ໂຄວິດສາຍພັນໂອມິຄຣອນອາລະວາດ ທຳລາຍບັນຍາກາດກ່ອນບຸນປີໃໝ່ລາວ

ໂຄວິດສາຍພັນໂອມິຄຣອນອາລະວາດ ທຳລາຍບັນຍາກາດກ່ອນບຸນປີໃໝ່ລາວ

ມາຮອດວັນທີ 24 ມີນາ 2022 ການແພ່ລະບາດຂອງພະຍາດໂຄວິດ-19 ສາຍພັນໂອມິຄຣອນພຸ່ງຂຶ້ນເຖິງ 2.817 ຄົນໃນທົ່ວປະເທດ. ສະເພາະນະຄອນຫລວງວຽງຈັນແມ່ນມີຜູ້ຕິດເຊື້ອຫລາຍກວ່າທຸກແຂວງໃນທົ່ວປະເທດເຖິງ 1.331 ຄົນ. ຖືວ່າການຫວນຄືນມາແພ່ລະບາດຮອບໃໝ່ຂອງພະຍາດຊະນິດນີ້ແມ່ນໜັກໜ່ວງກວ່າເກົ່າ ຖ້າທຽບໃສ່ສາຍພັນອື່ນໆທີ່ຜ່ານມາ.

ແລະ ໃນວັນສຸກ 25/03/2022 ໂດຍກວດພົບການຕິດເຊື້ອໂຄວິດທັງໝົດ 2.212 ຄົນ ແລະ ເສຍຊີວິດ +2 ຄົນ.

ຫາກຕັ້ງໂຈດກັນວ່າ, ດ້ວຍສາເຫດໃດເຊື້ອພະຍາດດັ່ງກ່າວຈຶ່ງເລີ່ມມາແພ່ລະບາດອີກຄັ້ງໃໝ່. ອັນສາເຫດກໍຍ້ອນວ່າການປະຕິບັດມາດຕະການຕ້ານ ການປ້ອງກັນສະກັດກັ້ນ ຄວບຄຸມ ແລະ ແກ້ໄຂພະຍາດດັ່ງກ່າວໃນຊ່ວງສອງສາມເດືອນຜ່ານມາ ພວກເຮົາຂ້ອນຂ້າງລະເຫລີງ. ນອກຈາກນັ້ນ ທາງການເຮົາກໍມີການຜ່ອນຜັນໃນຫລາຍມາດຕະການ ເພື່ອຟື້ນຟູເສດຖະກິດຂອງຊາດ. ຈາກສາເຫດດັ່ງກ່າວຈຶ່ງເຮັດໃຫ້ການຕິດເຊື້ອແພ່ລະບາດໃນຊຸມຊົນພຸ້ງຂຶ້ນຢ່າງໜ້າວິຕົກ.

ກໍດັ່ງພວກເຮົາໄດ້ຮັບຮູ້ນຳກັນມາແລ້ວວ່າ, ເຊື້ອພະຍາດໂຄວິດ-19 ມັນບໍ່ໄດ້ໜີຈາກພວກເຮົາແບບງ່າຍໆ, ກົງກັນຂ້າມ ຖ້າມື້ໃດເຮົາເຜີຕົວຖືເບົາໃນການຮັກສາສຸຂະພາບມັນກໍສາມາດແພ່ກະຈາຍຢ່າງວ່ອງໄວ ແລະ ກວ້າງຂວາງ. ນັບແຕ່ພະຍາດໂຄວິດ-19 ມີການແພ່ລະບາດຢູ່ປະເທດເຮົາໄດ້ສ້າງຜົນກະທົບດ້ານເສດຖະກິດ-ສັງຄົມຢ່າງໃຫຍ່ຫລວງ. ຈາກຕົວເລກຄວາມເສຍຫາຍໃນຂະແໜງການທ່ອງທ່ຽວ ແລະ ການບໍລິການພາກລັດເຮົາເສຍລາຍຮັບໄປຫລາຍພັນຕື້ໂດລາໃນໄລຍະສອງສາມປີຜ່ານມາ. ປັດຈຸບັນ ຢູ່ປະເທດເຮົາມີຜູ້ຕິດເຊື້ອສະສົມໄປແລ້ວ 161.866 ຄົນ ໃນນີ້ເສຍຊີວິດສະສົມມີເຖິງ 652 ຄົນ.

ແນວໃດກໍຕາມ, ໃນກອງປະຊຸມສະໄໝສາມັນປະຈຳເດືອນມີນາ 2022 ເຊິ່ງຈັດຂຶ້ນໃນວັນທີ 21 ມີນາ 2022 ຜ່ານມາ, ລັດຖະບານເຮົາກໍໄດ້ຕີລາຄາຢ່າງພາວະວິໄສວ່າ: ກອງປະຊຸມຄັ້ງນີ້ໄດ້ດຳເນີນໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນພວມສຸມໃສ່ປະຕິບັດ 2 ວາລະແຫ່ງຊາດ ແລະ ສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ. ໃນຂະນະດຽວກັນ ສະພາບການຂອງໂລກຍັງສືບຕໍ່ຜັນແປໄປຢ່າງສັບສົນ ແລະ ເຄັ່ງຮ້ອນ. ສະເພາະຢູ່ປະເທດເຮົາຍັງມີການຜະເຊີນກັບການແພ່ລະບາດຂອງພະຍາດໂຄວິດ-19, ໄພເງິນເຟີ້, ລາຄານ້ຳມັນເຊື້ອໄຟມີການເໜັງຕີງເພີ່ມຂຶ້ນ ຍ້ອນຜົນກະທົບຈາກພາຍນອກ ກາຍເປັນສິ່ງທ້າທາຍຕໍ່ການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາຊົນບັນດາເຜົ່າ.

ເພາະສະນັ້ນ, ໃນພາລະກິດປ້ອງກັນ, ຕ້ານສະກັດກັ້ນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19 ຈຶ່ງເປັນຄວາມຈຳເປັນຂອງທຸກຄົນທີ່ຕ້ອງຊ່ວຍກັນຮັກສາຊີວິດ ແລະ ຊັບສິນ. ຖ້າບໍ່ດັ່ງນັ້ນ ຈະມີການກະທົບຢ່າງໜັກຕໍ່ເສດຖະກິດ-ສັງຄົມຂອງປະເທດຊາດ ແລະ ຊີວິດການເປັນຢູ່ຂອງປະຊາຊົນ. ອັນສຳຄັນທີ່ສຸດການທ່ອງທ່ຽວໄປມາຫາສູ່ກັນ ນັບທັງການທຳລຸລະກິດການງານກໍຈະພາກັນເຈັ້ງເໝືອນດັ່ງສອງສາມປີຜ່ານມາ, ຍິ່ງໄປກວ່ານັ້ນ ການສະຫລອງບຸນປີໃໝ່ລາວທີ່ພາກັນຄອງຄອຍກໍຈະກາຍເປັນອຳມະພາດຍ້ອນໂອມິຄຣອນມາອາລະວາດທຳລາຍບັນຍາກາດກ່ອນບຸນປີໃໝ່ລາວທີ່ຈະມາເຖິງ.

ຂ່າວລາວ