ອັນຕະລາຍ ເມືອງກະລຶມ ກວດພົບສິນຄ້າທີ່ນຳເຂົ້າບໍ່ຖືກຕ້ອງ ແລະ ສິນຄ້າໝົດອາຍຸ ລວມມູນຄ່າເກືອບ 7 ລ້ານກີບ.

ອັນຕະລາຍ ເມືອງກະລຶມ ກວດພົບສິນຄ້າທີ່ນຳເຂົ້າບໍ່ຖືກຕ້ອງ ແລະ ສິນຄ້າໝົດອາຍຸ ລວມມູນຄ່າເກືອບ 7 ລ້ານກີບ.

ໃນວັນທີ 23 ພຶດສະພາ 2022 ທີ່ຜ່ານມາ, #ໜ່ວຍງານອາຫານແລະຢາ ສົມທົບກັບ ພາກສ່ວນທີ່ກ່ຽວຂ້ອງ ໄດ້ລົງເຄື່ອນໄຫວກວດກາ #ສິນຄ້າທີ່ນຳເຂົ້າບໍ່ຖືກຕ້ອງ, #ສິນຄ້າປອມແປງລອກຮຽນແບບ, #ສິນຄ້າໝົດອາຍຸ, ແລະ #ສິນຄ້າເຊື່ອມຄຸນນະພາບ ຢູ່ຕາມຕະຫລາດ ແລະ ຮ້ານຂາຍເຄື່ອງຍ່ອຍ ພາຍໃນເທດສະບານ #ເມືອງກະລຶມ #ແຂວງເຊກອງ, ເຊິ່ງນຳໂດຍ ທ່ານ ນາງ ແກ້ວວິໄລ ມະນີວົງ ຫົວໜ້າໜ່ວຍອາຫານ ແລະ ຢາ ຫ້ອງການສາທາລະນະສຸກເມືອງກະລຶມ, ທ່ານ ສີນາບອນ ໄຊຍະບຸດ ຫົວໜ້າໜ່ວຍງານການຄ້າພາຍຂັ້ນເມືອງ ພ້ອມດ້ວຍພະນັກງານວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມ.

ການລົງເຄື່ອນໄຫວໃນຄັ້ງນີ້ ແມ່ນໄດ້ປະຕິບັດຕາມໜັງສືແຈ້ງການຂອງກົມອາຫານ ແລະ ຢາ ສະບັບເລກທີ 5005/2022, ກອຢ, ລົງວັນທີ 25 ເມສາ 2022 ແລະ ໜັງສືສະເໜີຂອງບໍລິສັດ DKSH Company Limited ສະບັບເລກທີ 280 ລົງວັນທີ 30 ມີນາ 2022 ວ່າດ້ວຍຕິດຕາມເຄື່ອງສຳອາງຫຍີ່ຫໍ້ ນີເວຍ ປະເພດລູກກິ້ງ ( ໂລອອນ ) ແລະ ສະເປດັບກິ່ນກາຍ ທີ່ນຳເຂົ້າບໍ່ຖືກຕ້ອງຕາມລະບຽບ, ບໍ່ໄດ້ຈົດແຈ້ງ ແລະ ຜະລິດຕະພັນປອມແປງທີ່ບໍ່ໄດ້ຄຸນນະພາບ.

ການລົງກວດກາຄັ້ງນີ້ ໄດ້ພົບເຫັນສິນຄ້າທີ່ຕ້ອງຫ້າມ ປະເພດເຄື່ອງສຳອາງ ລູກກິ້ງ ( ໂລອອນ ) ຈຳນວນ 204 ຂວດ, ມູນຄ່າ 4.771.000 ກີບ, ພົບເຫັນສິນຄ້າໝົດອາຍຸ ປະເພດ ເຂົ້າໜົມ ແລະ ເຄື່ອງສຳອາງ ມູນຄ່າ 2.255.000 ກີບ, ລວມມູນຄ່າທັງໝົດ 6.966.000 ກີບ.

ໃນນີ້ ສຳລັບສິນຄ້າທີ່ນຳເຂົ້າບໍ່ຖືກຕ້ອງ ຫຼື ບໍ່ຜ່ານກົມອາຫານ ແລະ ຢາ ( ກອຢ ) ຂອງບໍລິສັດ DKSH ແມ່ນທາງເຈົ້າໜ້າທີ່ໄດ້ອາຍັດໄວ້ ເພື່ອເກັບກຳຂໍ້ມູນ ນຳໄປແຈ້ງໃຫ້ບໍລິສັດດັ່ງກ່າວໄປຂຶ້ນທະບຽນໃຫ້ຖືກຕ້ອງຕາມລະບຽບການ, ສ່ວນສິນຄ້າທີ່ໝົດອາຍຸ ແມ່ນຈະໄດ້ທຳລາຍຖິ້ມ.

ຕໍ່ກັບຮ້ານຂາຍເຄື່ອງຍ່ອຍທີ່ພົບສິນຄ້າຕ້ອງຫ້າມ ແລະ ໝົດອາຍຸ ດັ່ງກ່າວ ເຈົ້າໜ້າທີ່ກໍໄດ້ສຶກສາອົບຮົມ ພ້ອມທັງເຮັດບົດບັນທຶກໄວ້ເປັນຫຼັກຖານ ເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດຫມາຍ ແລະ ເປັນການປົກປ້ອງຜູ້ຊົມໃຊ້, ຜູ້ບໍລິໂພກໃນສັງຄົມໃຫ້ໄດ້ຊົມໃຊ້ສິນຄ້າທີ່ຖືກຕ້ອງ ແລະ ມີຄຸນນະພາບດີ.

ຂ່າວລາວ