ທົ່ວປະເທດສາມາດສັກວັກຊິນເຂັ້ມທີ 1 ໄດ້ 3.682.242 ເທົ່າກັບ 50.18%

ທົ່ວປະເທດສາມາດສັກວັກຊິນເຂັ້ມທີ 1 ໄດ້ 3.682.242 ເທົ່າກັບ 50.18%

ທ່ານ ດຣ ນາງ ພອນປະເສີດ ໄຊຍະມຸງຄຸນ ຮອງຫວໜ້າກົມ ຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານ ໃນວັນທີ 21 ພະຈິກ 2021 ໃຫ້ຮູ້ວ່າ:

ຮອດມື້ນີ້ ທົ່ວປະເທດສາມາດສັກວັກຊິນເຂັ້ມທີ 1 ໄດ້ 3.682.242 ເທົ່າກັບ 50.18% ແລະ ຄົບທຸກເຂັ້ມໄດ້ 3.073.829 ເທົ່າກັບ 41.89%. ປັດຈຸບັນ ທົ່ວປະເທດມີຈໍານວນບ້ານແດງ 978 ບ້ານ, 80 ເມືອງ ແລະ 17 ແຂວງ.

ໃນຂະນະທີ່ ຖານທີ່ຈໍາກັດບໍລິເວນໃນທົ່ວປະເທດ ໃນປັດຈຸບັນມີ 86 ສູນ ໂດຍມີຜູ້ຈໍາກັດບໍລິເວນຢູ່ສູນ 3.042 ຄົນ (ຍັງສາມາດຮອງຮັບໄດ້ຕື່ມອີກ 10.006 ຄົນ), ມີໂຮງແຮມ 59 ແຫ່ງ, ປັດຈຸບັນຜູ້ຈໍາກັດບໍລິ ເວນ ຢູ່ໂຮງແຮມ 1.841 ຄົນ, (ສາມາດຮອງຮັບໄດ້ຕື່ມອີກ 7.763), ຜູ້ຈໍາກັດບໍລິເວນຢູ່ສູນ ແລະ ຢູ່ໂຮງແຮມ ຈຳກັດບໍລິເວນ 4.883 ຄົນ.

ທ່ານ ດຣ ນາງ ພອນປະເສີດ ໃຫ້ຮູ້ຕື່ມວ່າ: ສຳລັບການບໍລິການເກັບຕົວຢ່າງ ເພື່ອກວດຫາເຊື້ອ ໂຄວິດ-19 ໃນແຕ່ລະແຂວງ ແມ່ນສາມາດໄປເກັບຕົວຢ່າງ ເພື່ອກວດຊອກຫາເຊື້ອພະຍາດດັ່ງກ່າວ ໄດ້ຢູ່ໂຮງໝໍແຂວງ ຫລື ຈຸດກວດເພີ່ມເຕີມທີ່ທາງຄະນະສະເພາະກິດຂອງແຂວງກຳນົດຢູ່ພາຍໃນແຂວງ. ສ່ວນຢູ່ນະຄອນຫລວງວຽງຈັນ ແມ່ນຢູ່ ຈຸດກວດຄົງທີ່ ໃຫ້ບໍລິການເກັບຕົວຢ່າງມີ:

ສະໜາມກິລາໃນຮົ່ມບຶງຂະຫຍອງ (ວັນຈັນ ຫາ ອາທິດ)ເວລາ 9-11:30ໂມງ ແລະ ຈຸດເປນຢູ່ ມສ ເຈົ້າອານຸວົງ; ທີມກວດເຄື່ອນທີ່ ເຊິ່ງມີການເຄື່ອນທີ່ເກັບຕົວຢ່າງ ຕາມຈຸດທີ່ມີການລະບາດພາຍໃນແຕ່ລະເມືອງ (ມີທີມພະແນກສາທາລະນະສຸກ ນະຄອນ ຫລວງວຽງຈັນ, ສາທາເມືອງໄຊທານີ, ສາທາເມືອງສີສັດຕະນາກ, ສາທາເມືອງສີໂຄດຕະບອງ ແລະ ສາທາເມືອງນາຊາຍທອງ). ສ່ວນຈຸດບໍລິການໃຫ້ວັກຊິນຢູ່ບັນດາແຂວງແມ່ນ: ໂຮງໝໍແຂວງ, ໂຮງໝໍເມືອງ ແລະ ຈຸດທີ່ຄະນະສະເພາະກິດກໍານົດໄວ້. ສຳລັບຢູ່ນະຄອນຫລວງວຽງຈັນມີ:

ໂຮງໝໍສູນກາງ, ໂຮງໝໍເມືອງ 9 ຕົວເມືອງ ແລະ ຈຸດເພີ່ມເຕີມຢູ່ວັດຈີນ ບ້ານດົງປາແລບ ເມືອງຈັນທະບູລີ (ເປີດວັນຈັນ ຫາ ວັນສຸກ). ການເດີນທາງເຂົ້າມາ ສປປ ລາວ ຕາມຈຸດຜ່ານແດນໃນຂອບເຂດທົ່ວປະເທດ ເຊິ່ງວັນທີ 20 ພະຈິກ 2021 ມີຜູ້ເດີນທາງຜ່ານດ່ານເຂົ້າມາ ສປປ ລາວ ຈໍານວນທັງໝົດ 1.349 ຄົນ (ຈໍານວນເດີນທາງເຂົ້າມາ ແຕ່ພົບການຕິດເຊື້ອໃນກຸ່ມຄົນດັ່ງກ່າວພຽງແຕ່ 10 ຄົນ), ທຸກຄົນແມ່ນໄດ້ຮັບອະນຸຍາດຈາກຄະນະສະເພາະກິດ ໃຫ້ເດີນທາງເຂົ້າມາ ເພື່ອປະຕິບັດໜ້າທີ່ຈໍາເປັນ ແລະ ຮີບດ່ວນ ໃນ ສປປ ລາວ.

ຂ່າວລາວ