ເຮືອນ 111ຫຼັງທີ່ສ້າງໃຫ້ຄອບຄົວທຸກຍາກ ທີ່ໄດ້ຮັບຜົນກະທົບຈາກເຂື່ອນເຊປຽນ-ເຊນໍ້ານ້ອຍ ສໍາເລັດ 100%

ເຮືອນ 111ຫຼັງທີ່ສ້າງໃຫ້ຄອບຄົວທຸກຍາກ ທີ່ໄດ້ຮັບຜົນກະທົບຈາກເຂື່ອນເຊປຽນ-ເຊນໍ້ານ້ອຍ ສໍາເລັດ 100%

ພະແນກໂຍທາທິການ ແລະ ຂົນສົ່ງ (ຍທຂ) ແຂວງອັດຕະປື ແຈ້ງໃຫ້ຮູ້ວ່າ: ເຮືອນ 111 ຫຼັງທີ່ສ້າງໃຫ້ຄອບຄົວອານາຖາ ຫຼື ຄອບຄົວທຸກຍາກທີ່ໄດ້ຮັບຜົນກະທົບຈາກສັນເຂື່ອນເຊປຽນ-ເຊນໍ້ານ້ອຍແຕກ ໃນປີ 2018 ທີ່ຜ່ານມາ ຢູ່ເມືອງສະໜາມໄຊ ແຂວງອັດຕະປືໄດ້ສ້າງສໍາເລັດ 100% ພາຍຫຼັງທີ່ເລີ່ມລົງມືກໍ່ສ້າງມາແຕ່ປີ 2020 ແລະ ປະຊາຊົນໄດ້ເຂົ້າຢູ່ອາໄສເປັນທີ່ຮຽບຮ້ອຍແລ້ວ.

ທ່ານວຽງທອງ ທໍາມານຸວົງ ຮອງພະແນກ ຍທຂ ໄດ້ກ່າວຕໍ່ທີມງານວຽງຈັນທາຍເມື່ອບໍ່ດົນມານີ້ວ່າ: ຄອບຄົວທຸກຍາກຫຼາຍກວ່າ 100 ຄອບຄົວຕ່າງກໍ່ດີໃຈທີ່ພວກເຂົາໄດ້ຢູ່ເຮືອນຖາວອນທີ່ມີຄຸນນະພາບຈໍານວນ 111 ຫຼັງທີ່ໄດ້ຮັບການຊ່ວຍເຫຼືອຈາກລັດຖະບານໄທ ແລະ ລັດຖະບານຍີ່ປຸ່ນ. ໃນນີ້ ຈໍານວນເຮືອນ 66 ຫຼັງຈາກ 111 ຫຼັງ ແມ່ນໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນພາຍໃຕ້ໂຄງການ UNHABITAT ນອກນັ້ນທາງໂຄງການຍັງມີການເຈາະບາດານ ແລະ ແຈກຢາຍທໍ່ໄປໃຫ້ແຕ່ລະຄອບຄົວໄດ້ຊົມໃຊ້ນໍ້າສະອາດ ແລະ ສ່ວນອີກ 45 ຫຼັງແມ່ນໄດ້ຮັບການຊ່ວຍເຫຼືອຈາກລັດຖະບານໄທ.

ທ່ານວຽງທອງໄດ້ກ່າວຕື່ມວ່າ: ເຮືອນຈໍານວນ 111 ຫຼັງດັ່ງກ່າວ ແມ່ນບໍ່ນອນຢູ່ໃນໂຄງການກໍ່ສ້າງເຮືອນຖາວອນ 700 ຫຼັງໃຫ້ຜູ້ປະສົບໄພຈາກສັນເຂື່ອນເຊປຽນ-ເຊນໍ້ານ້ອຍແຕກ ຊຶ່ງຮອດປັດຈຸບັນໂຄງການກໍ່ສ້າງເຮືອນ 700 ຫຼັງດັ່ງກ່າວໄດ້ລົງມືກໍ່ສ້າງແລ້ວຈໍານວນ 496 ຫຼັງ ໃນນີ້ 440 ຫຼັງຈະສ້າງສໍາເລັດກ່ອນເດືອນພຶດສະພາ 2021 ທີ່ຈະມາເຖິງນີ້ ແລະ ອີກ 56 ຫຼັງຈະສໍາເລັດໃນທ້າຍປີ 2021, ສ່ວນວ່າ ອີກ 204 ຫຼັງຈາກ 700 ຫຼັງທີ່ຍັງບໍ່ໄດ້ລົງມືກໍ່ສ້າງນັ້ນ ຍ້ອນວ່າດິນປຸກສ້າງບາງສ່ວນຍັງຄາຜົນລະປູກຂອງປະຊາຊົນ, ບາງສ່ວນດິນຍັງເປັນໜອງບໍ່ໄດ້ຖົມ ແລະ ອີກບັນຫາໜຶ່ງຍັງມີປະຊາຊົນຈໍານວນໜຶ່ງທີ່ຍັງບໍ່ຍອມຮັບໂຄງສ້າງຂອງເຮືອນ ແລະ ທີ່ດິນ ເຊັ່ນວ່າ ເຮືອນຫຼັງນ້ອຍ ຢາກໄດ້ຫຼັງໃຫຍ່ ແລະ ອື່ນໆ.

ຂ່າວ: ວຽງຈັນທາຍ

ຂ່າວລາວ