ຕ້ອງການຄົນເກັ່ງ ທີ່ມີຄວາມຮູ້ ຄວາມສາມາດ ເພື່ອນຳພາປະເທດຊາດບ້ານເມືອງ

ຕ້ອງການຄົນເກັ່ງ ທີ່ມີຄວາມຮູ້ ຄວາມສາມາດ ເພື່ອນຳພາປະເທດຊາດບ້ານເມືອງ

ຍຸກໃດ, ສະໄໝໃດ ແລະ ຢູ່ບ່ອນໃດກໍລ້ວນແຕ່ຕ້ອງການຄົນເກັ່ງ ທີ່ມີຄວາມຮູ້ ຄວາມສາມາດ ເພື່ອນຳພາປະເທດຊາດບ້ານເມືອງ ແຕ່ຈຳນວນຜູ້ທີ່ເກັ່ງ ມີຄວາມຮູ້ ຄວາມສາມາດ ຊໍ້າພັດມີຈຳກັດ. ຍ້ອນແນວນັ້ນ ຈຶ່ງຈຳເປັນຕ້ອງຊອກໃຫ້ເຫັນຄົນເກັ່ງ ຄົນມີຄວາມຮູ້ ຄວາມສາມາດທີ່ແທ້ຈິງ ເພື່ອນຳພາປະເທດຊາດບ້ານເມືອງ, ໂດຍສະເພາະແມ່ນຈັດວາງ ຊັບຊ້ອນເຂົ້າໃນໜ້າທີ່ຕຳແໜ່ງທີ່ສຳຄັນ ສຳຄັນ ໃນພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ.

ໃນຍຸກແຫ່ງການເຊື່ອມໂຍງຄືທຸກວັນນີ້ ຍິ່ງມີຄວາມຈຳເປັນທີ່ຈະຕ້ອງຂັບເຄື່ອນປະເທດຊາດໃຫ້ມີປະສິດທິພາບຍິ່ງຂຶ້ນ, ຈຶ່ງເປັນເຫດຜົນທີ່ວ່າຕ້ອງມີຄົນເກັ່ງ. ຊຶ່ງປະຫວັດສາດໄດ້ພິສູດໃຫ້ເຫັນຢ່າງຈະແຈ້ງແລ້ວວ່າ ຍຸກໃດ ສະໄໝໃດ ກໍຍ່ອມເກີດມີຄົນເກັ່ງຢູ່ສະເໝີ ແຕ່ເປັນກຸ່ມຄົນຈຳນວນໜ້ອຍ, ຖ້າບໍ່ມີຄວາມຈິງໃຈອີຫຼີກໍຈະຊອກບໍ່ເຫັນ, ຄົ້ນບໍ່ພົບ. ຖ້າປະເທດຊາດມີຄົນເກັ່ງ ຈຶ່ງສາມາດເອົາປະເທດຊາດຢູ່ລອດໄດ້, ເຊັ່ນ ໃນປະຫວັດສາດແຫ່ງການກຳເນີດປະເທດລາວທຳອິດກໍຄື ສະເດັດເຈົ້າແຫຼ່ງຫຼ້າທໍລະນີ ເຈົ້າຟ້າງຸ່ມ, ພະເຈົ້າ ໄຊຍະເຊດຖາທິຣາດ, ເຈົ້າອານຸວົງ…ໃນສະໄໝຕໍ່ສູ້ກູ້ຊາດຕ້ານຈັກກະພັດຮຸກຮານກໍມີບັນພະບູລຸດເກີດຂືຶ້ນຢ່າງມາກມາຍເຊັ່ນ: ອົງແກ້ວ, ອົງກຳມະດຳ, ເຈົ້າຟ້າປັດໄຈ… ໄລຍະມໍ່ໆນີ້ ທີ່ພວກເຮົາເຈົ້າຂ້ອຍກໍຮູ້ກັນດີເປັນຕົ້ນແມ່ນ ທ່ານ ສຸພານຸວົງ, ທ່ານໄກສອນ ພົມວິຫານ ແລະ ຜູ້ນຳຄົນອື່ນໆ.

ປັດໄຈຜູ້ນຳເກັ່ງ, ສະຫຼາດ ມີຜົນໂດຍກົງຕໍ່ຊະຕາກຳຂອງປະເທດຊາດ ນອກຈາກນັ້ນຍັງມິຄວາມຮູ້ ຄວາມສາມາດ ມີວິໄສທັດ ເບິ່ງກ້ວາງເຫັນໄກ ໃນຍຸກແຫ່ງການພັດທະນາ ເພາະທຸກວັນນີ້ ໂລກແຂ່ງຂັນກັນດ້ວຍຄວາມຮູ້ ຄວາມສາມາດ ສະຕິປັນຍາ ເທັກໂນໂລຊີ ແລະ ຂໍ້ມູນຂ່າວສານທີ່ບໍ່ມີພົມແດນ. ຖ້າຜູ້ນຳຍຸກປັດຈຸບັນ ຫາກຂາດຄວາມຮູ້ທາງດ້ານວິທະຍາສາດ ແລະ ຂາດວິໄສທັດ ເບິ່ງກ້ວາງ ເຫັນໄກແລ້ວ ກໍຈະຫຼ້າຫຼັງໃຫ້ຊາດອື່ນ.

ຍ້ອນເຫດຜົນດັ່ງກ່າວ ຈຶ່ງຄວນຊອກໃຫ້ເຫັນຄົນດີ ຄົນເກັ່ງ ທີ່ມີຄວາມຮູ້ ຄວາມສາມາດທີ່ແທ້ຈິງ ຈຶ່ງສາມາດ ນຳພາປະເທດຊາດຢູ່ລອດໄດ້ໃນຍຸກປັດຈຸບັນ, ຖ້າຫາກຈະເອົາແຕ່ຄວາມເກັ່ງກ້າສາມາດ, ຄວາມອາດຫານ ຂ້າເສິກສັດຕູ ເພື່ອກູ້ຊາດໃນຍຸກນີ້ແມ່ນເປັນໄປບໍ່ໄດ້ອີກແລ້ວ. ເປັນອັນແນ່ນອນວ່າ ແຕ່ລະຍຸກ ແຕ່ລະສະໄໝ ເງື່ອນໄຂຂອງຜູ້ນຳພາກໍມີການປ່ຽນແປງ ເພື່ອໃຫ້ສອດຄ່ອງກັບສະພາບຄວາມເປັນຈິງ.

ພວກເຮົາຕ້ອງເຂົ້າໃຈປັດຊະຍາຢ່າງໜຶ່ງວ່າ ປະເທດຊາດໜຶ່ງໆ ບໍ່ວ່າຍຸກໃດ ສະໄໝໃດ ກໍຍ່ອມມີຄົນເກັ່ງຢູ່ສະເໝີ ແຕ່ພວກເຮົາຍັງບໍ່ທັນໃສ່ໃຈເທົ່າທີ່ຄວນທີ່ຈະເລືອກເອົາ ອັນເນື່ອງມາຈາກຫຼາຍປັດໄຈທາງດ້ານການເມືອງ ແລະ ສັງຄົມ, ທາງດ້ານແນວຄວາມຄິດຈີນຕະນາການ ແລະ ທັດສະນະໃນການເບິ່ງບັນຫາ ແລະ ຈຸດເລີ່ມແນວຄິດທີ່ແຕກຕ່າງກັນ.

ຖ້າພວກເຮົາຫາກສາມາດດຶງຄົນເກັ່ງເຂົ້າມາຢູ່ໃນວົງການການນຳຂັ້ນສູງ ຄິດວ່າຈະເປັນປະໂຫຍດຢ່າງຍິ່ງໃຫ້ແກ່ປະເທດຊາດ. ເຖິງເວລາແລ້ວທີ່ພວກເຮົາຈະຕ້ອງປະລະແນວຄວາມຄິດເກົ່າຄອງເດີມ “ຄົນເຈົ້າຄົນຂ້ອຍ”, “ຈຸ້ມເຈື້ອເຊື້ສາຍ”, “ພັກພວກ”,  “ຊື້ຕຳແໜ່ງ”, “ອາໄສບາລະມີ”…ຈົ່ງຊອກໃຫ້ໄດ້ຄົນດີ ມີຄວາມສາມາດ ມີຄຸນສົມບັດສິນທຳປະຕິວັດ, ທັດສະນະຫຼັກໝັ້ນ ຊົນຊັ້ນໜັກແໜ້ນ ປະເທດຊາດຂອງພວກເຮົາຈຶ່ງຈະສາມາດກ້າວກະໂດດໄດ້.

ຂ່າວລາວ ສາລະໜ້າຮູ້