ເກີດຫຍັງຂຶ້ນ ຍັງເຫຼືອປໍ້າດຽວທີ່ເປີດຂາຍນໍ້າມັນເຊື້ອໄປ ຢູ່ຫຼວງນໍ້າທາ

ເກີດຫຍັງຂຶ້ນ ຍັງເຫຼືອປໍ້າດຽວທີ່ເປີດຂາຍນໍ້າມັນເຊື້ອໄປ ຢູ່ຫຼວງນໍ້າທາ

ຈາກຜູ້ໃຊ້ເຟສບຸກຊື່Sida Saynamtha ໄດ້ໂພສໃນວັນທີ 28/03/2022 ວ່າ:

ຍັງເຫລືອປໍ້າດຽວເດີທີ່ຫລວງນໍ້າທາ (ພັກ-ລັດ ຮີບແກ້ໄຂດ່ວນ)ທີ່ປໍ້າຫລັກ2 ຫນອງບົວວຽງ ຫາກຢາກເຕີມຕ້ອງມີກະປ່ອງ

ໃສ່ນໍ້າມັນ ແລະ ເງີນໃບ 20,000₭ ເດີ (ຕົນເອງບໍ່ໄດ້ເຕີມຊໍ້າ)

ຫຼາຍປໍ້ານໍ້າມັນ ຢູ່ລາວ ໄດ້ປິດລົງ ຍ້ອນບໍ່ສາມາດນໍາເຂົ້າໄດ້ຕາມປະລິມານທີ່ຕ້ອງການ

ໃນໄລຍະຜ່ານມາ, ບັນດາບໍລິສັດ ຜູ້ນໍາເຂົ້ານ້ຳມັນເຊື້ອໄຟ ຂອງລາວ ໄດ້ປະສົບບັນຫາສະພາບລາຄາ ແລະ ການສະໜອງນ້ຳມັນເຊື້ອໄຟບໍ່ພຽງພໍ ເນື່ອງຈາກການເໜັງຕີງຂອງລາຄານໍ້າເຊື້ອໄຟໃນຕະຫລາດໂລກ ໄດ້ຖີບໂຕສູງຂຶ້ນເລື້ອຍໆ, ແຕ່ກໍາລັງການຜະລິດລວມຂອງກຸ່ມປະເທດຜະລິດນໍ້າມັນເຊື້ອໄຟ ພັດບໍ່ໄດ້ເພີ່ມຂຶ້ນ.

ເຊິ່ງມັນເຮັດໃຫ້ບໍລິສັດນຳເຂົ້ານ້ຳມັນເຊື້ອໄຟ ບໍ່ສາມາດນໍາເຂົ້າໄດ້ຕາມປະລິມານຄວາມຕ້ອງການ ເນື່ອງຈາກຕ້ອງໄດ້ຊຳລະເງິນຄ່ານ້ຳມັນເຊື້ອໄຟໃນມື້ນຳເຂົ້າ ແຕ່ລາຄາໂຄງສ້າງພາຍໃນຍັງບໍ່ໄດ້ປັບຂຶ້ນ ເມື່ອທຽບກັບລາຄານ້ຳມັນໂລກທີ່ປັບຂຶ້ນຕະຫຼອດເວລາ, ເຮັດໃຫ້ບໍລິສັດຕ້ອງດຳເນີນທຸລະກິດ ໃນສະພາບຂາດທຶນ ແລະ ເຮັດໃຫ້ຈໍານວນນຳເຂົ້າຫລຸດລົງ.

ຂະນະທີ່ ນ້ຳມັນທີ່ນຳມາຈຳໜ່າຍໃຫ້ລູກຄ້າ ກໍມີປະລິມານຈໍາກັດລົງ ເປັນເຫດໃຫ້ບາງປໍ້ານໍ້າມັນເຊື້ອໄຟ ທີ່ບໍ່ໄດ້ຮັບການສະໜອງຈາກບໍລິສັດແມ່ໄດ້ພຽງພໍ ຈຶ່ງບໍ່ມີນໍ້າມັນເຊື້ອໄຟຂາຍ ຫລື ໄດ້ຈຳໜ່າຍໝົດກ່ອນການສະໜອງ, ແລະ ກໍມີຫລາຍປໍ້າໄດ້ປິດລົງ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ໃຫ້ສຳພາດແກ່ສື່ມວນຊົນ ໃນວັນທີ 13 ມີນາ ຜ່ານມາວ່າ: ຈາກລາຄານ້ຳມັນເຊື້ອໄຟທົ່ວໂລກສູງຂຶ້ນ ແນ່ນອນວ່າມັນໄດ້ສົ່ງຜົນໂດຍກົງ ເຮັດໃຫ້ລາຄາຂາຍຍ່ອຍນ້ຳມັນເຊື້ອໄຟ ພາຍໃນປະເທດເຮົາປັບຂຶ້ນເປັນເງົາຕາມໂຕ

ເຊິ່ງການປັບລາຄາຂຶ້ນ ແມ່ນມີຄວາມຈໍາເປັນ ເພື່ອໃຫ້ເຮັດໃຫ້ລາຄາປັບປ່ຽນທັນຕາມສະພາບການ ເນື່ອງຈາກບັນດາໂຮງກັ່ນນໍ້າມັນ ແລະ ຜູ້ສະໜອງລາຍໃຫຍ່ ບໍ່ສາມາດສະໜອງຕາມປະລິມານຄວາມຕ້ອງການໄດ້.

ຍ້ອນສະຖານະການທີ່ບໍ່ແນ່ນອນ ບວກກັບຕົ້ນທຶນການຂົນສົ່ງນໍ້າມັນດິບຍັງສູງ, ບາງໂຮງກັ່ນ ກໍໄດ້ກັກຕຸນເພື່ອຂາຍໃນຍາມຈຳເປັນ ແລະ ເວລາທີ່ລາຄາສູງກວ່າ.

ສ່ວນປະກົດການກ່ຽວກັບບັນຫາການກັກຕຸນ ນໍ້າມັນເຊື້ອໄຟ ຂອງບັນດາປໍ້ານໍ້າມັນ ຢູ່ ສປປ ລາວ ກ່ອນການປັບລາຄານໍ້າມັນເຊື້ອໄຟ ໃນໄລຍະຜ່ານມາ ກໍໄດ້ມີປໍ້າຈຳນວນໜຶ່ງໄດ້ປິດ ເພື່ອລໍຖ້າຂາຍໃນລາຄາປັບຂຶ້ນ ເຊິ່ງມັກເກີດຂຶ້ນໄລຍະ 1 ມື້ຫາສອງມື້ກ່ອນການປັບລາຄາ.

ເຖິງຢ່າງໃດກໍຕາມ, ຜ່ານມາ ພະແນກອຸດສາຫະກໍາ ແລະ ການຄ້າ ນະຄອນຫລວງ, ແຂວງຈໍາປາສັກ ແລະ ບັນດາແຂວງຈຳນວນໜຶ່ງ ກໍໄດ້ຍົກສູງຄວາມຮັບຜິດຊອບ ລົງກວດກາປໍ້ານ້ຳມັນ ທີ່ປິດໂດຍບໍ່ມີເຫດຜົນ ແລະ ເຫັນວ່າເນື່ອງຈາກສະພາບລາຄາ ແລະ ການສະໜອງບໍ່ພຽງພໍ ບາງປໍ້າກໍປິດລົງ ຍ້ອນບໍ່ມີນໍ້າມັນສະໜອງໃຫ້ ຫລື ບາງປ້ຳອາດປິດລົງດ້ວຍເຈດຕະນາ.

ເຊິ່ງທາງກະຊວງອຸດສາຫະກຳ ແລະ ການຄ້າ ແມ່ນຈະໄດ້ສືບຕໍ່ຕິດຕາມ, ຊຸກຍູ້ບັນດາພະແນກບັນດາແຂວງ ເພື່ອເອົາໃຈໃສ່ຕໍ່ບັນຫາດັ່ງກ່າວ.

ຂ່າວລາວ