫ້ມີຖ້ຽວບິນເໝົາລໍາໄປມາຈາກຕ່າງປະເທດໃນໄລຍະນີ້, ນອກຈາກກໍລະນີຈຳເປັນແທ້ໆ, ແຕ່ຕ້ອງໄດ້ຂໍອະນຸຍາດທຸກໆຄັ້ງ,

ສີ່. ໃຫ້ສືບຕໍ່ກະກຽມສະຖານທີ່ກັກກັນຊົ່ວຄາວໃຫ້ມີມາດຕະຖານທີ່ດີກວ່າເກົ່າ ແລະ ຫຼາຍກວ່າເກົ່າ,

ຫ້າ. ກຽມເພີ່ມສະຖານທີ່, ຢາ, ອຸປະກອນຕ່າງໆເພື່ອຮັບໃຊ້ການປິ່ນປົວຜູ້ຕິດເຊື້ອ ໂຄວິດ-19 ແລະ ໃຫ້ຄາດຄະເນລ່ວງໜ້າໃຫ້ເໝາະສົມເພື່ອຮັບມືເມື່ອມີເຫດສຸກເສີນ ແລະ ກໍລະນີມີຜູ້ຕິດເຊື້ອຂະຫຍາຍ ກວ້າງ,

ຫົກ. ກະກຽມກ່ຽວກັບການຮັບເອົາການຊ່ວຍເຫຼືອຢາວັກຊີນຈາກປະເທດເພື່ອນມິດ ແລະ ອົງການຈັດ ຕັ້ງສາກົນທີ່ໄດ້ເຊັນຮ່ວມກັນມາ ແລ້ວເພື່ອນໍາວັກຊີນມາສັກໃຫ້ປະຊາຊົນ, ກ່ອນອື່ນແມ່ນບັນດາກຸ່ມເປົ້າໝາຍສ່ຽງໃຫ້ໄດ້ໄວເທົ່າທີ່ຈະໄວໄດ້,

ເຈັດ. ໃຫ້ກຽມງົບປະມານເພື່ອສັ່ງຢາວັກຊີນຕື່ມອີກເພື່ອໃຫ້ປະຊາຊົນລາວໄດ້ຮັບການສັກຢ່າງເໝາະສົມໃນເວລາອັນຄວນ,

ແປດ. ຮຽກຮ້ອງໃຫ້ປະຊາຊົນທຸກຄົນປະຕິບັດໄລຍະຫ່າງ, ບໍ່ສໍາພັດມືໃນເວລາພົບກັນ (ໃຫ້ໃຊ້ການຍົກມືນົບທັກທາຍຕາມປະເພນີລາວເຮົາ, ເຊິ່ງທັງງົດງາມ ແລະ ປອດໄພ),

ເກົ້າ. ໃຫ້ທຸກໆຄົນໃຊ້ຜ້າອັດປາກອັດດັງໃນເວລາຢູ່ໃນຊຸມຊົນ, ໃນເວລາອອກຈາກເຮືອນໄປມາຢ່າງເຄັ່ງຄັດ.

ຂ່າວລາວ