ເຫດການກາດຍິງໃນໂຮງຮຽນປະຖົມຢູ່ ສະຫະລັດອາເມລິກາ ມີຜູ້ເສຍຊີວິດສູງເຖິງ 21ຄົນ

ເຫດການກາດຍິງໃນໂຮງຮຽນປະຖົມຢູ່ ສະຫະລັດອາເມລິກາ ມີຜູ້ເສຍຊີວິດສູງເຖິງ 21ຄົນ

ເຫດການກາດຍິງໃນ ໂຮງຮຽນປະຖົມໃນລັດເທັກຊັສ ປະເທດສະຫະລັດອາເມຣິກາ ເຮັດໃຫ້ນັກຮຽນເສຍຊີວິດຫຼາຍເຖິງ 18 ຄົນ ແລະ ຄູອາຈານ ເສຍຊີວິດ 3 ຄົນ, ຜູ້ກະທຳແມ່ນມີອາຍຸ 18 ປີ ຕຳຫຼວດເຊື່ອວ່າລົງມືເຮັດໂດຍບໍ່ມີແຮງຈູງໃຈ.

ໃນວັນທີ 25 ພຶດສະພານີ້ ສຳນັກຂ່າວຊີເອັນເອັນລາຍງານວ່າ: ເກີດເຫດກາດຍິງທີ່ໂຮງຮຽນປະຖົມສຶກສາຣັອບ (Robb Elementary School) ໃນເມືຶອງຢູວາລດີ ລັດເທັກຊັສ ສົ່ງຜົນໃຫ້ມີຜູ້ເສຍຊີວິດເຖິງ 21 ຄົນ ໃນນັ້ນມີນັກຮຽນ 18 ຄົນ ແລະ ຄູອາຈານ 3 ຄົນ, ນອກນີ້ຍັງມີຜູ້ບາດເຈັບສົ່ງໄປໂຮງໝໍແລ້ວ 2 ຄົນ ສ່ວນຄົນຮ້າຍເປັນຜູ້ຊາຍອາຍຸ 18 ປີ ໃຊ້ອາວຸດປືນໄຣເຝິນ ແລະ ປືນສັ້ນ ເຊິ່ງລາວໄດ້ຖືກວິສາມັນໃນຈຸດເກີດເຫດແລ້ວ.

ທ່ານເກຣັກ ແອບບັອດ ຜູ້ວ່າການລັດເທັກຊັສ ເປີດເຜີຍວ່າ: ມືປືນຜູ້ກໍ່ເຫດຄື ທ້າວ ຊັລວາດໍ ອາຍຸ 18 ປີ ເປັນຄົນອາເມຣິກາ ການສືບສວນເບື້ອງຕົ້ນພົບວ່າ ເປັນນັກຮຽນຂອງໂຮງຮຽນຢູວາລດີ ແລະ ເຊື່ອວ່າລາວໄດ້ຍິງສັງຫານຍ່າຂອງລາວກ່ອນ ແລ້ວຂັບລົດໄປຫາໂຮງຮຽນປະຖົມ ແຕ່ຕຳຫຼວດຍັງບໍ່ຢືນຢັນຄວາມເຊື່ອມໂຍງລະຫວ່າງສອງເຫດການນີ້.

ຕຳຫຼວດໄດ້ເວົ້າວ່າ: ໄດ້ມີຄຳສັ່ງລັອກດາວທຸກໂຮງຮຽນໃນເຂດນັ້ນ ຈາກການກວດສອບເບື້ອງຕົ້ນແມ່ນຄົນຮ້າຍໄດ້ກໍ່ເຫດຄົນດຽວ ແລະ ກຳລັງຫາສາເຫດແຮງຈູງໃຈ.

ຂະນະດຽວກັນມີລາຍງານວ່າ ປະທານາທິບໍດີ ໂຈ ໄບເດັນ ຕຽມຖະແຫຼງການໃນທຳນຽບຂາວກ່ຽວກັບເຫດການສະເທືອນຂັວນໃນໂຮງຮຽນເທື່ອນີ້.

ຂ່າວຕ່າງປະເທດ