ອອກຄຳສັ່ງ ລ໋ອກດາວ ນະຄອນໄກສອນພົມວິຫານ ນັບແຕ່ວັນທີ13 ຫາ 23 ສິງຫາ 2021

ອອກຄຳສັ່ງ ລ໋ອກດາວ ນະຄອນໄກສອນພົມວິຫານ ນັບແຕ່ວັນທີ13 ຫາ 23 ສິງຫາ 2021

ດ່ວນ! ແຂວງສະຫວັນນະເຂດ ອອກຄຳສັ່ງວ່າດ້ວຍການເພີ່ມຄວາມເຂັ້ມງວດ ໃນການປິດ (Lock down) ນະຄອນໄກສອນພົມວິຫານ ນັບແຕ່ວັນທີ13 ຫາ 23 ສິງຫາ 2021

ທີ່ສະໂມສອນຫ້ອງວ່າການແຂວງສະຫວັນນະເຂດ ໃນຄັ້ງວັນທີ 13 ສິງຫາ 2021 ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດພະຍາດ COVID-19 ຂັ້ນແຂວງ ໂດຍມີທ່ານ ນາ ງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດພະຍາດ COVID-19 ຂັ້ນແຂວງ,ທ່ານ ປະສົງສິນ ຈະເລີນສຸກ ເຈົ້ານະຄອນໄກສອນ ພົມວິຫານ,ທ່ານ ປອ ດຣ ຕຽງຄຳ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງ ຫົວໜ້າກອງເລຂາຄະນະສະເພາະກິດຂັ້ນແຂວງ ໄດ້ຮ່ວມກັນຖະແຫຼງຂ່າວກ່ຽວກັບການອອກຄຳສັ່ງວ່າດ້ວຍການເພີ່ມຄວາມເຂັ້ມງວດໃນການປິດ (Lock down) ນະຄອນໄກສອນພົມວິຫານ ເນື່ອງຈາກຜູ້ຕິດເຊື້ອຢູ່ໃນຊຸມຊົນ ຂອງນະຄອນໄກສອນພົມວິຫານ ນັບແຕ່ວັນທີ 2 ສິງຫາ 2021 ມາເຖິງປະຈຸບັນນີ້ ມີຈໍານວນເຖິງ 18 ກໍລະນີ, ກວມເອົາ 6 ບ້ານ

ເຊິ່ງຕໍ່ສະພາບການລະບາດຂອງພະຍາດດັ່ງກ່າວເຫັນວ່າ ມີຄວາມຫຍຸ້ງຍາກຫລາຍໃນການຊອກຫາຕົ້ນສາຍປາຍເຫດການລະບາດ. ທາມລາຍຂອງຜູ້ຕິດເຊື້ອ ແລະ ຜູ້ສໍາພັດກັບຜູ້ຕິດເຊື້ອທີ່ບໍ່ສາມາດບອກໄດ້ທີີ່ມາຂອງການຕິດເຊື້ອ ເຊິ່ງເປັນສາຍເຫດ ເຮັດໃຫ້ມີການຄວບຄຸມການລະບາດໄດ້ຍາກ ແລະ ເປັນປັດໃຈສ່ຽງສູງຕໍ່ການແຜ່ລະບາດອອກໄປສູ່ວົງກວ້າງພາຍໃນນະຄອນໄກສອນພົມວິຫານ ແລະ ເມືອງອ້ອມຂ້າງ ກໍ່ຄືພາຍໃນແຂວງສະຫວັນນະເຂດ. ດັ່ງນັ້ນ ເພື່ອປ້ອງກັນ ສະກັດກັ້ນ ແລະ ຄວບຄຸມການແຜ່ລະບາດພະຍາດ ໂຄວິດ-19 ແຂວງຈຶ່ງອອກຄໍາສັ່ງດັ່ງນີ້:

ຍົກລະດັບມາດຕະການຄວາມເຂັ້ມງວດເພີ່ມເຕີມດັ່ງນີ້;

1.ຫ້າມບຸກຄົນທົ່ວໄປມີການສັນຈອນເຂົ້າ-ອອກພາຍໃນນະຄອນໄກສອນພົມວິຫານ, ຍົກເວັ້ນໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ;

2. ຫ້າມຂາຍ ແລະ ຈໍາໜ່າຍເຄື່ອງດື່ມມຶນເມົາ ເປັນຕົ້ນ: ເຫຼົ້າ, ເບຍ, ວາຍ ແລະ ເຄື່ອງດື່ມອື່ນໆ ທີ່ມີທາດແອວກໍຮໍທຸກປະເພດ.

3. ຫ້າມບໍ່ໃຫ້ຈັດກອງປະຊຸມ ແລະ ການຝຶກອົບຮົມຂອງທຸກອົງການຈັດຕັ້ງພາຍໃນນະຄອນໄກສອນພົມວິຫານ ແລະ ພະແນກການອ້ອມຂ້າງແຂວງ, ສ່ວນຢູ່ເມືອງອື່ນໆ ສາມາດຈັດຕັ້ງບັດໄດ້ ສະເພາະຄົນພາຍໃນເມືອງແຕ່ບໍ່ໃຫ້ເກີນ 20 ຄົນ.

4. ຫ້າມທຸກສໍານັກງານອົງການພາຍໃນນະຄອນໄກສອນພົມວິຫານ ອອກໄປເຄື່ອນໄຫວວຽກງານຕ່າງເມືອງ ແລະ ຕ່າງແຂວງ ຍົກເວັ້ນກໍລະນີທີ່ໄດ້ຮັບການອະນຸຍາດຈາກຄະນະສະເພາະກິດຂັ້ນແຂວງ.

5.ປິດກິດຈະການຊົ່ວຄາວ: ຮ້ານຂາຍຄໍາ, ຮ້ານແລກປ່ຽນເງິນຕາ, ຮ້ານຂາຍເສື່ອຜ້າ, ຮ້ານຂາຍເຄື່ອງໄຟຟ້າເຄື່ອງກໍ່ສ້າງ, ຮ້ານສ້ອມແປງລົດທຸກປະເພດ, ຮ້ານມິນີມາກ, ຮ້ານຂາຍໂທລະສັບ, ຮ້ານຂາຍເຄື່ອງອຸປະກອນຫ້ອງການ, ຮ້ານຂາຍເຄື່ອງຍ່ອຍທຸກປະເພດ, ຮ້ານອາຫານ,ຮ້ານຂາຍຂອງກິນສຸກທຸກປະເພດ, ຮ້ານປິ້ງແກ້ມ ແລະ ຮ້ານກະເຟ;

6. ປິດບັນດາຫ້າງຮ້ານຂາຍເຄື່ອງຍ່ອຍໃຊ້ສອຍທຸກປະເພດໃນຕະຫຼາດລວມທັງເຂດຂາຍຂອງກິນສຸກ, ແຕ່ອະນຸຍາດເປີດການຊື້-ຂາຍໃນເຂດຕະຫຼາດສົດເລີ່ມແຕ່ເວລາ 05:00 ໂມງ ຫາ 17:00ໂມງ, ແຕ່ຕ້ອງປະຕິບັດຕາມມາດຕະການປ້ອງກັນການແຜ່ລະບາດຢ່າງເຂັ້ມງວດ ເຊັ່ນ: ໃສ່ຜ້າອັດປາກ-ດັງ, ວັດແທກອຸນນະພູມ, ຈັດໃຫ້ມີເຈວລ້າງມື ແລະ ຮັກສາໄລຍະຫ່າງ ລວມທັງຊີດຢາຂ້າເຊື້ອພາຍຫຼັງປິດການບໍລິການໃນແຕ່ລະວັນ, ມອບໃຫ້ຂະແໜງອຸດສາຫະກໍາ ແລະ ການຄ້າ ສົມທົບກັບຜູ້ຈັດສັນຕະຫຼາດພ້ອມກັນຈັດຕັ້ງປະຕິບັດ.

7. ປິດການຮຽນການສອນໂຮງຮຽນພາກລັດ-ເອກະຊົນທຸກຊັ້ນທຸກສາຍພາຍໃນນະຄອນໄກສອນພົມວິຫານ;

8. ເພື່ອຫຼີກລ້ຽງຄວາມສ່ຽງຕິດເຊື້ອພາຍໃນໂຮງໝໍແມ່ນໃຫ້ຫຼຸດຜ່ອນການມາໃຊ້ບໍລິການຕິດຕາມກວດກາສຸຂະພາບໃນແບບປົກກະຕິ, ແຕ່ໃຫ້ມາໃຊ້ບໍລິການໃນທຸກກໍລະນີເຈັບເປັນ.

9.ໃຫ້ຫຼຸດຜ່ອນຈໍານວນພົນຂອງພະນັກງານທຸກອົງການຈັດຕັ້ງຂອງລັດ ແລະ ເອກະຊົນ ໂດຍໃຫ້ປະຈໍາການສະເພາະໜ່ວຍງານບໍລິການເທົ່ານັ້ນ, ພາກສ່ວນອື່ນທີ່ບໍ່ຈໍາເປັນແມ່ນໃຫ້ເຮັດວຽກຢູ່ເຮືອນ.

ຂ່າວລາວ