ຮ່ວມມືກັນຊອກຫາວິທີຫລຸດຜ່ອນ ແລະ ກໍາຈັດພ ະຍ າດດັ່ງກ່າວໃຫ້ໝົດໄປຈາກໂລກນີ້

ຮ່ວມມືກັນຊອກຫາວິທີຫລຸດຜ່ອນ ແລະ ກໍາຈັດພ ະຍ າດດັ່ງກ່າວໃຫ້ໝົດໄປຈາກໂລກນີ້

ເຫັນເອົາບັນຫາການແພ່ລະບາດພະຍາດໂຄວິດໃນທົ່ວໂລກມາເປັນພະລັງແຫ່ງຄວາມສາມັກອັນຍິ່ງໃຫຍ່ຂອງມວນມະນຸດເພື່ອຮ່ວມມືກັນຊອກຫາວິທີຫລຸດຜ່ອນ ແລະ ກໍາຈັດພະຍາດດັ່ງກ່າວໃຫ້ໝົດໄປຈາກໂລກນີ້ ເຊິ່ງເປັນວິທີທີ່ຖືກຕ້ອງ, ຍຸຕິທໍາ, ໂປ່ງໃສ, ສະຫງົບສຸກ ແລະ ມີສັນຕິພາບຢ່າງແທ້ຈິງ ແຕ່ບໍ່ຄວນຖືເອົາບັນຫາການລະບາດພະຍາດໂຄວິດເປັນເຄື່ອງມືທາງດ້ານການເມືອງເພື່ອບິດເບືອນຄວາມຈິງໃນການສ້າງຄວາມແຕກແຍກ, ເພີ່ມຄວາມເຄັ່ງຕືງ, ສ້າງຄວາມບໍ່ເຂົ້າໃຈກັນ ແລະ ເຮັດໃຫ້ມວນມະນຸດມີຄວາມສັບສົນວຸ້ນວາຍ ຂະນະທີ່ ມີ 75 ປະເທດທົ່ວໂລກສົ່ງສານເຖິງອົງການອະນາໄມໂລກ(WHO) ເພື່ອຄັດຄ້ານທັດສະຕິທີ່ບໍ່ເປັນມິດຂອງບາງປະເທດຕາເວັນຕົກທີ່ຫັນປ່ຽນບັນຫາ ການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ເປັນຂໍ້ຂັດແຍ່ງທາງດ້ານການເມືອງ.

ດັ່ງທີ່ຫລາຍທ່ານຮັບຮູ້ນໍາກັນແລ້ວວ່ານັບແຕ່ທ້າຍປີ 2019 ພະຍາດໂຄວິດ-19 ໄດ້ເລີ່ມເກີດຂຶ້ນ ແລະ ມີການແພ່ລະບາດອອກໄປເປັນວົງກວ້າງໃນທົ່ວໂລກ ເຊິ່ງມາຮອດປັດຈຸບັນນີ້ໄດ້ມີຜູ້ຕິດເຊື້ອໂຄວິດທົ່ວໂລກເຖີງ 218 ລ້ານກວ່າຄົນ, ເສຍຊີວິດ 4 ລ້ານກວ່າຄົນ ແລະ ປິ່ນປົວຫາຍດີ 195 ລ້ານກວ່າຄົນ ໃນນັ້ນສະຫະລັດອາເມລິກາຍັງຄອງແຊັມທີ່ມີຜູ້ຕິດເຊື້ອພະຍາດໂຄວິດອັນດັບທີ 1, ອັນດັບທີ 2 ແມ່ນອິນເດຍ, ອັນທີ 3 ແມ່ນບຣາຊິວ ແລະ ອື່ນໆຕາມລໍາດັບ.

ແນວໃດກໍດີ ສະພາບການຕິດເຊື້ອພະຍາດຍັງມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ເຖີງແມ່ນວ່າປະຊາກອນຈໍານວນຫລາຍໆລ້ານທົ່ວໂລກໄດ້ຮັບວັກຊິນກໍຕາມ ແຕ່ຄວາມຈິງ ອັດຕາຜູ້ທີ່ມີອາການຄວາມຮຸນແຮງ ແລະ ອັດຕາຜູ້ເສຍຊີວິດໄດ້ຄ່ອຍໆຫລຸດລົງຢ່າງຕໍ່ເນື່ອງຍ້ອນລັດຖະບານຂອງແຕ່ລະປະເທດທົ່ວໂລກມີຄວາມສະດຸງໄວ, ມຸ່ງໝັ້ນເອົາໃຈໃສ່, ມີມາດຕະການເຄັ່ງຄັດ ແລະ ໄດ້ຮ່ວມມືກັບວົງຄະນະຍາດປະຊາຄົມຢ່າງຊັດເຈນໃນການຈັດສັນຢາກວັກຊິນທີ່ມີຄຸນນະພາບສູງເຊັ່ນ: ຊີໂນຟາມ, ຊີໂນແວກ, ສະປຸດນິກ, ແອດສະຕາເຊັນນີກາ, ຈອນສັນແລະຈອນສັນ, ໄຟເຊີ ແລະ ອື່ນໆໃຫ້ປະຊາຊົນຂອງຕົນ ແລະ ຊ່ວຍເຫລືອປະເທດອື່ນໆໄດ້ຮັບວັກຊິນຢ່າງກະທັນຫັນ ເຊິ່ງທັງໝົດນັ້ນຍ້ອນຄວາມເອົາໃຈໃສ່ຂອງບັນດາລັດຖະບານແຕ່ລະປະເທດ ແລະ ພະຍາຍາມຂອງນັກວິທະຍາສາດໄດ້ອຸທິດທຶນຮອນຢ່າງຫລວງຫລາຍ, ເຫື່ອແຮງກໍາລັງວັງຊາ ແລະ ສະຕິປັນຍາ ໂດຍບໍ່ຮູ້ອິດບໍ່ຮູ້ເມື່ອຍເພື່ອກອບກູ້ເອົາຊີວິດຂອງມວນມະນຸດໃຫ້ລອດພົ້ນຈາກພະຍາດຜີສາດຮ້າຍໂຄວິດນັ້ນເອງ.

ຄຽງຄູ່ກັບສິ່ງທີ່ດີເປັນດ້ານບວກນັ້ນຄວນໄດ້ຮັບການຍ້ອງຍໍສັນລະເສີນ ຊົມເຊີຍ ຮູ້ບຸນຄຸນ ແລະ ຈາລຶກໄວ້ໃນປະຫວັດສາດຕໍ່ບຸກຄົນ, ກຸ່ມຄົນ ລວມບັນດາປະເທດຕ່າງໆທີ່ເສຍສະລະ ແລະ ເຮັດແທ້ທໍາຈິງເພື່ອຜົນປະໂຫຍດລວມຂອງຊາວໂລກ ແຕ່ອີກດ້ານໜຶ່ງທີ່ເປັນທາງລົບຄວນກ່າວປະນາມ ແລະ ຕີຖອຍຢ່າງເດັດຂາດຕໍ່ກັບບາງບາງຄົນ, ບາງກຸ່ມຄົນ ແລະ ບາງປະເທດໄດ້ນໍາເອົາບັນຫາການແພ່ລະບາດໂຄວິດ-19ມາເປັນບັນຫາການເມືອງເພື່ອສ້າງຄວາມຂັດແຍ່ງ, ສ້າງຄວາມແຕກແຍກ ແລະ ເພີ່ມຄວາມເຄັ່ງຕືງໂດຍແບ່ງແຍກຊົນຊາດຊົນເຜົ່າ, ສ້າງຄວາມບໍ່ສະຫງົບສຸກ, ສ້າງຄວາມບໍ່ເຂົ້າໃຈ ແລະ ບິດເບື່ອນຄວາມຈິງໃນໂລກນີ້.

ຫວ່າງບໍ່ດົນມານີ້, ວິທະຍຸສາກົນແຫ່ງປະເທດຈີນ (ຊີອາໄອ)ໄດ້ເປີດເຜີຍວ່າ: ມີ 75 ປະເທດ ໄດ້ສົ່ງຈົດໝາຍລົງລາຍເຊັນຮ່ວມ ຫລື ຈົດໝາຍຂອງເຂົາເຈົ້າ ເຖິງຜູ້ອຳນວຍການໃຫຍ່ອົງການອະນາໄມໂລກ ຫລື WHO ເພື່ອຄັດຄ້ານຕໍ່ບາງກຸ່ມຄົນ ແລະ ບາງປະເທດໄດ້ນໍາເອົາການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ເປັນບັນຫາການເມືອງ ເຊິ່ງບາງເນື້ອໃນຍັງເນັ້ນຢໍ້າວ່າ: ການສຳຫລວດຫາ ແຫລ່ງກຳເນີດຂອງເຊື້ອພະຍາດໂຄວິດ-19 ແມ່ນໜ້າທີ່ຂອງຊ່ຽວຊານ ແລະ ນັກວິທະຍາສາດສະເພາະແທ້ໆ ນັ້ນບໍ່ແມ່ນເລື່ອງວິຊາສະເພາະຂອງນັກການເມືອງ ແລະ ບໍ່ແມ່ນເລື່ອງຂອງນັກໂຄສະນາເວົ້າເກັ່ງເພື່ອເສດສັນປັ້ນແຕ່ງເລື່ອງໂດຍບໍ່ມີຫລັກຖານ.

ນອກຈາກນັ້ນກໍມີ 300 ກວ່າພັກການເມືອງ, ອົງການຈັດຕັ້ງທາງສັງຄົມ ແລະ ຄັງປັນຍາ ຈາກ 100 ກວ່າປະເທດ ແລະ ເຂດແຄວ້ນໃນໂລກໄດ້ກ່າວໃນຖະແຫລງການ ຮ່ວມທີ່ຍື່ນໃຫ້ກອງເລຂາອົງການອະນາໄມໂລກ ໂດຍຊີ້ໃຫ້ເຫັນວ່າ: ແຜນການການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ໄລຍະ ທີ2 ທີ່ກອງເລຂາດັ່ງກ່າວ ສະເໜີແຕ່ຝ່າຍດຽວບໍ່ສອດຄ່ອງກັບຄວາມ ຮຽກຮ້ອງຕ້ອງການຂອງມະຕິກອງປະຊຸມໃຫຍ່ອົງການອະນາໄມໂລກ, ບໍ່ໄດ້ ຜ່ານການປຶກສາຫາລືກັບປະເທດສະມາຊິກອົງການອະນາໄມໂລກຢ່າງເຕັມປ່ຽມ, ທັງບໍ່ໄດ້ສ່ອງແສງໃຫ້ເຫັນເຖິງໝາກຜົນຫລ້າສຸດ ໃນການຄົ້ນຄວ້າ ກ່ຽວກັບການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ຂອງໂລກຢ່າງຮອບດ້ານ, ບໍ່ມີຜົນດີຕໍ່ການຊີ້ນຳການຮ່ວມມືດ້ານການສຳ ຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ຂອງໂລກ ໃຫ້ສາມາດໄດ້ຮັບການຊຸກຍູ້ໃຫ້ເຂົ້າສູ່ລວງເລິກຢ່າງຕໍ່ເນື່ອງ. ຖະແຫລງການໄດ້ຮຽກຮ້ອງໃຫ້ອົງການອະນາໄມໂລກ ດຳເນີນການ ຄົ້ນຄວ້າກ່ຽວກັບການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ຂອງໂລກຢ່າງພາວະວິໄສ ແລະ ຍຸຕິທຳ, ເດັດດ່ຽວຄັດຄ້ານການຫັນ ບັນຫາການສຳຫລວດຫາແຫລ່ງກຳເນີດຂອງເຊື້ອພະຍາດໂຄວິດ-19 ເປັນບັນຫາການເມືອງ.

ພ້ອມນີ້ ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວກໍໄດ້ໃຫ້ຄໍາເຫັນບາງຕອນລະຫວ່າງການໃຫ້ສໍາພາດຕໍ່ນັກຂ່າວວິທະຍຸສາກົນແຫງປະເທດຈີນ ປະຈຳລາວ ແລະ ໂທລະພາບ CCTV ຂອງຈີນກ່ຽວກັບການຄົ້ນຫາແຫລ່ງກໍາເນີດຂອງພະຍາດໂຄວິດ-19 ວ່າ: “ໃຜຍັງຄິດເລື່ອງນີ້ເອົາມາເປັນບັນຫາການເມືອງແມ່ນບໍ່ມີຄວາມມະນຸດສະທໍາໃນຫົວໃຈ ທຸກປະເທດ ນັກປາດອາຈານທີ່ມີຄວາມຮູ້ທາງວິທະຍາສາດຕ້ອງພ້ອມກັນຊອກຫາສາເຫດວ່າເປັນຫຍັງມັນຈິ່ງເກີດ? ຄັນເຮົາຮູ້ສາເຫດມັນເກີດແລ້ວເຮົາຈິ່ງສາມາດຢືນຢັນວ່າເປັນຫຍັງມັນຈິ່ງເກີດຢູ່ບ່ອນນີ້ ແລະ ເປັນຫຍັງມັນຈິ່ງເກີດຢູ່ບ່ອນນັ້ນ? ມັນແມ່ນວິທະຍາສາດ, ມັນບໍ່ແມ່ນນະໂຍບາຍການຕ່າງປະເທດ ແລະ ບໍ່ແມ່ນນະໂຍບາຍການເມືອງ. ສະນັ້ນ ເລື່ອງທີ່ກ່າວມາຂ້າງເທີງ ເຮົາຈິ່ງສາມາດແກ້ໄດ້ ຖ້າບໍ່ຮູ້ຄວາມເປັນຈິງກໍໂຍນໃຫ້ຜູ້ນັ້ນໂຍນໃຫ້ຜູ້ນີ້ ຫລື ຖິ້ມໃຫ້ຜູ້ນັ້ນຜູ້ນີ້ຈະບໍ່ສາມາດເຫັນສາເຫດຈັກເທື່ອ ແລະ ກໍບໍ່ສາມາດບົ່ງມະຕິປິ່ນປົວໄດ້ຈັກເທື່ອ. ການຊອກຫາແຫລ່ງກໍາເນີດກໍດີ ແລະ ສາເຫດກໍດີຂອງການເກີດພະຍາດໂຄວິດ-19 ຕ້ອງແມ່ນບົນພື້ນຖານຫລັກການວິທະຍາສາດ, ຕ້ອງບໍ່ເອົາການເມືອງເຂົ້າມາກ່ຽວຂ້ອງ ຖ້າດີແທ້ການເມືອງຕ້ອງຮ່ວມມືກັນໃຫ້ມັນດີ ຈິງໃຈນໍາກັນ ແລະ ເປີດໃຈນໍາກັນ”.

ຕອນທ້າຍບົດສໍາພາດ, ທ່ານ ນາຍົກລັດຖະມົນຕີແຫ່ງ ສປປ ລາວຍັງກ່າວສະແດງຄວາມຊົມເຊີຍ ແລະ ຍິນດີຢ່າງຈິງໃຈທີ່ເຫັນວ່າປະເທດຈີນສາມາດຫລຸດພົ້ນອອກຈາກຄວາມທຸກຍາກໄດ້ຢ່າງໃຫຍ່ຫລວງໃຊ້ເວລາບໍ່ຮອດ 10 ປີ. ໄລຍະຫລັງມານີ້, ພັກກອມມູນິດຈີນສາມາດເຮັດໃຫ້ພົນລະເມືອງຈີນເກືອບ 800 ລ້ານຄົນພົ້ນອອກຈາກຄວາມທຸກຍາກ, ເສດຖະກິດຂອງຈີນຢູ່ໃນໄລຍະແຖວໜ້າຂອງໂລກ ແລະ ມີຄວາມສາມາດຈະນໍາໜ້າເສດຖະກິດຂອງໂລກ. ນີ້ເປັນສິ່ງມະຫັດສະຈັນທີ່ເຮັດໄດ້ຍາກ.ອີກເຫດການໜຶ່ງທີ່ໂດດເດັ່ນ ແລະ ທົ່ວໂລກໃຫ້ການຍ້ອງຍໍແມ່ນການຊີ້ນຳ ແລະ ນຳພາຂອງພັກກອມມູນິດຈີນສາມາດສະກັດກັ້ນໂຄວິດ-19 ໄດ້ຢ່າງໜັກແໜ້ນດ້ວຍພົນລະເມືອງ 1,4 ຕື້ຄົນ ເຊິ່ງມີປະຊາກອນເປັນທີ່ໜຶ່ງຂອງໂລກ ແຕ່ໃຊ້ເວລາໃນໄລຍະສັ້ນໆຄວບຄຸມພະຍາດໂຄວິດ-19 ໄດ້ທົ່ວ ສປ ຈີນໂດດເດັ່ນ. ນອກຈາກສປ ຈີນ ມີຜົນສຳເລັດໃນການຄວບຄຸມພະຍາດໂຄວິດ-19 ຢູ່ພາຍໃນປະເທດແລ້ວ, ສປ ຈີນຍັງສ້າງຄວາມເອື້ອເຟື້ອເພື່ອແຜ່ຂອງຕົນເອງເພື່ອກອບກູ້ຊີວິດມວນມະນຸດໃນໂລກ ພ້ອມທັງຢືດໝັ້ນການສ້າງຄູ່ຮ່ວມຊາຕາກໍາຂອງມວນມະນຸດໂດຍໄດ້ສົ່ງຢາວັກຊີນໄປຫລາຍລ້ານໂດສ, ສົ່ງອຸປະກອນການແພດ ແລະ ບຸກຄະລາກອນໄປຊ່ວຍເຫລືອປະເທດອື່ນໆໂດຍການບໍລິຈາກດວ້ຍຄວາມເສຍສະຫລະອັນຍິ່ງໃຫຍ່.

ຕາມແຫລ່ງຂ່າວຊີເອັນເອັນ (CNN) ຂອງສະຫະລັດອາເມລິກາປະຈໍາຢູ່ຮ່ອງກົງ(https://edition.cnn.com/2021) ແລະ ນີວຢອກທາມຂອງສະຫະລັດໄດ້ລາຍງານຫວ່າງບໍ່ດົນມານີ້ວ່າ: ສປ ຈີນໄດ້ຮັບໄຊຊະນະໃນການຕ້ານ ແລະ ສະກັດກັ້ນພະຍາດໂຄວິດຮອບດ້ານດ້ວຍວິທີເພີ່ມມາດຕະການຂຶ້ນສອງເທົ່າຢ່າງເຂັ້ມງວດ ເຊິ່ງເປັນຜົນເຮັດໃຫ້ບໍ່ມີກໍລະນີຕິດເຊື້ອພະຍາດໂຄວິດທົ່ວປະເທດເປັນຄັ້ງທໍາອິດນັບຕັ້ງແຕ່ເດືອນກໍລະກົດເຖີງປັດຈຸບັນນີ້ ແລະ ກາຍເປັນປະເທດທຳອິດຂອງໂລກທີ່ຄວບຄຸມການລະບາດຂອງເຊື້ອພະຍາດໂຄວິດສາຍພັນເດວຕາ(Delta).

ເຖີງປັດຈຸບັນນີ້ເວບໄຊໂກລໂບທາມສ(https://www.globaltimes.cn/page/202108/1230714.sh)ເປີດເຜີຍວ່າ:ສປ ຈີນກາຍເປັນປະເທດອັນດັບທີ 1 ຢືນຢູ່ແຖວໜ້າຂອງໂລກໃນການສະໜອງຢາວັກຊິນຕ້ານໂຄວິດໃຫ້ປະເທດຕ່າງໆຫລາຍກວ່າ 100 ກວ່າປະເທດທົ່ວໂລກ ໃນນັ້ນ ສປ ຈີນໄດ້ຈັດສັນ ແລະ ສົ່ງອອກວັກຊິນຕ້ານໂຄວິດ-19ປະມານ 750 ລ້ານຫລອດ ແລະ ສະຫະລັດອາເມລິກາສົ່ງອອກວັກຊິນຕ້ານໂຄວິດ-19 ພຽງແແຕ່ 110 ລ້ານຫລອດ ຂະນະ ສປ ຈີນ ໄດ້ສົ່ງອອກ ແລະ ສະໜອງວັກຊິນໃຫ້ 10 ປະເທດສະມາຊິກອາຊຽນລວມທັງໝົດ 200 ລ້ານກວ່າຫລອດ ໃນນັ້ນ ສປປ ລາວໄດ້ຮັບຢາວັກຊິນຕ້ານໂຄວິດຈາກ ສປ ຈີນຫລາຍກວ່າ 3 ລ້ານຫລອດ.

ແນວໃດກໍດີ ຫລ້າສຸດ ຜູ້ນໍາໃນບັນດາປະເທດສະມາຊິກອາຊຽນ ແລະ ປະເທດອື່ນໆທົ່ວໂລກໄດ້ຮຽກຮ້ອງໃຫ້ບາງປະເທດທີ່ມີທັດສະນະຄະຕິທາງລົບຈົ່ງຍົກສູງນໍ້າໃຈສາກົນ, ເຄົາລົບວິທະຍາສາດ,ຢຸດຕິການຖິ້ມໂທດ ແລະ ໃສ່ຮ້າຍປ້າຍສີປະເທດອື່ນດ້ວຍຖືເອົາການສືບສວນຫາແຫລ່ງກຳເນີດຂອງເຊື້ອພະຍາດໂຄວິດ-19 ມາເປັນເລື່ອງການເມືອງເດັດຂາດ, ແລ້ວກັບຄືນສູ່ເສັ້ນທາງທີ່ຖືກຕ້ອງໃນການຮ່ວມມືກັນຕ້ານກັບພະຍາດ ແລະ ຊອກຫາແຫລ່ງກຳເນີດຂອງເຊື້ອພະຍາດທີ່ຖືກຕ້ອງຕາມຫລັກວິທະຍາສາດໂດຍໄວເທົ່າທີ່ຈະໄວໄດ້.

ສາລະໜ້າຮູ້