ລັດຖະບານ​ ວາງແນວທາງປະຕິບັດເຂັ້ມງວດ ໃນການແກ້ໄຂບັນຫາຫວຍເຖື່ອນ.

ລັດຖະບານ​ ວາງແນວທາງປະຕິບັດເຂັ້ມງວດ ໃນການແກ້ໄຂບັນຫາຫວຍເຖື່ອນ.

ທ່ານ ບຸນ ໂຈມ ອຸບົນປະເສີດ​ ລັດຖະມົນຕີກະຊວງການເງິນ ໄດ້ຢືນຢັນເພີ່ມເຕີມອີກເທື່ອຫນຶ່ງ ວ່າ: ຈຸດ ປະສົງຫລັກຂອງການອອກຫວຍ 3 ຄັ້ງຕໍ່ ອາທິດ ແມ່ນຄວາມພະຍາຍາມໃນການແກ້ໄຂ ບັນຫາ ຫວຍເຖື່ອນທີ່ມີການລະບາດຫລາຍໃນສັງຄົມ

ປັດຈຸບັນ ຊຶ່ງ ຜ່ານການຈັດຕັ້ງປະຕິບັດ ເຫັນໄດ້ວ່າ ສັງຄົມ ຫັນ ມາ ສ່ຽງໂຊກຊີງລາງວັນ ຫວຍພັດທະນາລາວ ຫລາຍຂຶ້ນ ສະແດງອອກຈາກການເກັບລາຍຮັບ ເຂົ້າງົບປະມານເພີ່ມຂຶ້ນ. ພ້ອມກັນນັ້ນ, ຜົນກະທົບອີກ ດ້ານຫນຶ່ງຂອງການຈັດຕັ້ງປະຕິບັດນະໂຍບາຍດັ່ງກ່າວກໍເປັນສ່ວນຫນຶ່ງທີ່ຊ່ວຍເຮັດໃຫ້ປະຊາຊົນຜູ້ທີ່ວ່າງງານ ໃນໄລຍະ ການລະບາດຂອງພະນາດ ໂຄວິດ-19 ສາມາດສ້າງລາຍຮັບເພີ່ມໄດ້ຈາກການເປັນຜູ້ບໍລິການຂາຍຫວຍ ອີກດ້ວຍ. ທ່ານ ລັດຖະມົນຕີກະຊວງການເງິນ ຍົກໃຫ້ເຫັນ ອີກວ່າ:

ໃນວາລະດຳເນີນກອງປະຊຸມສະໄໝສາມັນ ເທື່ອ ທີ 2 ຂອງສະພາແຫ່ງຊາດຊຸດທີ IX ວ່າ: ບັນ ຫາການອອກຫວຍພັດທະນາລາວ ໃນປີ 2016 ຜ່ານ ມາ ແມ່ນ 3 ຄັ້ງຕໍ່ອາທິດ (ວັນຈັນ, ພຸດ, ສຸກ) ເຊິ່ງໃນ ເວລານັ້ນມີຕົວແທນຂາຍຫວຍ (ຜູ້ທີ່ຂາຍຢູ່ແຄມ ທາງ) ໃນທົ່ວປະເທດມີປະມານ 15.000-20.000 ຄົນ ແລະ ມີ 50 ຕົວແທນຈໍາໜ່າຍ (ແມ່ຫວຍ) ເຮັດໃຫ້ພັນທະງົບປະມານໄດ້ສະເລ່ຍປະມານ 80 ຕື້ກີບ.

ຕໍ່ມາກໍໄດ້ມີຫາງສຽງຈາກສັງຄົມ ວ່າມັນ ເປັນການສ້າງຄວາມເບື່ອເມົາ ແລະ ຕິດການສ່ຽງ ໂຊກລາບຂອງພໍ່ແມ່ປະຊາຊົນຫລາຍເກີນໄປ ເພື່ອ ແກ້ໄຂບັນຫາດັ່ງກ່າວ ໃນປີ 2018 ລັດຖະ ບານໄດ້ ຢຸດການອອກຫວຍ 3 ຄັ້ງຕໍ່ອາທິດມາເປັນ ອາທິດລະ ຄັ້ງ ພ້ອມທັງລົບລ້າງຫວຍຂູດ ເຮັດໃຫ້ພວກເຮົາສູນ ເສຍລາຍຮັບຈາກ 80 ຕື້ ເຫລືອ 40 ຕື້ກີບ, ໃນຂະນະ ດຽວກັນ, ຊ້ຳພັດມີຫວຍເຖື່ອນ ເຂົ້າມາແທນທີ່ ເຮັດ ໃຫ້ລັດເຮົາສູນເສຍລາຍຮັບໄປ ປະມານ 60% ຂອງ ຈໍານວນທີ່ເຮົາເຄີຍໄດ້ຈໍາໜ່າຍຜ່ານມາ ໂດຍທີ່ລັດ ບໍ່ໄດ້ຫຍັງ. ຍົກຕົວຢ່າງຄື ຫວຍໄທ ແມ່ນອອກເດືອນ ໜຶ່ງສອງຄັ້ງ (ວັນທີ 1 ແລະ ວັນທີ 16), ຫວຍຫວຽດ ນາມ ອອກ 4 ຄັ້ງຕໍ່ມື້ ທີ່ໄດ້ແຜ່ກະຈາຍຫລາຍ ໃນສັງ ຄົມລາວ.

ສ່ວນຫວຍກຳປູເຈຍພວມເຂົ້າມາແຜ່ລາມ ໃນສັງຄົມລາວ ເຊິ່ງຖ່າຍທອດສົດທຸກມື້ ອອກ 3 ຄັ້ງຕໍ່ມື້, ຫວຍຈີນອອກມື້ລະຄັ້ງ, ຫວຍອອນລາຍ ມີ 3 ຫວຍທີ່ພວກເຮົາຍັງບໍ່ສາມາດເຂົ້າຫາຂໍ້ມູນໄດ້ ໂດຍມີເງິນສະສົມລາງວັນ 800 ລ້ານກີບ ເຊິ່ງບໍ່ແມ່ນ ຫວຍຂອງລັດຖະບານ ແຕ່ແມ່ນຫວຍເຖື່ອນ (ຫວຍ ອອນລາຍເຖື່ອນ) ທີ່ປະກາດໂຄສະນາຢູ່ໃນ ເຟສບຸກ.

ສ່ວນຫວຍມາເລເຊຍ ອອກ 25 ຄັ້ງຕໍ່ມື້ ອອກອອນ ລາຍທຸກໆ 30 ນາທີ ເຊິ່ງບັນຫາຂອງຫວຍເຖື່ອນນີ້ ໄດ້ເຮັດໃຫ້ເກີດມີບັນຫາຂອງສັງຄົມຂຶ້ນ ໂດຍສະ ເພາະຖືກຫວຍແລ້ວແຕ່ບໍ່ໄດ້ເງິນ ພ້ອມກັນນີ້ ບັນດາ ແມ່ຫວຍເຖື່ອນ ກໍບໍ່ໄດ້ປະກອບສ່ວນພັນທະຫຍັງ ໃຫ້ແກ່ປະເທດຊາດຂອງເຮົາ. ສະນັ້ນ, ພວກເຮົາ ຈຶ່ງ ໄດ້ຄົ້ນຄວ້າຄືນວ່າ ຄວາມຕ້ອງການສ່ຽງໂຊກຂອງ ປະ ຊາຊົນ ແມ່ນຍັງມີຢູ່ຫລາຍ, ລັດຖະບານຈຶ່ງໄດ້ຕົກລົງ ກັນຄືນໃໝ່ ໃນປີ 2020 ແມ່ນໄດ້ອອກຫວຍ 2 ຄັ້ງຕໍ່ ອາທິດ ເຮັດໃຫ້ຕົວແທນຈຳໜ່າຍເລີ່ມ ກັບມາມີວຽກ ເຮັດອີກຄັ້ງ ແລະ ລັດເຮົາກໍໄດ້ຮັບລາຍຮັບເພີ່ມຂຶ້ນ ຕື່ມປະມານ 70 ຕື້ກີບຕໍ່ປີ.

ມາຮອດປັດຈຸບັນຕົວ ແທນ ຫລື ຜູ້ທີ່ເຄີຍຂາຍຫວຍ, ນອກຈາກໄດ້ມີວຽກ ເຮັດ ງານທຳແລ້ວ ຍັງສ້າງລາຍຮັບແກ່ເຂົາເຈົ້າ ຕື່ມ ອີກ. ດ້ວຍເຫດຜົນນີ້, ລັດຈຶ່ງໄດ້ຕົກລົງທົດລອງ ອອກຄືນໃນ 3 ຄັ້ງຕໍ່ອາທິດ ເພື່ອຈະໄດ້ແກ້ໄຂ ແລະ ທັງເປັນການສົ່ງເສີມບັນຫາການສ້າງວຽກເຮັດງານທຳໃຫ້ແກ່ຜູ້ວ່າງງານຢູ່ໃນສັງຄົມເຮົາ ໂດຍສະເພາະ ຄົນເສຍອົງຄະ, ຄົນພິການ ແລະ ຜູ້ດ້ອຍໂອກາດ ໃຫ້ເຂົ້າສູ່ການເປັນຕົວແທນການຈຳໜ່າຍຫວຍ, ເຊິ່ງຄາດວ່າຈະສ້າງລາຍຮັບເຂົ້າງົບປະມານ ຢູ່ປະມານ 80-120 ຕື້ກີບ.

ນອກຈາກນີ້ ຍັງຈະປະກອບສ່ວນ ຊ່ວຍເຫລືອສັງຄົມຫລາຍຕື້ເຊັ່ນດຽວກັນ. ຕົວຢ່າງ ໃນປີ 2016 ພວກເຮົາໄດ້ຈ່າຍເງິນຄ່າເປີເຊັນຂາຍ ປະມານ 200 ກວ່າຕື້ກີບ ໃນຈຳນວນ 15.000-20.000 ຄົນ, ມາຮອດປີນີ້ແມ່ນຈະເລັ່ງໃສ່ ສູນເສຍອົງຄະ, ຜູ້ພິການ ແລະ ຜູ້ດ້ອຍໂອກາດ ໃຫ້ ເຂົ້າມາເປັນຕົວແທນຈຳໜ່າຍ.

 

ຂ່າວລາວ