ສູນປິ່ນປົວພາກສະໜາມດາວເຮືອງ ຮັບຜູ້ຕິດເຊື້ອໂຄວິດ ເຂົ້າປິ່ນປົວເຕັມແລ້ວ

ສູນປິ່ນປົວພາກສະໜາມດາວເຮືອງ ຮັບຜູ້ຕິດເຊື້ອໂຄວິດ ເຂົ້າປິ່ນປົວເຕັມແລ້ວ

ມາຮອດວັນທີ 13ຕຸລາ2021 ສູນປິ່ນປົວພາກສະໜາມດາວເຮືອງຢູ່ສົ້ນຂົວມິດຕະພາບລາວ-ໄທ ແຫ່ງທີ 1 ນະຄອນຫລວງວຽງຈັນຫາແຂວງໜອງຄາຍຂອງໄທ ຮັບຜູ້ຕິດເຊື້ອໂຄວິດ ເຂົ້າປິ່ນປົວເຕັມຄວາມສາມາດບັນຈຸແລ້ວ ໂດຍສາມາດບັນຈຸໄດ້ 800 ຄົນ. ຂະນະທີ່ອົງການກາແດງລາວເປັນຜູ້ສະໜອງດ້ານສະບຽງອາຫານໃຫ້ໃນແຕ່ລະວັນ.

ທ່ານ ຖາວອນ ສີຫາມາຍາ, ຮອງເຈົ້າເມືອງຫາດຊາຍຟອງ, ນະຄອນຫລວງວຽງຈັນ ທັງເປັນຫົວໜ້າໂຮງໝໍພາກສະໜາມດາວເຮືອງ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸແຫ່ງຊາດໃນວັນທີ 13ຕຸລາ 2021ວ່າ ເມື່ອກ່ອນໂຮງໝໍພາກສະໜາມດາວເຮືອງໃຊ້ເພື່ອຈຳກັດບໍລະເວນຜູ້ມີຄວາມສ່ຽງຕິດເຊື້ອໂຄວິດ ແຕ່ຍ້ອນຈຳນວນຜູ້ຕິດເຊື້ອພະຍາດຊະນິດນີ້ຢູ່ນະຄອນຫລວງວຽງຈັນນັບມື້ເພີ່ມຂຶ້ນນັບແຕ່ຕົ້ນເດືອນຕຸລາເປັນຕົ້ນມາ ຈິ່ງປ່ຽນມາເປັນສູນປິ່ນປົວພາກສະ ໜາມ ທີ່ບັນຈຸໄດ້ 800ຄົນ, ແຕ່ມາຮອດວັນທີ 13ຕຸລາ2021 ໄດ້ຮັບຜູ້ຕິດເຊື້ອເຂົ້າປິ່ນປົວເຕັມຄວາມສາມາດບັນຈຸແລ້ວ. ຂະນະດຽວກັນທີ່ພາຍໃນສູນຍັງຕ້ອງການເຄື່ອງນອນປະມານ 60ຊຸດ ເຮັດໃຫ້ຄະນະຮັບຜິດຊອບພວມຄົ້ນຄ້ວາຢູ່.

ຮອງເຈົ້າເມືອງຫາດຊາຍຟອງໃຫ້ຮູ້ຕື່ມວ່າ ສໍາລັບອາຫານການກິນຂອງຜູ້ປິ່ນປົວພາຍໃນໂຮງໝໍສະໜາມດາວເຮືອງ ສະເພາະຜູ້ຕິດເຊື້ອທີ່ເປັນແຮງງານຂອງບັນດາຫົວໜ່ວຍທຸກລະກິດທີ່ເຂົ້າປິ່ນປົວແມ່ນຫົວໜ່ວຍທຸລະກິດເຂົາເຈົ້າຮັບຜິດຊອບ, ສ່ວນຜູ້ຕິດເຊື້ອື່ນໆແມ່ນອົງການກາແດງລາວເປັນຜູ້ສະໜອງໃຫ້ທັງສາມຄາບໃນແຕ່ລະວັນ ໂດຍມີຄະນະຮັບ ຜິດຊອບການແຈກຢາຍອາຫານຢ່າງລະອຽດເພື່ອບໍ່ໃຫ້ແອອັດ ແລະ ຮັບ ປະກັນໃຫ້ແຕ່ລະຄົນໄດ້ຮັບອາຫານທັງ 3ຄາບ.

ຂ່າວລາວ