ຮອງລັດຖະມົນຕີ ຖວທ ຮຽກຮ້ອງໃຫ້ຫົວໜ່ວຍທຸລະກິດ ສືບຕໍ່ປັບປຸງສະຖານທີ່ທ່ອງທ່ຽວ ກຽມຕ້ອນຮັບນັກທ່ອງທ່ຽວ

ຮອງລັດຖະມົນຕີ ຖວທ ຮຽກຮ້ອງໃຫ້ຫົວໜ່ວຍທຸລະກິດ ສືບຕໍ່ປັບປຸງສະຖານທີ່ທ່ອງທ່ຽວ ກຽມຕ້ອນຮັບນັກທ່ອງທ່ຽວ

ຂປລ. ໃນໂອກາດຮ່ວມຖະແຫລ່ງຂ່າວກ່ຽວກັບ ມາດຕະການເຂົ້າ-ອອກ ສປປ ລາວ ແລະ ມາດຕະການຜ່ອນຜັນພາຍໃນປະເທດ ໃນໄລຍະມີການລະບາດຂອງພະຍາດໂຄວິດ-19 ວັນທີ 7 ພຶດສະພາ 2022 ນີ້, ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກໍໄດ້ຖະແຫລງກ່ຽວກັບ ແຜນເປີດການທ່ອງທ່ຽວ ຂອງ ສປປ ລາວ ໂດຍທ່ານ ໄດ້ຮຽກຮ້ອງໄປຍັງຫົວໜ່ວຍທຸລະກິດບໍລິການໃນຂະແໜງການທ່ອງທ່ຽວ ສືບຕໍ່ພ້ອມກັນບູລະນາປັບປຸງສະຖານທີ່ທ່ອງທ່ຽວ, ສະ ຖານທີ່ພັກແຮມ, ຮ້ານອາຫານ, ສະຖານທີ່ບັນເທີງ, ການບໍລິການ ແລະ ການຂົນສົ່ງຕ່າງໆ ເພື່ອໃຫ້ມີຄວາມພ້ອມສໍາລັບບໍລິການ ແລະ ສ້າງຄວາມປະທັບໃຈແກ່ນັກທ່ອງທ່ຽວ ພ້ອມທັງໂຄສະນາຢ່າງກວ້າງຂວາງ ສູ່ກຸ່ມຕະຫລາດເປົ້າໝາຍ.

ທ່ານ ອຸ່ນທວງ ຂາວພັນ ໄດ້ໃຫ້ຮູ້ວ່າ: ນັບແຕ່ວັນທີ 9 ພຶດສະພາ 2022 ເປັນຕົ້ນໄປ ນັກທ່ອງທ່ຽວພາຍໃນ ແລະ ຕ່າງປະເທດ ຜູ້ທີ່ສັກວັກຊິນຄົບໂດສ ສາມາດເດີນທາງເຂົ້າ-ອອກ ສປປ ລາວ ໄດ້ຢ່າງເປັນປົກກະຕິ. ດັ່ງນັ້ນ, ເພື່ອຈັດຕັ້ງປະຕິບັດແຜນການເປີດຕ້ອນຮັບນັກທ່ອງທ່ຽວ ເຂົ້າມາທ່ອງທ່ຽວ ຢູ່ ສປປ ລາວ ໃຫ້ມີປະສິດທິພາບ, ມີຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພທາງດ້ານສຸຂະພາບຂອງຜູ້ບໍລິການ ແລະ ນັກທ່ອງທ່ຽວ ແນໃສ່ເຮັດໃຫ້ທຸກພາກສ່ວນໃນສັງຄົມ ໄດ້ມີສ່ວນຮ່ວມໃນການເປັນເຈົ້າພາບທີ່ດີ ຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ ທີ່ຈະເຂົ້າມາທ່ອງທ່ຽວ ສປປ ລາວ ເພື່ອຟື້ນຟູ ແລະ ສົ່ງເສີມການທ່ອງທ່ຽວ ແລະ ກະຕຸ້ນເສດຖະກິດຂອງປະເທດໃຫ້ມີລາຍຮັບເພີ່ມຂຶ້ນ ຕາມແຜນການທີ່ລັດຖະບານວາງອອກ, ເຊິ່ງຂະແໜງການທ່ອງທ່ຽວ ພວກເຮົາຈະສືບຕໍ່ຊຸກຍູ້ສົ່ງເສີມການທ່ອງທ່ຽວພາຍໃນ ແລະ ການເຊື່ອມໂຍງການທ່ອງທ່ຽວກັບພາກພື້ນ ແລະ ສາກົນ; ສືບຕໍ່ປະຕິບັດແຜນການຟື້ນຟູ ການທ່ອງທ່ຽວທີ່ລັດຖະບານໄດ້ຮັບຮອງແລ້ວ; ສືບຕໍ່ຍົກລະດັບຄຸນນະພາບການບໍລິການ ໂດຍສະເພາະແມ່ນຈັດຕັ້ງຜັນຂະຫຍາຍມາດຕະຖານດ້ານສຸຂະນາໄມ ໃນຂະແໜງການທ່ອງທ່ຽວ ແລະ ການໂຮງແຮມ ຫລື LaoSafe; ສືບຕໍ່ປັບປຸງສະຖານທີ່ທ່ອງທ່ຽວ ແລະ ສິ່ງອໍານວຍຄວາມສະດວກດ້ານ ການທ່ອງທ່ຽວ.

ໂອກາດນີ້, ທ່ານຮອງລັດຖະມົນຕີກະຖວງ ຖວທ ຍັງເຊີນຊວນທຸກພາກສ່ວນໃນສັງຄົມ ລວມທັງພາກລັດ, ພາກທຸລະກິດ ແລະ ປະຊາຊົນທ້ອງຖິ່ນ ຕ້ອງໄດ້ຮ່ວມແຮງຮ່ວມໃຈກັນ ໃນການກະກຽມຄວາມພ້ອມໃນ ການເປັນເຈົ້າພາບທີ່ດີ ດ້ວຍການອໍານວຍຄວາມສະດວກແກ່ນັກທ່ອງທ່ຽວ ໃນການສະໜອງຂໍ້ມູນຂ່າວສານການທ່ອງທ່ຽວ, ການບໍລິ ການເຂົ້າ-ອອກປະເທດຕາມດ່ານສາກົນຕ່າງໆ, ການເດີນທາງພາຍໃນປະເທດ, ການກິນຢູ່ພັກເຊົາ, ການຮັກສາສຸຂະພາບ ແລະ ການທ່ຽວຊົມຕາມສະຖານທີ່ທ່ອງທ່ຽວຕ່າງໆ ຮັບປະ ກັນໃຫ້ມີຄວາມປະທັບໃຈ ແລະ ມີຄວາມປອດໄພຮອບດ້ານ.
ຂ່າວ-ພາບ: ສົມຫວັງ

ຂ່າວລາວ