ຢຸດຊຸມແຊວກ່ອນຊ່ວງນີ້ ເອົາໃຈໃສ່ປະຕິບັດນຳກັນ

ຢຸດຊຸມແຊວກ່ອນຊ່ວງນີ້ ເອົາໃຈໃສ່ປະຕິບັດນຳກັນ

ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ຕາງໜ້າຄະນະສະເພາະກິດ ໄດ້ລາຍງານໃນວັນທີ 28 ສິງຫາ 2021 ນີ້ວ່າ: ປັດຈຸບັນ ສປປ ລາວເຮົາຍັງສືບຕໍ່ມີການລະບາດໃນຊຸມຊົນຢູ່ຫລາຍແຂວງ ເຊິ່ງສາເຫດສ່ວນໃຫຍ່ ກໍແມ່ນມາຈາກການຢູ່ນຳກັນເປັນກຸ່ມຂອງໝູ່ຄູ່, ເພື່ອນຮ່ວມງາມ ຫລື ການເດີນທາງໄປຮ່ວມງານທີ່ມີຄົນຢູ່ເປັນຈຳນວນຫລາຍ.

ສະນັ້ນ, ເພື່ອຫລຸດຜ່ອນ ແລະ ຕັດວົງຈອນການລະບາດໃຫ້ຢຸດຕິໂດຍໄວ ຈຶ່ງຂໍຮຽກຮ້ອງມາຍັງ ພໍ່ແມ່, ພີ່ນ້ອງ, ປະຊາຊົນ ແລະ ທຸກພາກສ່ວນໃນສັງຄົມ ຢຸດການຮ່ວມຊຸມນຸມ, ຊຸມແຊວ ແລະ ຫລີກຫລ່ຽງການເດີນທາງໄປຮ່ວມງານທີ່ມີຄົນຫລາຍ, ໄປທີ່ຊຸມຊົນແອອັດ ແລະ ອື່ນໆ, ເອົາໃຈໃສ່ປະຕິບັດການດຳລົງຊີວິດປົກກະຕິແບບໃໝ່ (new normal) ໃຫ້ກາຍເປັນຄວາມຊີນເຄີຍ ເປັນຕົ້ນ ໝັ່ນລ້າງມືດ້ວຍນ້ຳສະອາດໃສ່ສະບູ ຫລື ເຈວລ້າງມື, ຮັກສາໄລຍະຫ່າງທາງສັງຄົມ, ໃສ່ຜ້າປິດປາກ-ດັງ ເມື່ອອອກຈາກບ້ານ, ຫລີກລ້ຽງການໄປສະຖານທີ່ແອອັດ ຫລື ມີຄວາມສ່ຽງສູງ, ບໍ່ຊຸມແຊວກັນເປັນກຸ່ມ, ຖ້າຫາກທ່ານຮູ້ສຶກບໍ່ສະບາຍ ຫລື ມີປະຫວັດສຳຜັດໃກ້ຊິດກັບຜູ້ຕິດເຊື້ອ ແລະ ເດີນທາງໄປສະຖານທີ່ ທີ່ຜູ້ທີ່ຕິດເຊື້ອເດີນທາງໄປ ໃຫ້ຮີບຮ້ອນໄປພົບແພດເພື່ອເກັບຕົວຢ່າງກວດຫາເຊື້ອ ແລະ ເຂົ້າຮັບການປິ່ນປົວຢ່າງທັນການ ເພື່ອສະກັດກັ້ນ ບໍ່ໃຫ້ແຜ່ເຊື້ອໄປສູ່ຄົນອ້ອມຂ້າງ ແລະ ຊຸມຊົນ.

ສິ່ງສຳຄັນໃຫ້ທຸກຄົນຕ້ອງຮ່ວມແຮງຮ່ວມໃຈກັນ, ສາມັກຄີກັນ ເພື່ອຜ່ານຜ່າວິກິດນີ້ໄປດ້ວຍກັນ ແລະ ສາມາດກັບມາດຳລົງຊີວິດປົກກະຕິໂດຍໄວ.

ຂ່າວລາວ