ລັດຖະບານ ຊື້ລົດ Ambulance ເພີ່ມອີກ 32ຄັນ ເພື່ອໃຊ້ໃນວຽກງານຕ້ານໂຄວິດ

ລັດຖະບານ ຊື້ລົດ Ambulance ເພີ່ມອີກ 32ຄັນ ເພື່ອໃຊ້ໃນວຽກງານຕ້ານໂຄວິດ

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງໄດ້ລາຍງານເມື່ອວັນທີ 24 ສິງຫາ 2021 ທີ່ຜ່ານມານີ້ວ່າ: ລັດຖະບານລາວໄດ້ຕັດສິນໃຈຊື້ລົດ ຂົນສົ່ງຄົນເຈັບ ( Ambulance ) ຈໍານວນ 32​ ຄັນ ແລະ ອຸປະກອນການແພດຈໍານວນໜຶ່ງເພື່ອໄວ້ຮັບໃຊ້ວຽກງານຕ້ານພະຍາດໂຄວິດ-19

ໂດຍສະເພາະ ໃນການຂົນສົ່ງຜູ້ຕິດເຊື້ອພະຍາດໂຄວິດ-19 ເມື່ອໄດ້ຮັບການເຂົ້າມາປິ່ນປົວໃຫ້ທັນເວລາ ຊຶ່ງປັດຈຸບັນນີ້ ລົດ Ambulance ຈໍານວນ 16 ຄັນ​ ຈາກທັງໝົດ 32 ຄັນໄດ້ມາຮອດ ສປປ ລາວແລ້ວ, ສ່ວນອີກ 16​ ຄັນທີ່ຍັງເຫຼືອຈະມາຮອດໃນອາທິດໜ້າ.

ຄະນະສະເພາະກິດໃຫ້ຮູ້ຕື່ມວ່າ: ລົດ Ambulance ຈໍານວນດັ່ງກ່າວ ແມ່ນຈະແຈກຢາຍໃຫ້ທີມງານແພດ ໝໍຢູ່ຂັ້ນສູນກາງ, ຂັ້ນແຂວງໂດຍສະເພາະບັນດາ ແຂວງ ທີ່ມີການແຜ່ລະບາດ ແລະ ມີຜູ້ຕິດເຊື້ອພະຍາດໂຄວິດ-19 ເປັນຈໍານວນຫຼາຍເຊັ່ນ: ແຂວງຄໍາມ່ວນ, ສະຫວັນນະເຂດ, ຈຳປາສັກ, ສາລະວັນ ແລະ ແຂວງທີ່ຢູ່ເຂດຫ່າງໄກສອກຫຼີກ

ນອກຈາກຈະແຈກຢາຍລົດແລ້ວຍັງມີອຸປະກອນການແພດຈໍານວນໜຶ່ງຕື່ມອີກ ເຊັ່ນ: ເຄື່ອງສ່ອງໄຟຟ້າຊະນິດເຄື່ອນທີ່, ເຄື່ອງກວດວັດແທກຄົນເຈັບທີ່ສົງໃສວ່າຕິດເຊື້ອ, ອຸປະກອນຜະລິດອົກຊີແຊນຂະໜາດນ້ອຍທີ່ໄດ້ຮັບການຊ່ວຍເຫຼືອຈາກອົງການອຸຍນີເຊບ, ຜ້າ, ເສື່ອນອນ ແລະ​ ຕຽງນອນທີ່ໄດ້ຮັບການຊ່ວຍເຫຼືອຈາກອົງການອະນາໄມໂລກ.

ຂ່າວ: ວຽງຈັນທາຍ

ຂ່າວລາວ