ລາວ ກຳລັງຈະມີໂຮງງານຫຼອມຄຳ ແລະ ທະນາຄານຝາກຄຳ ໂດຍນັກ​ລົງ​ທຶນ​ເຊື້ອ​ສາຍ​ລາວ​ຈາກ ສຫ​ລ

ລາວ ກຳລັງຈະມີໂຮງງານຫຼອມຄຳ ແລະ ທະນາຄານຝາກຄຳ ໂດຍນັກ​ລົງ​ທຶນ​ເຊື້ອ​ສາຍ​ລາວ​ຈາກ ສຫ​ລ

ສປປ ລາວ ກຳລັງພັດທະນາຂຶ້ນຢ່າງຕໍ່ເນື່ອງອີງໃສ່ທ່າແຮງຕົວຈີງຂອງປະເທດ ແຕ່ໃນນັ້ນເຮົາກໍຍັງຂາດຫຼາຍປັດໄຈທີ່ເປັນຄວາມຕ້ອງການຂອງປະຊາຊົນ ແຕ່ບໍ່ທັນມີບ່ອນຜະລິດ ແລະຮອງຮັບ ເປັນຕົ້ນໂຮງງານຫຼອມຄຳ, ທະນາຄານຝາກຄຳ, ການແປຮູບສິນຄ້າຈາກກະສິກຳຕົວຢ່າງຄືຖົ່ວເຫຼືອງເຮົາມີພື້ນທີ່ດິນປະຊາຊົນມີມູນເຊື້ອເຮັດການຜະລິດ ແລະຜົນໄດ້ຮັບດີແຕ່ບໍ່ທັນມີໂຮງງານເກັບຊື້ ແລະແປຮູບເປັນສິນຄ້າແລະອື່ນໆ.

ຫຼ້າສຸດນີ້, ລັດຖະບານແຫ່ງ ສປປ ລາວ ອະນຸຍາດໃຫ້ ບໍລິສັດ ວິໄລກຸນ ອິນເຕີເນຊັນແນວ ບໍ່ຄຳ ຈຳກັດ ສຶກສາຂໍ້ມູນ ແລະ ຄວາມເປັນໄປໄດ້ ໂຄງການລົງທຶນຢູ່ ສປປ ລາວ ໂດຍໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຂໍ້ມູນ ແລະ ສຶກສາຄວາມເປັນໄປໄດ້ໃນການລົງທຶນຢູ່ ສປປ ລາວ ໃນວັນທີ 18 ເມສາ 2022 ທີ່ນະຄອນຫລວງ ວຽງຈັນ, ຕາງໜ້າລັດຖະບານລາວ ເຊັນໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ຝ່າຍ ບໍລິສັດເຊັນໂດຍ ທ່ານ ວຽງໄຊ ວິໄລກຸນ ປະທານ ບໍລິສັດ ວິໄລກຸນ ອິນເຕີເນຊັນແນວ ບໍ່ຄຳ ຈຳກັດ ໂດຍມີພາກສ່ວນກ່ຽວຂ້ອງເຂົ້າຮ່ວມ ເປັນສັກຂີພິຍານ.

ທ່ານ ວຽງໄຊ ວິໄລກຸນ ປະທານ ບໍລິສັດ ວິໄລກຸນ ອິນເຕີເນຊັນແນວ ບໍ່ຄຳ ຈຳກັດ ກ່າວວ່າ: ການເຊັນບົດບັນທຶກຄວາມເຂົ້າໃຈໃນຄັ້ງນີ້, ເພື່ອປະກອບສ່ວນໃນການຊຸກຍູ້ການລົງທຶນຢູ່ ເຂົ້າໃນຂະແໜງການຕ່າງໆຢູ່ ສປ ລາວ ແລະ ທັງປະກອບສ່ວນໃນການພັດທະນາປະເທດ ໂດຍຈະໄດ້ສຶກສາການກໍ່ສ້າງໂຮງງານຫລອມຄຳ ໃຫ້ໄດ້ມາດຕະຖານສາກົນ ຕາມຕະຫລາດລອນດອນ ແລະ ການບໍລິການ, ການກໍ່ສ້າງທະນາຄານຝາກຄຳ, ການສ້າງໂຮງງານ ແລະ ຜະລິດແຜງພະລັງງານໄຟຟ້າແສງຕາເວັນ, ການປູກຖົ່ວເຫລືອງ ແລະ ສ້າງໂຮງງານຜະລິດນໍ້າມັນຖົ່ວເຫລືອງ, ການຊອກຄົ້ນ, ສຳຫລວດ, ຂຸດຄົ້ນ ແລະ ປຸງແຕ່ງແຮ່ຄຳ ແລະ ແຮ່ຕິດພັນ ແລະ ການສ້າງໂຮງງານຜະລິດເຈ້ຍເສດ ເພື່ອນຳມາໃຊ້ຄືນ.

ບັນດາໂຄງການທີ່ຢູ່ໃນແຜນການຂອງບໍລິສັດວິໄລກຸນ ອິນເຕີເນຊັນແນວ ບໍ່ຄຳຈຳກັດແມ່ນຈະໃຊ້ເວລາໃນການສຶກສາຂໍ້ມູນພາຍໃນ 24 ເດືອນ ນັບແຕ່ມື້ລົງລາຍເຊັນເປັນຕົ້ນໄປ.

ນັກ​ລົງ​ທຶນ​ເຊື້ອ​ສາຍ​ລາວ​ຈາກສະ​ຫະ​ລັດ ກໍ​ໄດ້​ເຊັນ​ບົດ​ບັນ​ທຶກ​ຄວາມ​ເຂົ້າ​ໃຈຫລື MOU ​ກັບ​ລັດ​ຖະ​ບານ​ລາວ ໃນ​ວັນ​ທີ 18 ເມ​ສາ​ຜ່ານ​ມາ ຊຶ່ງ​ໃນ​ນັ້ນ ມີ 6 ໂຄງ​ການ​ ຄື ໂຮງ​ງານ​ຫລອມ​ຄຳ, ທະ​ນາ​ຄານ​ຄຳ, ໂຮງ​ງານແຜງ​ຜະ​ລິດ​ພະ​ລັງ​ງານ ​ຈາກ​ແສງ​ຕາ​ເວັນ, ໂຮງ​ງານ​ຜະ​ລິດ​ນ້ຳ​ມັນ​ຖົ່ວ​ເຫລືອງລວມ​ທັງ​ການ​ປູກ​ຖົ່ວ​ເຫລືອງ, ການ​ສຳ​ຫລ​ວດ​ແຮ່​ຄຳ​ພ້ອມ​ກັບແຮ່​ທາດ​ອື່ນໆ, ແລະ​ໂຮງ​ງານ​ຜະ​ລິດ​ເຈ້ຍ​ຈາກ​ເສດ​ເຈຍ​ທີ່​ເອົາ​ມາ​ໝູ​ນ​ໃຊ້​ໃໝ່. ທ່ານ​ວຽງ​ໄຊ ວິ​ໄລ​ກຸນ, ປະ​ທານ​ບໍ​ລິ​ສັດບໍ່​ຄຳ​ສາ​ກົນ​ວິ​ໄລ​ກຸນ ຫລື Wilaikul International Gold Mines Co. Ltd. ທີ່​ເປັນ​ຜູ້​ເຊັນ MOU ​ເວົ້າ​ສູ່​ຟັງ​ວ່າ ສອງ​ໂຄງ​ການ​ທີ່​ຈະ​ເລີ້​ມ​ການ​ສຶກ​ສາ​ຄວາມ​ເປັນ​ໄປ​ໄດ້ໃນ​ເວ​ລາ​ນີ້ ກໍ​ຄືໂຮງ​ງານ​ຫລອມ​ຄຳ​ ແລະທະ​ນາ​ຄານ​ຄຳ ທີ່​ມີ​ມູນ​ຄ່າ​ຫລາຍ​ຮ້ອຍ​ລ້ານ​ໂດ​ລາ

ບໍ​ລິ​ສັດບໍ່​ຄຳ​ສາ​ກົນ​ວິ​ໄລ​ກຸນ​ສ້າງ​ຕັ້ງ​ຂຶ້ນຢູ່​ລາວ​ຕັ້ງ​ແຕ່​ປີ 2012 ແລະ​ໄດ້​ດຳ​ເນີນ​ການສຳ​ຫລວດ​ມາ​ໄດ້ຫລາຍ​ປີ​ແລ້ວ. ປັດ​ຈຸ​ບັນກຳ​ລັງຈະ​ຍື່ນ​ໃບ​ສະ​ເໜີຂໍ​ຂຸດ​ຄົ້ນ​ຄຳ ​ຢູ່ທີ່​ເມືອງ​ຊະ​ນະ​ຄາມ, ແຂວງວຽງ​ຈັນ ແລະໂຮງ​ງານ​ຫລອມ​ຄຳກໍຈະ​ຕັ້ງ​ຢູ່ໃນ​ເຂດ​ດຽວ​ກັນ. ສ່ວນ​ອີກ 4 ໂຄງ​ການທີ່​ເຫລືອນັ້ນ ກໍ​ຈະ​ດຳ​ເນີນການ​ສຶກ​ສາ​ຄວາມ​ເປັນ​ໄປ​ໄດ້ ໃນ​ໄວໆ​ນີ້ ແລະຈະ​ນຳ​ເອົາ​ນັກ​ລົງ​ທຶນ​ຈາກ​ສະ​ຫະ​ລັດ​ໄປ​ລົງ​ທຶນ ຮ່ວມກັບ​ບໍ​ລິ​ສັດ​ຂອງ​ທ່ານ ເຊັ່ນ​ກັນ. ໂດຍ​ມີ​ຈິດ​ໃຈ​ຢາກ​ສ້າງ​ສາ​ບ້ານ​ເກີດ​ເມືອງນອນ, ນັກ​ທຸ​ລະ​ກິດ​ອາ​ເມ​ຣິ​ກັນ​ເຊື້ອ​ສາຍ​ລາວ​ທ່ານນີ້​ເວົ້າ​ວ່າ​ ທຸກໆ​ໂຄງ​ການແມ່ນຈະໃຫ້​ລັດ​ຖະ​ບານ​ລາວ​ມີ​ຫຸ້ນ​ສ່ວນປະ​ມານ 20 ເປີ​ເຊັນ​ ແລະ​ເສຍ​ພາ​ສີໃຫ້​ລັດ​ຖະ​ບານ​ຢ່າງ​ເຕັມ​ສ່ວນ.

ຂ່າວລາວ