ທຸກຄົນໃນທົ່ວສັງຄົມບໍ່ຄວນວິຕົກກັງວົນ ກັບໂຄວິດ”ໂອມິຄຣອນ”ເກີນໄປ

ທຸກຄົນໃນທົ່ວສັງຄົມບໍ່ຄວນວິຕົກກັງວົນ ກັບໂຄວິດ”ໂອມິຄຣອນ”ເກີນໄປ

ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ລາຍງານໃນວັນທີ 7 ທັນວາ 2021 ນີ້ວ່າ: ການລະບາດຂອງພະຍາດໂຄວິດ-19 ໄດ້ສ້າງຄວາມກັງວົນໃຫ້ທຸກປະເທດໃນທົ່ວໂລກ ລວມທັງ ສປປ ລາວເຮົາ, ດັ່ງທີ່ພວກເຮົາໄດ້ຕິດຕາມຂ່າວສານຈາກຫລາຍໆບ່ອນກ່ຽວກັບການລະບາດຂອງສາຍພັນໃໝ່ ໂອມິຄຣອນ ນັ້ນ, ຂໍໃຫ້ທຸກພາກສ່ວນໃນສັງຄົມເຂົ້າໃຈຢ່າງຖືກຕ້ອງ, ບໍ່ໃຫ້ວິຕົກກັງວົນຈົນເກີນໄປ ເພາະວິທີການປ້ອງກັນຕົນເອງທີ່ຄະນະສະເພາະກິດໄດ້ແນະນຳຜ່ານມຍັງເປັນວິທີປ້ອງກັນທີ່ດີສາມາດປ້ອງກັນພະຍາດໂຄວິດ-19 ທຸກສາຍພັນໄດ້ ໂດຍການໃສ່ຜ້າປິດປາກ-ດັງ, ການຮັກສາໄລຍະຫ່າງ, ລ້າງມືເລື້ອຍໆ ແລະ ການສັກວັກຊີນ ກໍຍັງແມ່ນມາດຕະການຕົ້ນຕໍ ໃນການສະກັດກັ້ນ, ຫລຸດ ຜ່ອນ ແລະ ລະງັບການແພ່ລະບາດພະຍາດດັ່ງກ່າວ.

ປັດຈຸບັນ, ສະພາບຂອງການລະບາດຢູ່ປະເທດຂອງພວກເຮົາ ພົບຢູ່ໃນຊຸມຊົນ ໂດຍສະເພາະແມ່ນສະຖານທີ່ທີ່ມີຄົນຢູ່ຈຳນວນຫລາຍເຊັ່ນ: ສະຖານທີ່ເຮັດວຽກ, ສຳນັກງານອົງການ, ໂຮງຈັກໂຮງງານ, ສະຖາບັນການສຶກສາ ເຊິ່ງສ້າງເງື່ອນໄຂໃຫ້ຜູ້ທີ່ຕິດເຊື້ອແຕ່ບໍ່ມີອາການສາມາດແພ່ໃສ່ຄົນອ້ອມຂ້າງໄດ້, ດັ່ງ ນັ້ນ ສະຖານທີ່ດັ່ງກ່າວຈະຕ້ອງມີມາດຕະການເພື່ອກັ່ນກອງບໍ່ໃຫ້ຜູ້ທີ່ມີອາການສົງໄສຕິດເຊື້ອເຂົ້າມາຮ່ວມໄດ້, ຈັດຕັ້ງສະຖານທີ່ເຮັດວຽກບົນພື້ນຖານການຮັກສາໄລຍະຫ່າງ, ອຳນວຍຄວາມສະດວກໃຫ້ມີເຈວລ້າງມື ຫລື ມີອ່າງລ້າງມືພ້ອມສະບູຫລາຍຈຸດໃນສະຖານທີ່ເຮັດວຽກ. ຂະນະດຽວກັນກໍຕ້ອງໄດ້ໝັ່ນອະນາໄມຂ້າເຊື້ອດ້ວຍນ້ຳຢາຂ້າເຊື້ອເປັນປະຈຳ, ເດັດຂາດບໍ່ໃຫ້ຜູ້ທີ່ມີຄວາມສ່ຽງທີ່ເປັນຜູ້ສຳພັດໃກ້ຊິດກັບຄົນຕິດ ເຊື້ອ ຫລື ບຸກຄົນທີ່ມີອາການເຂົ້າມາເຮັດວຽກໃນສະຖານທີ່ດັ່ງກ່າວ.

ສະພາບການລະບາດທີ່ພວມຜະເຊີນໃນປັດຈຸບັນ, ພັກ ແລະ ລັດຖະບານ ໄດ້ຈັດສັນໂຮງໝໍພາກສະ ໜາມຂຶ້ນຢູ່ຫລາຍແຫ່ງ, ນຳໃຊ້ໂຮງແຮມເປັນສູນປິ່ນປົວສຳລັບຜູ້ມີເງື່ອນໄຂ ລວມທັງການອະນຸຍາດໃຫ້ປິ່ນປົວຢູ່ເຮືອນສຳລັບຜູ້ທີ່ມີເງື່ອນໄຂ: ຜູ້ທີ່ບໍ່ມີອາການສະແດງ ຫລື ມີອາການເບົາບາງ ເທົ່ານັ້ນ ແລະ ສຳຄັນທີ່ສຸດ ຕ້ອງໄດ້ສັກວັກຊີນຄົບ, ບໍ່ມີພະຍາດປະຈໍາໂຕ, ບໍ່ແມ່ນຜູ້ອາຍຸສູງ, ບໍ່ຖືພາ, ບຸກຄົນເຫລົ່ານີ້ຕ້ອງປະຕິບັດດັ່ງນີ້: ຕ້ອງມີຫ້ອງນອນ ແລະ ຫ້ອງນໍ້າໃຊ້ສະເພາະຕົນເອງ, ຕິດຕາມອາການຕົນເອງ, ບໍ່ໃຫ້ໃຊ້ສິ່ງຂອງຮ່ວມກັນ, ຕ້ອງໃສ່ຜ້າອັດປາກ-ດັງ, ຖ້າທ່ານມີອາການຮຸນແຮງ ເຊັ່ນ ຫາຍໃຈຍາກ ໃຫ້ໂທຫາແພດ ເບີ 164 ຫລື ແຈ້ງອຳນາດການປົກຄອງບ້ານທັນທີ.

ສຳ​ນັກ​ຂ່າວ​ຕ່າງ​ປະ​ເ​ທດ​ລາຍ​ງານໃນ​ວັນ​ທີ 6 ທັນ​ວາ 2021 ວ່າ ເຈົ້າ​ໜ້າ​ທີ່​ສາ​ທາ​ລະ​ນະ​ສຸກ​ຂອງ​ສະ​ຫະ​ລັດ​ອາ​ເມ​ຣິ​ກາ​ກ່າວ​ວ່າ: ເຖິງ​ແມ່ນ​ວ່າ ໄວ​ຣັ​ສ​ກາຍ​ພັນ​ໂອ​ໄມ​ຄ​ຣອນ ຈະ​ແຜ່​ລະ​ບາດ​ຢ່າງ​ໄວ​ວາ​ໃນ​ສະ​ຫະ​ລັດ ແຕ່​ຜົນ​ການ​ສຶກ​ສາ​ເບື້ອງ​ຕົ້ນ ບົ່ງ​ຊີ້​ວ່າ ອາດ​ມີ​ຄວາມ​ອັນ​ຕະ​ລາຍ​ໜ້ອຍກວ່າ​ສາຍ​ພັນ​ເດວ​ຕາ ເຊິ່ງ​ຍັງ​ເປັນ​ສາ​ເຫດຫຼັກ​ທີ່​ມີ​ຜູ້​ຕິດ​ເຊື້ອ​ໂຄວິດ-19 ເຂົ້າ​ຮັບ​ການ​ປິ່ນ​ປົວ​ຢູ່​ໂຮງ​ໝໍ​ເພີ່ມ​ຂຶ້ນ.

ທ່ານ ດ​ຣ. ​ແອນໂທ​ນີ ເຟົາ​ຊີ ຜູ້​ຊ່ຽວ​ຊານ​ດ້ານ​ພະ​ຍາດ​ຕິດ​ເຊື້ອທັງ​ເປັນ​ຫົວ​ໜ້າ​ທີມ​ທີ່​ປຶກ​ສາ​ດ້ານ​ສາ​ທ​າລະ​ນະ​ສຸກ​ຂອງ​ປະ​ທາ​ນາ​ທິ​ບໍ​ດີ ໂຈ ໄບ​ເດັນ​ຂອງ​ສະ​ຫະ​ລັດ​ອາ​ເມ​ຣິ​ກາ ກ່າວ​ວ່າ: ນັກ​ວິ​ທະ​ຍາ​ສາດ​ຈຳ​ເປັນ​ຕ້ອງ​ມີ​ຂໍ້​ມູນຫຼາຍກວ່າ​ນີ້ ກ່ອນ​ທີ່​ຈະ​ສະຫຼຸບ​ເຖິງ​ຄວາມ​ຮຸນ​ແຮງ​ຂອງ​ໄວ​ຣັ​ສ​ກາຍ​ພັນ​ໂອ​ໄມ​ຄ​ຣອນ. “ຈົນ​ເຖິງ​ຂະ​ນະ​ນີ້ ເບິ່ງ​ຄື​ວ່າ ໂອ​ໄມ​ຄ​ຣອນ ບໍ່​ໄດ້​ມີ​ຄວາມ​ຮຸນ​ແຮງ ແຕ່​ພວກ​ເຮົາ​ກໍ​ຕ້ອງ​ມີ​ຄວາມ​ລະ​ມັດ​ລະ​ວັງ ກ່ອນ​ທີ່​ຈະ​ສະຫຼຸບ​ວ່າ ມັນ​ບໍ່​ມີ​ຄວາມ​ຮຸນ​ແຮງຫຼື​ບໍ່? ມັນ​ບໍ່​ເຮັດ​ໃຫ້​ມີ​ອາ​ການ​ຮຸນ​ແຮງ​ເໝືອນ​ກັບ​ເດວ​ຕາ ຫຼື ບໍ່?” ທີ່​ປຶກ​ສາ​ທຳ​ນຽບ​ຂາວ ກ່າວ.

ມາ​ຮອດ​ວັນ​ທີ 5 ທັນ​ວາ​ຜ່ານ​ມາ, ສະ​ຫະ​ລັດ​ກວດ​ພົບ​ຜູ້​ຕິດ​ເຊື້ອ​ກາຍ​ພັນ​ໂອ​ໄມ​ຄ​ຣອນເກືອບ 1/3 ຂອງ​ຜູ້​ຕິດ​ເຊື້ອ​ທັງ​ໝົດ ແຕ່​ຜູ້​ຕິດ​ເຊື້ອ​ສ່ວນຫຼາຍ​ທີ່​ໄປ​ຮັບ​ການ​ປິ່ນ​ປົວ​ຢູ່​ໂຮງ​ໝໍ​ແມ່ນ​ຜູ້​ຕິດ​ເຊື້ອ​ສາຍ​ພັນ​ເດວ​ຕາ​ກວມ​ເຖິງ 99%.

ຂ່າວລາວ