ຊົມເຊີຍປວງຊົນລາວທັງຊາດ ສະຫຼອງປີໃໝ່ລາວ ຮັກສາຮີດຄອງປະເພນີອັນດີງາມໄວ້

ຊົມເຊີຍປວງຊົນລາວທັງຊາດ ສະຫຼອງປີໃໝ່ລາວ ຮັກສາຮີດຄອງປະເພນີອັນດີງາມໄວ້

ການສະເຫຼີມສະຫຼອງປີໃໝ່ລາວ ຫຼື ກຸດສົງການ ພ.ສ 2565, ຄ.ສ 2022 ຂອງປວງຊົນລາວບັນດາເຜົ່າຍັງຮັກສາໄດ້ຮີດຄອງປະເພນີອັນດີງາມ, ການສະເຫຼີມສະຫຼອງງານບຸນໃນປີນີ້ບໍ່ຄຶກຄື້ນຄືດັ່ງທຸກໆປີທີ່ຜ່ານມາ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19, ລັດຖະບານກໍຄືຄະນະສະເພາະກິດທຸກພາກສ່ວນນັບແຕ່ຂັ້ນສູນກາງຮອດທ້ອງຖິ່ນໄດ້ອອກແຈ້ງການບໍ່ໃຫ້ຈັດງານສະເຫຼີມສະຫຼອງ ແລະ ອວຍພອນໃນວັນປີໃໝ່ຢ່າງເດັດຂາດ ເພື່ອເປັນການປະຢັດມັດທະຍັດ ແລະ ເປັນແບບຢ່າງໃຫ້ແກ່ສັງຄົມ ພ້ອມທັງຫຼີກເວັ້ນບໍ່ໃຫ້ມີການແຜ່ລະບາດຂອງພະຍາດໂຄວິດ-19 ໃນໄລຍະບຸນປີໃໝ່ລາວ

ແຕ່ເຖິງຢ່າງໃດກໍຕາມປວງຊົນລາວທັງຊາດ ຍັງຮັກສາໄດ້ຕາມຮີດຄອງປະເພນີອັນດີງາມທີ່ເຄີຍປະຕິບັດສືບທອດກັນມາແຕ່ບູຮານນະການ, ຮັກສາໄດ້ຄວາມເປັນລະ ບຽບຮຽບຮ້ອຍປອດໄພທາງສັງຄົມ ເປັນເຈົ້າການຍົກສູງສະຕິໃນການປະຕິບັດມາດຕະການປ້ອງກັນພະຍາດໂຄວິດ-19 ເພື່ອໃຫ້ທຸກຄົນມີຄວາມປອດໄພໄດ້ເປັນຢ່າງດີ. ດັ່ງຄຳເວົ້າທີ່ວ່າ: ຮັກຊາດ ຮັກຄອບຄົວຈົ່ງພ້ອມໃຈກັນປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ບໍ່ມີໃຜປອດໄພ ຖ້າທຸກຄົນບໍ່ປອດໄພ.

ສຳລັບຢູ່ນະຄອນຫຼວງວຽງຈັນ ກໍໄດ້ມີການສະເຫຼີມສະຫຼອງປີໃໝ່ລາວຕາມຮີດຄອງປະເພນີລາວ ຊຶ່ງຕະຫຼອດໄລຍະ 3 ວັນຄື: ວັນທີ 14-15-16 ຫຼາຍພາກສ່ວນໃນຂອບເຂດທົ່ວປະເທດກໍໄດ້ພ້ອມໃຈກັນປະຕິບັດຕາມຄຳສັ່ງຂອງຄະນະສະເພາະກິດວາງອອກເພື່ອຫຼຸດຜ່ອນການແຜ່ລະບາດຂອງພະຍາດໂຄວິດ-19,

ເຖິງບໍ່ມີການສະເຫຼີມສະຫຼອງຄືດັ່ງທຸກປີຜ່ານມາ ແຕ່ມີຄອບຄົວຈຳນວນໜຶ່ງກໍໄດ້ປະຕິບັດຕາມຮີດຄອງປະເພນີເພື່ອບໍ່ປະລະຮີດໃຫ້ໝອງ ຄອງໃຫ້ເສົ້າ ໄດ້ມີການສົມມາຄາລະວະ, ຫົດນ້ຳອວຍພອນໃຫ້ພໍ່ແມ່, ຜູ້ມີພະຄຸນ, ຜູ້ອາວຸໂສດ້ວຍຈິດໃຈປະຢັດ, ສຳລັບຢູ່ວັດວາອາຮາມຕ່າງໆກໍມີການຫົດສົງພະພຸດທະຮູບ, ຄູບາ-ອາຈານຕາມຮີດຮອງປະເພນີທີ່ປູ່ຍ່າຕາຍາຍໄດ້ປະຕິບັດສືບທອດກັນມາ ທຸກຄົນໄດ້ມີຄວາມຕື່ນຕົວ ມີສະຕິໃນການປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ.

ການສະເຫຼີມສະຫຼອງປີໃໝ່ລາວປີນີ້ ເຖິງວ່າຈະຢູ່ໃນສະພາບແວດລ້ອມທີ່ບໍ່ເອື້ອອຳນວຍ ໂດຍສະເພາະຍັງມີການແຜ່ລະບາດຂອງເຊື້ອພະຍາດໂຄວິດ-19 ເພີ່ມຂຶ້ນໃນແຕ່ລະວັນ ແຕ່ໃນການສະເຫຼີມສະຫຼອງປີໃໝ່ລາວຂອງທົ່ວປວງຊົນລາວທັງຊາດ ແມ່ນໄດ້ພ້ອມກັນເອົາໃຈໃສ່ຮັກສາຄວາມເປັນລະບຽບຮຽບຮ້ອຍ ຄວາມປອດໄພໄດ້ເປັນຢ່າງດີ ແລະ ມີສະຕິສູງໃນການປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ເພື່ອບໍ່ໃຫ້ມີການແຜ່ລະບາດຂອງພະຍາດອອກສູ່ວົງກວ້າງ.

ຂ່າວລາວ