ເກີດຫຍັງຂື້ນ…ທີມເຕະທີມຊາດຊຸດໃຫຍ່ ບໍ່ສົ່ງນັກເຕະປະສົບການສູງລົງແຂ່ງ ແຕ່ເອົາໜ້າໃໝ່ມາຫາປະສົບການ

ເກີດຫຍັງຂື້ນ…ທີມເຕະທີມຊາດຊຸດໃຫຍ່ ບໍ່ສົ່ງນັກເຕະປະສົບການສູງລົງແຂ່ງ ແຕ່ເອົາໜ້າໃໝ່ມາຫາປະສົບການ

ເປັນຄວາມຜິດຫວັງຂອງຊາວລາວ ທັງປະເທດຫຼັງຈາກທີ່ ທີມຊາດລາວ ຊຸດໃຫຍ່ຊຸດນີ້ ທີ່ຖືກຄາດຫວັງວ່າຈະເປັນທີມທີ່ດີທີ່ສຸດເທົ່າທີ່ເຄີຍມີມາ ໃນການແຂ່ງຂັນບານເຕະ ເອເອັຟເອັຟ ຊູຊູກິ ຄັບ 2020 ( AFF SUZUKI CUP ) ແຕ່ຜົນງານຕົວຈິງກັບບໍ່ເປັນດັ່ງທີ່ຫວັງ ເສຍທັງ 4 ນັດລວດ ຫຼັງນັດຫຼ້າສຸດເສຍໃຫ້ກັບ ກໍາປູເຈຍ 0-3.

ບໍ່ຢາກເວົ້າແຕ່ອົດບໍ່ໄດ້ ເມື່ອຜົນງານໜ້າຜິດຫວັງ ແລະ ຍັງບໍພໍ ແຕ່ການວາງນັກເຕະຍິ່ງຄັດໃຈຊາວລາວທັງປະເທດອີກ ໃນນັດທີ່ ທີມຊາດລາວ ຊຸດໃຫຍ່ຊຸດ ເສຍໃຫ້ກັບ ທີມຊາດກໍາປູເຈຍ ຄູ່ແຂ່ງທີ່ພໍສູ້ໄດ້ ໃນການແຂ່ງຂັນບານເຕະ ເອເອັຟເອັຟ ຊູຊູກິ ຄັບ 2020 ( AFF SUZUKI CUP ) ໄປແບບໝົດສະພາບ 0-3 (ເບິ່ງຄລິບການເສຍປະຕູຂອງທີມຊາດລາວ)

ແນ່ນອນເກມນີ້ຫຼາຍຄົນຄົງເຫັນລາຍຊື່ນັກເຕະ 11 ຕົວຈິງ ແລະ ສໍາຮອງກໍຖືວ່າເປັນຕົວເດັດຫຼາຍ, ແຕ່ສິ່ງທີ່ຄາໃຈຄື ບ໊ອກທັງ ສຸກອາພອນ ວົງຈຽງຄໍາ ກອງໜ້າທີມຊາດລາວ ທີ່ມີປະສົບການຫຼາຍທີ່ສຸດໃນລາຍການນີ້ກັບບໍ່ມີທັງຊື່ຕົວຈິງ ແລະ ສໍາຮອງເປັນ 2 ນັດຕິດຕໍ່ກັນຕໍ່ຈາກນັດທີ່ເສຍໃຫ້ກັບ ອິນໂດເນເຊຍ 1-5 ກໍບໍ່ມີຊື່ ສຸກອາພອນ ລວມເຖິງ ມິດສະດາ ສາຍໃຕ້ຟ້າ ແລະ ມະໂນລົມ ເພັດພັກດີ ກໍບໍ່ມີຊື່ໃນນັດນີ້ ໄດ້ແຕ່ນັ້ງສໍາຮອງ (ເບິ່ງຄລິບລຸ່ມນີ້ອາດເປັນອີກໜຶ່ງເຫດຜົນທີ່ສຸກອາພອນ ບໍ່ມີຊື່ 2 ນັດລວດ)

ການແຂ່ງຂັນລະດັບທີມຊາດຊຸດໃຫຍ່ ການມີນັກເຕະປະສົບການນັ້ນແມ່ນມີຄວາມສໍາຄັນຫຼາຍ ນອກຈາກຈະເປັນແຮງກະຕຸ້ນໃຫ້ກັບຮຸ່ນນ້ອງ ແລະ ຍັງເປັນການຂົ່ມຂູ່ຄູ່ແຂ່ງອີກດ້ວຍ ເຊິ່ງນັດນີ້ ທີມຊາດລາວ ກັບບໍ່ມີຮອດຊື່ ສຸກອາພອນ ໃນຕົວສໍາຮອງ ແນ່ນອນສຸກອາພອນ ເປັນນັກເຕະລາວ ຄົນປັດຈຸບັນທີ່ມີປະສົບການໃນລາຍການນີ້ກັບທີມຊາດລາວ ຊຸດໃຫຍ່ ເຖິງ 5 ຄັ້ງ, ສ່ວນ ກໍາປູເຈຍ ກໍມີ ຈັນ ວັດທະນາກາ ນັກເຕະທີ່ມີປະສົບການສູງສຸດໃນລາຍການນີ້ຂອງທີມຊາດກໍາປູເຈຍ ເຊິ່ງຫຼາຍນັດທີ່ຜ່ານມາກໍພາຮຸ່ນນ້ອງຫຼິ້ນໄດ້ດີ.

ແລະກໍເປັນໄປຕາມຄາດ ທີມຊາດລາວ ຖືກ ກໍາປູເຈຍ ຂຶ້ນນໍາ 2-0 ໃນເຄິ່ງເວລາທໍາອິດຈາກການຍິງຂອງ ຈັນ ວັດທະນາກາ ກອງໜ້າປະສົບສູງຂອງທີມຊາດກໍາປູເຈຍ ແລະ ໄດ້ອີກ 1 ຈາກ SIENG CHANGTHEA ນາທີໆ 74 ຊ່ວຍໃຫ້ ກໍາປູເຈຍ ເອົາຊະນະ 3-0

ຫຼັງເກມເຫັນວ່າ ທີມຊາດກໍາປູເຈຍ ແມ່ນຫຼິ້ນໄດ້ດີຫຼາຍ ເໝືອນກັບນັດທີ່ຜ່ານມາ ສະຖິຕິການຄອງບານແມ່ນເໜືອກວ່າ ແມ່ນກະທັງນັດທີ່ເສຍໃຫ້ກັບ ອິນໂດເນເຊຍ 2-4 ແລະ ແນ່ນອນນັດຊະນະ ທີມຊາດລາວ 3-0 ກໍຄອງເກມໄດ້ເຖິງ 64% ແລະ ສ້າງໂອກາດຍິງເຖິງ 15 ຄັ້ງ ( ເຂົ້າເປົ້າ 8 ຄັ້ງ ) ແລະ ເປັນປະຕູ 3 ໜ່ວຍ, ສ່ວນທີມຊາດລາວ ໄດ້ໂອກາດຍິງ 8 ຄັ້ງ ( ເຂົ້າເປົ້າ 3 ຄັ້ງ ).

ຈົບການແຂ່ງຂັນ ກໍາປູເຈຍ ເອົາຊະນະ ພ້ອມເກັບ 3 ຄະແນນຈາກ 3 ນັດທໍາອິດຢຶດທີ 4 ຂອງຕາຕະລາງກຸ່ມ B ຕໍ່ໄປ, ສ່ວນ ທີມຊາດລາວ ລົງແຂ່ງຂັນ 4 ນັດບໍ່ມີຈັກຄະແນນຢຶດອັນດັບທີສຸດທ້າຍຂອງຕາຕະລາງ ແລະ ກຽມກັບບ້ານໄວໆນີ້.

ຢ່າງໃດກໍ, ຂໍຊົມເຊີຍນັກເຕະທີມຊາດລາວ ທີ່ທຸ້ມເທສຸດຄວາມສາມາດ ແລະ ຂໍໃຫ້ຕັ້ງໃຈໃໝ່ ລວມເຖິງປັບປຸງໃໝ່ໃນສິ່ງທີ່ຂາດຫາຍໄປ.

ຂ່າວລາວ