ຮອງປະທານປະເທດ ຕ້ອນຮັບການ ເຂົ້າຢ້ຽມອຳລາຂອງທູດມົງໂກລີ

ຮອງປະທານປະເທດ ຕ້ອນຮັບການ ເຂົ້າຢ້ຽມອຳລາຂອງທູດມົງໂກລີ

ໃນຕອນເຊົ້າວັນທີ 23 ສິງຫາ 2021 ທີ່ທໍານຽບປະທານປະເທດ (ຫໍຄໍາ), ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ລ໊ອດຕ໋ອດ ດຳບາ ກັກບັດລັກ (Lodoidamba Galbadrakh), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ມົງໂກລີ ປະຈຳ ສປປ ລາວ, ໃນໂອກາດ ທີ່ໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ.

ໃນໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍ ທ່ານທູດ ລ໊ອດຕ໋ອດດຳບາ ກັກບັດລັກ ທີ່ໄດ້ສໍາເລັດຫນ້າທີ່ການທູດ ຢູ່ ສປປ ລາວ ຕະຫລອດໄລຍະ 6 ປີກວ່າ ຜ່ານມາ (12 ກັນຍາ 2015- 7 ກັນຍາ 2021), ພ້ອມທັງຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ມົງໂກລີ ທີ່ມີມາແຕ່ດົນນານ ທີ່ນັບມື້ໄດ້ຮັບການຂະ ຫຍາຍຕົວ ແລະ ແໜ້ນແຟ້ນຂຶ້ນເລື້ອຍໆ ພາຍຫລັງທີ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນແຕ່ວັນທີ 12 ກັນຍາ 1962 ເປັນຕົ້ນມາ.

ພິເສດ, ສອງປະເທດ ໄດ້ຮ່ວມກັນຈັດພິທີສະ ເຫລີມສະຫລອງ ຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດຮ່ວມກັນ ໃນເດືອນຕຸລາ 2017 ຜ່ານມາ.

ຕະຫລອດໄລຍະ 6 ປີກວ່າ ຂອງການປະຕິບັດຫນ້າທີ່ການທູດຢູ່ ສປປ ລາວ, ທ່ານທູດ ລ໊ອດຕ໋ອດດຳບາ ກັກບັດລັກ ໄດ້ປະກອບສ່ວນສໍາຄັນ ເຂົ້າໃນການຊຸກຍູ້ການພົວພັນຮ່ວມມືຂອງສອງປະເທດ ເປັນຕົ້ນແມ່ນ ຊຸກຍູ້ໃຫ້ມີການແລກປ່ຽນການຢ້ຽມຢາມຂອງການນຳຂັ້ນຕ່າງໆ ຂອງສອງຝ່າຍ ປະກອບສ່ວນຊຸກຍູ້ໃຫ້ແກ່ ການລົງນາມແລກປ່ຽນນັກສຶກສາ ໃນປີ 2017 ທີ່ ມົງໂກລີ, ການລົງນາມສັນຍາແລກປ່ຽນວ່າດ້ວຍ ການແລກປ່ຽນນຳໃຊ້ອາຄານສຳນັກງານ ແລະ ທີ່ດິນສະຖານທູດຂອງສອງປະເທດ, ຊຸກຍູ້ການເຊັນສັນຍາ ວ່າດ້ວຍ ການຮ່ວມມື ລະຫວ່າງ ສະຖາບັນສັດຕະວະແພດ ແຫ່ງ ມົງໂກລີ ແລະ ກົມລ້ຽງສັດ ແລະ ການປະມົງກະຊວງກະສິກຳ ແລະ ປ່າໄມ້ ແຫ່ງ ສປປ ລາວ ໃນປີ 2018, ຊຸກຍູ້ການສ້າງເນື້ອໃນບົດບັນທຶກວ່າດ້ວຍການຮ່ວມມື ລະຫວ່າງ ສອງກະຊວງການຕ່າງປະ ເທດ. ພ້ອມນີ້, ລັດຖະບານ ມົງໂກລີ ຍັງໄດ້ສົ່ງຊ່ຽວຊານແພດໝໍຈາກ ມົງໂກລີ ມາປະຈຳຢູ່ໂຮງຫມໍມິດຕະພາບ ລາວ-ມົງໂກລີ ທີ່ແຂວງຊຽງຂວາງ ເພື່ອປິ່ນປົວສຸຂະພາບໃຫ້ປະຊາຊົນລາວ, ຊ່ວຍຍົກລະດັບຄວາມຮູ້ ແລະ ເພີ່ມຂີດຄວາມສາມາດໃຫ້ແກ່ຊ່ຽວຊານດ້ານການຜ່າຕັດ ແລະ ສຸກເສີນໃຫ້ແກ່ແພດຫມໍຂອງລາວ.

ນອກຈາກນີ້, ທ່ານທູດ ຍັງໄດ້ປະກອບສ່ວນຊຸກຍູ້ໃຫ້ລັດຖະບານມົງໂກລີໃນການມອບແກະ ຈຳນວນ 1.050 ໂຕ ເປັນຂອງຂວັນໃຫ້ແກ່ລັດຖະບານລາວ ແລະ ຍັງໄດ້ຊ່ວຍເຫລືອວັກຊິນປິ່ນປົວພະຍາດສັດ ຈຳນວນ 100 ລິດ ເພື່ອນໍາໃຊ້ເຂົ້າໃນການປິ່ນປົວສັດຢູ່ແຂວງຊຽງຂວາງ ແລະ ຫລວງພະບາງ.

ໃນໂອກາດດຽວກັນນີ້, ທ່ານທູດ ລ໊ອດຕ໋ອດດຳບາ ກັກບັດລັກ ກໍ່ໄດ້ສະແດງຄວາມຂອບໃຈຢ່າງຈິງໃຈມາຍັງ ພັກ-ລັດຖະບານ ແລະ ປະຊາຊົນລາວ ທີ່ໄດ້ອໍານວຍຄວາມສະດວກໃຫ້ແກ່ການ ເຄື່ອນໄຫວໜ້າທີ່ການທູດຂອງຕົນຢູ່ ສປປ ລາວ ຈົນມີຜົນສໍາເລັດຢ່າງຈົບງາມ ແລະ ຢືນຢັນຈະສືບຕໍ່ໃນການເປັນຂົວຕໍ່ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະ ພາບ ແລະ ການຮ່ວມມືທີ່ດີຂອງສອງປະເທດ ສປປ ລາວ ແລະ ມົງໂກລີ ໃຫ້ສືບຕໍ່ມີບາດກ້າວຂະ ຫຍາຍຕົວ ແລະ ແໜ້ນແຟ້ນຍິ່ງໆ ຂຶ້ນໃນອະນາຄົດ.

ຂ່າວ-ພາບ: ຂັນໄຊ

ຂ່າວລາວ